Ua Na’o Tusiga Faatekinolosi: Talavou Matutua
Lagonaina o le Tuuatoatasi? O Ni Motugaafa Nei e 3 Ua Faia se Eseesega mo A’u
E alala le tusitala i Cuneo, Italia.
O le avea ai ma se tagata o le Ekalesia i Italia e mafai ona tuuatoatasi, ae ua ou aoaoina e le tuua lava na o au.
Ou te nofo i se nuu laitiiti i Italia, lea e na o le toafa talavou nofofua matutua i la’u paranesi.
O le toatele o tagata iinei e auai le Katoliko, latou te fesootai la i o latou talitonuga tutusa. E masani ona ou lagona le faaesea o se tagata O Le Ekalesia a Iesu Keriso o le Au Paia o Aso e Gata Ai.
E faigofie ona lagona e pei ua na o au pe a taumafai malosi ia avea atili e faapei o le Faaola. Ou te faia le mea sili e mulimuli ai ia te Ia. Ou te fia taliaina valaaulia a Peresitene Russell M. Nelson ia “manumalo i le lalolagi”1 ma “mafaufau faaselesitila,”2 ae o nisi taimi ou te lotovaivai ai pe a ou lagona e pei o loo o’u tu na o au i lo’u faatuatuaga.
Peitai, pe a oo mai le tuuatoatasi, e fesoasoani ni faatinoga faapitoa ou te agai ai pea i luma ma le faatuatua. O ni motugaafa nei se tolu e fesoasoani ou te faatoilalo ai lena tuuatoatasi.
Fai le Faitauina o Tusitusiga Paia o se Mausa
Pe a ou lagonaina le lofituina i le tuuatoatasi, ou te faaaluina sina taimi e tagi atu ai i le Tama Faalelagi e ala i le tatalo. Ou te ta’u atu ia te Ia o’u lagona ona susue lea o a’u tusitusiga paia. I se auala, ou te maua i taimi uma ia upumoni e manaomia ona ou faalogo i ai i lena taimi.
E ui e le o taimi uma e faamatala ai e fuaiupu o’u tulaga tonu, ae o upumoni o loo i ai e faatumulia ai lo’u loto i le faamoemoe ma le mafanafana. E mou ese le tuuatoatasi pe a ou maua ni taimi filemu e mafaufau loloto ai i upu a perofeta anamua o e molimau ia Keriso.
Latou te faamanatu mai pea ia te au e alofaina au, e silafia e le Atua o’u tulaga, ma o le a lelei mea uma.
O le faia o se mausa e faitau i taimi uma au tusitusiga paia ma tatalo, e tusa lava pe faigata, e fesoasoani ou te lagona ai le fiafia, sili atu le mautinoa, ma sili atu ona fesootai i le Agaga.
Afai tatou te valaaulia le Faaola i o tatou olaga e ala i le suesueina o tusitusiga paia, o le a i ai o Ia iina e le aunoa, ma faamanatu mai ia i tatou o ai i tatou ma fesootai atu i tatou i le Tama Faalelagi.
Ia Manatua Le Mana Gafatia o Iesu Keriso
E le aunoa ona ou liliu atu ia Iesu Keriso e maua ai le faamagaloga ma le filemu. Ae ua ou malamalama foi e mafai ona Ia tuuina mai ia te au le lagolago pe a ou lagona le tuuatoatasi.
Na faamalamalama mai e Elder Jeffrey R. Holland e faapea, i le taimi ao puapuaga le Faaola i le Faatoaga o Ketesemane, “na Ia alaga ai mulimuli i lona tuuatoatasi, ‘Lo’u Atua e, lo’u Atua e, se a le mea ua e tuulafoai mai ai ia te au?’ [Mataio 27:46; ua faaopoopo le faamamafa].”
