O Leo o le Au Paia o Aso e Gata Ai

Sa Le’i Tuua A’u e Lē Faamafanafanaina

Saunia e Caroline May, Utah, ISA

Sa ou aoaoina o le tatalo e mafai ona avea ma se tasi o a tatou punaoa silisili.

Ata na tusia e Stephanie Hock

Sa ma tatalo ma lo’u toalua mo se isi pepe ae ma te lei iloaina o loo ma faatalitali. O le “fiafia” e faigata ona faamatalaina ai o ma’ua lagona. E faaopoopo i lo ma fiafia o le tala fou e faapea, o le pepe a se uo sa fanau i le aso na muamua atu ia te a’u, ma o le pepe a lo’u uso faaletulafono sa fanau i le fa aso mulimuli ane. Toetoe lava o le taimi lava lena, sa amata ai ona ma fuafuaina aso e taaalo ai.

Peitai, e iva vaiaso i lo’u maitaga, sa amata ai ona ou ma’ilili. I le fefe tele, sa ma faanatinati atu ai ma lo’u toalua i le falemai mo se faa’ata. I lo’u taimi faatulagaina, sa ou tilotilo atu ma le naunautai i le masini ma fesili atu i le tagata enisinia pe o manuia la’u pepe. Na te lei tali mai a o ia liliueseina le masini mai ia te a’u.

Ou te lei manao e faamoemoeina se mea e sili ona leaga, ae ina ua tuua e le tagata enisinia le potu, sa faagateteina a’u e le fefe. Sa amata ona ou tatalo i se auala ou te lei iloaina lava e mafai ona ou ole atu ai mo se mea—soo se mea—e mafai ona aumaia ia te au le filemu.

O le taimi lava lena, sa fusia ai au i se opo mafanafana ma faalogoina ai le “leo itiiti ma le filemu” (1 Tupu 19:12) ua faamautinoa mai ia te au o le a lelei mea uma. Sa ou lagona le mafanafana ma le toafimalie a o ou faatalitali mo le fomai e tuuina mai ia te au ni tali.

Ina ua taunuu mai le fomai, sa ia ta’u lemu mai ia i maua ma lo’u toalua ua maliu le ma pepe. O le taimi lava lena, sa ou toe lagonaina ai le opo mafanafana a le Agaga. Sa ou tigā, ae sa le mafai ona ou masalosalo i le lagona na faamafanafanaina ai a’u.

A o ou faanoanoa i vaiaso na sosoo ai, sa ou liliu atu i lo’u Tama Faalelagi i le tatalo e le aunoa. E lei aluese lava le faamautinoaga toafimalie a le Agaga Paia, ma sa ou iloaina sa leoleoina au e le Alii. Sa ou maua se malamalama loloto atu i le Togiola a Iesu Keriso a o ou lagonaina le pulupasama faamalolo a le Faaola. I aso na ou lagona ai ua le mafai ona ou gaioi, sa mafai ona ou lagonaina lima agelu o sapasapaia au i luga.

Sa ma tatalo ma lo’u toalua mo se faamafanafanaga faifai pea. Sa ma faanoanoa pea, ae e leai se tasi o i ma’ua na masalosalo e ala i Lana Togiola, e mafai ai e le Faaola ona ufitia o ma tigā ma le toesea.

O lenei aafiaga sa matuai faigata lava. E i ai taimi sa toetoe lava a faigata tele ona onosaia. Ae ou te faafetai e faavavau mo le sootaga na ou atiina ae ma lou Tama Faalelagi ma lou Faaola e ala i lenei aafiaga. O le tatalo e mafai ona avea ma se tasi o a tatou punaoa silisili.

Ou te iloa e popole moni lava le Tama Faalelagi mo Ana fanau ma o Ia ma Lona Alo o le a “lē tuua [i tatou] o mātuaoti” (Ioane 14:18).