“O Le Faapotopotoina o Isaraelu: E Pei o se Toga Olive,” Liahona, Ape. 2024.
Sau, Mulimuli Mai ia te A’u
O Le Faapotopotoina o Isaraelu: E Pei o se Toga Olive
Talafaatusa i le Laau o le Olive, saunia e Brad Teare
Na aoao mai Peresitene Russell M. Nelson e faapea, o le faapotopotoina o Isaraelu “o le mea aupito sili lea ona taua ua tupu i le lalolagi i aso nei”1—ma e mafai ona avea i tatou ma se vaega o lena mea! Ae o le a tonu lava le faapotopotoina, ma o ai e faatatau i ai? O le taimi lava tatou te malamalama ai i lenei galuega taua, e mafai ona tatou filifili lelei pe faapefea ona tatou mananao taitoatasi e fesoasoani e faapotopoto Isaraelu.
O le talafaatusa o laau olive i le Iakopo 5 e mafai ona fesoasoani ia i tatou i lenei malamalamaaga. Sa faasoa mai e Iakopo lenei talafaatusa, i vaega, e tali ai le fesili pe mafai faapefea e le nuu anamua o le feagaiga a le Alii, “ina ua tuanai ona latou teena o le faavae mautu [o lona uiga, o le Faaola], ona mafai ona atia’e ai i ona luga” (Iakopo 4:17).
O le a: O le faapotopotoina o Isaraelu o se taumafaiga i le lalolagi atoa e fesoasoani i fanau uma a le Tama Faalelagi e “faalogo i le savali o le talalelei toefuataiina a Iesu Keriso … [ma] filifili mo i latou lava pe afai latou te fia iloa atili.”2 E faataunuu ai foi valoaga o loo ta’u mai ai o le nuu o le feagaiga a le Atua (o e tupuga mai ia Aperaamo po o i latou o e ua vaetamaina i le feagaiga e ala i le papatisoga) o le a faapotopotoina i aso e gata ai. Ma o se vaega o le sauniuniga mo le Afio Mai Faalua o le Alii. (Tagai i le Mose 7:61-65).
Iakopo 5: O le galuega a le matai ma ana auauna i le tovine ua faatusa i le fegalegaleaiga a le Alii ma Lana fanau a o faataapeapeina ma faapotopotoina Isaraelu (tagai, mo se faataitaiga, fuaiupu 76–77).
O ai: Tagata uma! O le faapotopotoina o Isaraelu e faatatau i fanau uma a le Atua, o e ola ma i latou i le lalolagi o agaga. “OIsaraelu e faasino i se tagata o loo loto e faamuamua le Atua i lona olaga.”3
Iakopo 5: O le matai o le togaolive ua faatusa ia Iesu Keriso. O laau olive fanua ma o latou lala ua faatusa i le nuu o le feagaiga a le Alii, ma o olive vao ma o latou lala ua faatusa ia i latou o e e le’i osia feagaiga ma le Alii. O auauna o loo faapotopotoina ia lala e faatusa ia i latou o e o loo faasalalauina le talalelei ma fesoasoani i tagata ia osia ma tausia feagaiga. (Tagai fuaiupu 3, 70, 72–73.)
E faafefea: E pei ona aoao mai Peresitene Nelson, soo se taimi lava tatou te fesoasoani ai i soo se tasi e faia se laasaga agai i le osia o feagaiga ma le Atua, ua tatou fesoasoani e faapotopoto Isaraelu.4 O le auauna atu i se misiona talai, faia o galuega o talafaasolopito o aiga, ma le faatinoina o sauniga o le malumalu o ni auala silisili ia e faapotopoto ai Isaraelu. O auala e tau le iloa e aofia ai le faataunuuina o lou valaauga i le Ekalesia, avea o se uo ia i latou e le auai i la tatou tapuaiga, fautuaina o le saolotoga o tapuaiga, faauoina o se tasi e fou i le lotu, tuuina atu o lau molimau, auauna atu ia i latou e le tagolima, ma avea o se tagata agavaa e umia se pepa faataga o le malumalu.
Iakopo 5: O le teuteuina, eliina, ma le suluina e faatusa i auala eseese e mafai ona tatou fesoasoani ai i isi e osia ma tausia feagaiga paia (tagai fuaiupu 11, 12, 58, 68).
O afea: O le faapotopotoina o Isaraelu sa tupu talu mai le amataga ma o loo faaauau pea i o tatou aso o se vaega o le Toefuataiga faifai pea o le talalelei a Iesu Keriso i luga o le fogaeleele.
Iakopo 5: O le taumafaiga mulimuli i le tovine e faatusa i aso e gata ai ma a tatou sauniuniga mo le Afio Mai Faalua o le Faaola (tagai fuaiupu 62, 77).
O Fea: Ua tupu le faapotopotoina o Isaraelu i le lalolagi atoa. “O atunuu taitasi o se nofoaga lea o le faapotopotoina mo ona lava tagata”5
Iakopo 5: O le tovine a le matai ua faatusa i le lalolagi (tagai fuaiupu 8, 14).
Aisea: A o tatou faapotopotoina Isaraelu, ua tatou valaauliaina fanau a le Atua e osia feagaiga o le a mafai ai ona latou nonofo faatasi ma o latou aiga i le lagi. O le osia o nei feagaiga i le lalolagi e faaeeina ai foi i tatou i le malosi, olioli, ma le fesoasoani faaleatua i luitau o le olaga.6
Iakopo 5: O le olioli e lagona e auauna mai a latou galuega filigā o le olioli lava lea e tasi tatou te lagonaina pe a tatou galulue e aumai isi ia Keriso (tagai fuaiupu 71, 75).