Na faaauau ona saunoa Elder Holland: “Ioe o lo’u lava talitonuga patino, i le galuega atoa a Keriso i le olaga nei atonu e lei sili atu ona latalata ai le Tama i Lona Alo nai lo nei toe taimi mafatia tele o puapuaga. Ae peitai, o lena taulaga silisili ese a Lona Alo atonu na atoatoa faapei ona ofofua mai ma tasi lava, na aveese e le Tama i sina taimi ititi mai ia Iesu le faamafanafanaga o Lona Agaga, le lagolago o Lona mafuta patino ai. … O lenei Alo atoatoa o lē sa lei tautala lava i le leaga pe sa sese se mea na [Ia] faia, sa lei pa’i foi i se mea le mamā sa alagatatau ona iloa pe o a ni lagona o isi tagata uma—o i tatou, o i tatou uma—pe a tatou faia ni agasala faapena.”3
Ona o lenei mea, ua Ia silafia ai le ala e fesoasoani ai ia i tatou (tagai i le Alema 7:11–12). Na te silafia lelei o tatou lagona.
Sa savalia e Iesu Keriso lena ala na o ia ina ia tatou le tau faia. O le aoao e uiga ia te Ia ma le taulai atu i Lona mana gafatia e aumaia ai ia te au le mafanafana, faamoemoe, ma le malosi e fetaomi atu ai i luma ma le faatuatua.
Ia e Agalelei Ia Te Oe Lava.
Pe a ou lagona le tuuatoatasi, o le agalelei ia te au lava e faia ai se eseesega tele. Ou te fafagaina lo’u mafaufau i mafaufauga lelei aua ua ou iloaina o A’u o le tagata o le a ou faaaluina ai lo’u olaga atoa! O lea la, e tatau ona i ai sa’u mafutaga lelei ma a’u lava.
O le tuuatoatasi o le a sili atu ona leaga pe afai tatou te le agalelei ia i tatou lava.
Ou te faia au lava e pei o se uo. Ou te faamanatu ia te au lava o ai au ma e ui lava ou te le atoatoa, e mafai lava ona ou salamo i taimi uma ma taumafai pea e mulimuli ia Keriso. Sa valaaulia i tatou talu ai nei e Elder Gary E. Stevenson e “tu a o e tilotilo atu ia te oe lava i le fā’ata. Mafaufau ifo ia te oe lava, pe fai leotele pe a e manao ai, “Oka, vaai mai ia te au! Ou te ofoofogia! O a’u o se atalii/afafine o le Atua! Na te silafia au! E alofa o Ia ia te a’u! Ua faameaalofaina a’u—faameaalofaina i le Agaga Paia e fai ma a’u soa tumau!’”4
O lea la, ou te faia. Ou te tilotilo i le fā’ata ma ta’u ia te a’u lava nei mea. Ona ou ata lea ona ou te lagona le faavalevalea, ae ou te lagonaina foi le faateleina o le mautinoa, alofaina, ma le fesootai atu i le Agaga.
Pe a avea oe ma au lava uo, o le a e le lagona lava e le o i ai sau uo.
E Le Tuua Lava Na o Oe
O nisi taimi ou te lagona ai ua na o au lava e feagai ma ni luitau patino. Ae ou te faamanatu ia te au lava o loo toatele naua talavou matutua i le lalolagi atoa o loo i ai i lo’u tulaga lava e tasi. E tusa lava pe ou te le iloa po o ai i latou, o loo latou taumafai foi e tutu faatasi ma Keriso.
Ou te le o na’o au.
Na saunoa talu ai nei Elder Alan T. Phillips o le Fitugafulu: “E toatele tagata e lagonaina le lofituina, tuuatoatasi, faaesea, po o le vaivai. … O le iloa ai o i tatou uma o fanau a le Atua ma o tagata o Lona aiga e faavavau o le a toe maua ai se lagona o le avea ma ni ō ma le faamoemoe.”5
E alofa le Tama Faalelagi ia te i tatou. Ua Ia tuuina mai ia i tatou meafaigaluega e fesootai ai i tatou ma Ia, Lona Alo, ma i le tasi ma le isi. Pau lava le mea tatou te manaomia o le manatua e faaaoga ia mea.
Na te silafia oe. O loo faatasi o Ia ma oe. ‘Aua nei aveesea le faamoemoe. Faatumu lou olaga i le Agaga, ma manatua o le avea ai o se atalii/afafine o le Atua, e te auai i Lona aiga e faavavau.
E le o tuua lava na’o oe.