Ua Na’o Tusiga Faatekinolosi: Talavou Matutua
Fausiaina o le Alofa Tumau: O Se Taiala i le Feagai ai ma Luitau A o i ai i se Mafutaga
E alala le tusitala i Sweden.
Ina ua ou mai ina ua uma ona ou faamau [mo le faaipoipoga], sa ou le mautinoa pe o le a manuia la’u mafutaga.
Claudiana: E lei leva ona ma faamau ma Gustavo, ae ou ma’i tigaina lava. Sa ma asiasi atu i lea fomai ma lea fomai, ae sa leai se tasi o i latou na iloaina le mea na faaletonu ia te au. O le tele o meaai e tiga ai lo’u manava, ma sa ou faaaluina vaiaso e tele i le falemai e faasuati ai ma alu le palapala [toto]. Sa vave ona faaitiitia le tulaga lelei o lo’u olaga.
O vaiaso na liua i masina ma masina na liua i le tele o tausaga, ma sa le’i iloa lava po o le a lou ma’i. O le vailaau na tuuina mai ia te au e togafitia ai auga o lo’u mai na ou fulafula ai ma mafua ai ona toulu lo’u lauulu. Sa vave ona tau le iloa au.
Sa ou lagona le pei o se sauai auleaga ma fai atu ia Gustavo e le afaina pe a manao e faamuta le ma [mafutaga]. Ou te lei manao e fetuunai lona fiafia. Ae sa susulu pea ona mata i soo se taimi e tilotilo mai ai ia te au, ma sa musu o ia e aluese atu ma au. O le taimi lena na ou iloa ai ua ou maua [la’u] pele moni.
Ina ua mavae tausaga uumi e fa, sa iu ina ou maua i se ituaiga saua o le faama’i o Crohn ma amata ai ona togafitia i se fualaau e maualuga le malosi. Sa toe tutupu lo’u lauulu, ma sa te’a o’u fulafula. O le lima ma le afa tausaga talu ona ma feiloai, na iu lava ina ma faaipoipo ma Gustavo i le malumalu.
O le mea moni e faapea, sa ma nonofo faatasi ma Gustavo ma le leai o se folafolaga o lo’u toe maua o le malosi e ono faateia ai nisi o tagata. Ae sa ma faia ni isi o faaiuga ae ou te le’i ma’i ma i le taimi foi na ou ma’i ai, lea na fesoasoani ia i ma’ua e fausia ai se mafutaga tumau. Afai o loo feagai oe ma lau uo ma tofotofoga a o tafafao faamasani, o nisi nei o mataupu faavae na fesoasoani ia ma’ua ma Gustavo atonu e mafai foi ona fesoasoani ia te oe.
Ia Faamanino Faamoemoega
Gustavo: I le ma tafaoga faamasani muamua, sa lisi ai e Claudiana nisi o mea taua sa ia manao ou te iloa e uiga ia te ia.
-
Sa le’i manao o ia e tafao faamasani tau lava ina ia i ai se uo tama. Sa manao o ia e su’e se tasi sa vaavaai mo se mafutaga lea e iu ina taitai atu ai i le faaipoipoga.
-
Sa manao o ia i se toalua na tutusa o la tulaga faatauaina ma talitonuga.
I le taimi lena, sa le o au o se tagata O Le Ekalesia a Iesu Keriso o le Au Paia o Aso e Gata Ai. Sa faamanino mai e Claudiana e faapea, e ui na te lei manao e faamalosia mai lana faatuatuaga ia te au, ae sa ia talitonu o le tutusa o tulaga faatauaina o le a taitai atu ai i se faaipoipoga e sili atu ona maloloina ma fiafia.
Claudiana: Sa ou popole nei manatu Gustavo ou te valea i le ta’u atu o nei mea ia te ia i le ma tafaoga faamasani muamua. Ae sa ou manao ia malamalama o ia i o’u faamoemoega ma o le a ou le faaaluina se taimi i se mafutaga e ono iu i le le fiafia. Sa faaaloalo Gustavo i o’u tulaga faatonuina ma sa ia fiafia i la’u faatuatuaga—ma ona o lenei mea, sa ou naunau ai e tuu atu ia te ia se avanoa. O le faamaninoina o o’u faamoemoega na mafai ai ona ma i ai i le itulau lava e tasi i le amataga o le ma mafutaga ma faamalosia ai la ma’ua tautinoga i le tasi ma le isi pe a oo mai taimi faigata.
Ia Lagolago ma le Faatuatua e le Tasi le Isi
Claudiana: I le taimi na sili ona tigaina ai lo’u ma’i, sa amata ona vaivai lo’u faatuatua. Sa ou manatu sa le o faafofoga mai le Tama Faalelagi i au tatalo, ma sa ou mafaufau po o le a se mea na ou faia ua oo mai ai lenei mafatiaga. I se tasi o suesuega i le falemai, sa ou matuai tigaina lava ma sa ou manatu o le a ou oti. I le taimi lea, sa ou fefe mo lo’u ola ma lo’u lumanai, ae sa fusi au e Gustavo ma faamanatu mai imea sa masani ona ou aoaoina ai o ia a o sailiili i le Ekalesia.
“O le taimi lenei e faataitai ai ona ola i aoaoga na,” na ia fai mai ai. “E tatau ona i ai lou faatuatua.”
Sa ou mafaufau i le Eteru 12:12: “Aua afai e leai se faatuatua i totonu o le fanauga a tagata e le mafai e le Atua ona faia se vavega i totonu o i latou; o le mea lea, na te le faaali mai o ia lava seia mavae ona latou faatuatua muamua.” Sa fesoasoani Gustavo ia te au e talitonu i se vavega—ana leai o ia, atonu ua leai so’u faamoemoe. Sa ia faamanatu mai ia te au le alofa e faavavau ma le mana gafatia o le Tama Faalelagi ma Iesu Keriso ma sa ou le i tua atu o a laua faamanuiaga folafolaina. Ou te faafetai e faavavau ona sa ia fesoasoani e faatumauina le ola o le afi o le faatuatua ia te au.
Sa le gata ina lagolagoina a’u e Gustavo (ma faaauau pea ona lagolago) a’u faaleagaga, ae sa ia lagolagoina foi a’u faalelagona. Ao o o’u ma’i, sa misi alofa tagata ia te au ma faanoanoa mo au ae sa le’i faapena Gustavo. Ioe, sa faalogo o ia i o’u popolega ma opo a’u pe a ou tagi, ae sa ia faamalosiau mai foi ia te a’u, sa ma tausua faatasi, ma ave au i fafo o le fale pe a ou faanoanoa. O Gustavo sa o se malamalama ia te au i lena taimi pogisa ma sa fesoasoani e tuu se talitonuga ia te au lava lea na aveesea e lou ma’i.
Afai o loo tauivi lau uo, fai mea o le a siitia ai i latou i luga. Faaali atu ia i latou e te alofa ia i latou. Lagolago i latou pe a latou fiafia ma pe a latou faanoanoa. Fesoasoani ia i latou e faamalolosia o latou sootaga ma le Tama Faalelagi ma Iesu Keriso. Sa faia e Gustavo nei mea. O lona talitonu o le a lelei mea uma ma le alofa na fesoasoani ia i ma’ua e fausia ai se mafutaga na tatalia ai lo’u ma’i.
Faamuamua Fesootaiga Lelei
Gustavo: O le gasegase o Claudiana e le na o le pau lea o le ma vaega faigata. A o ma tafafao faamasani, e i ai taimi ma te feeseesea’i ai. I se tasi aso sa tonu ai ia i maua e nonofo i lalo ma faia se talanoaga e uiga i mea sa ma faia na tiga ai pe le fiafia ai le isi.
O lenei talanoaga sa faia ai se eseesega tele ona sa oo ina ma nofouta i amioga ma te le’i iloaina sa aafia ai le ma fesootaiga. E le mafai ona faitau le mafaufau o le isi tagata, o lea sa taua ai le faamaoni i le mea sa aogā ma mea sa lei aogā i le ma mafutaga. A o faaauau pea ona ma faailoa atu ma Claudiana o ma manaoga i le tasi ma le isi ma ole atu i le Tama Faalelagi mo se fesoasoani i le faatoilaloina o o ma vaivaiga (tagai i le Eteru 12:27), sa mafai ona ma faatautaia lelei ia feteenaiga ma feeseeseaiga.
Piliki i le Piliki
Claudiana ma Gustavo: I le avea ai ma tagata o le Ekalesia, e mafai ona faigofie ona faamoemoe o le a ta’u mai e le Atua ia i tatou le tagata tonu e faaipoipo i ai ona tuu mai lea ia i tatou se mafutaga atoatoa. O le mea moni, e ui e mafai e le Tama Faalelagi ona faia “mea uma ia galulue faatasi mo le lelei ia i latou o e alolofa ia te [Ia]” (Roma 8:28), Na te faatauaina tele lo tatou faitalia e faia ai nei faaiuga mo i tatou.
Na aoao mai Peresitene Dieter F. Uchtdorf, i le taimi a’o avea ma Fesoasoani Lua i le Au Peresitene Sili:
“O faaipoipoga maoae e fausia i lea piliki ma lea piliki, i lea aso ma lea aso, i le olaga atoa.
“Ma o se tala fiafia lena.
“Ona e tusa lava po o le a le ‘folasi o lau mafutaga o i ai i lenei taimi, ae a e faaauau pea ona faaopoopo i ai maamaa o le agalelei, agaalofa, faalogo, ositaulaga, malamalama, ma le le manatu faapito e mulimuli ane o le a amata ona tupu ae se faavae malosi.
“Afai e foliga mai o le a umi lava o fai, manatua: o faaipoipoga fiafia ua faamoemoe ia tumau e faavavau!”1
Afai o loo e i ai i se mafutaga ma se tasi o loo feagai ma ni atugaluga ogaoga faalesoifua maloloina po o isi tauiviga e ono aafia ai lou lumanai, talitonu i le mana o le Atua e fesoasoani mai. Ia fefautuaa’i ma le agaga tatalo faatasi ma Ia ma saili faaaliga mo ou tulaga ese ia iloa ai pe faapefea ona agai i luma. A o e faaaofia ai le Tama Faalelagi ma Iesu Keriso i lau mafutaga, tausi au feagaiga, taulai atu i ou tulaga faatauaina tutusa, lagolago e le tasi le isi, ma faamuamua fesootaiga lelei, e mafai foi ona e fausia se alofa e tumau.