E Na’o Tusiga Faatekinolosi

Talia le Mana Faamalolo o le Salamo ma le Faamagaloga

Saunia e Elder Ulisses Soares

O Le Korama a Aposetolo e Toasefululua

Mai lana saunoaga i le faigalotu, “Ole Atu, Saili, ma Tuitui: O Se Mamanu Agaalofa,” na tuuina atu i le Iunivesite o Polika Iaga–Hawaii i le aso 29 Ian. 2023. Mo le saunoaga atoa, asiasi i le speeches.byu.edu.

Saili tali i fesili e tolu e uiga i le salamo ma le faamagaloga.

o se alii o loo tatalo ma vaai atu ma le faamoemoe

I ni nai masina talu ai, sa ou valaaulia ai tamaiti aoga o le BYU–Hawaii e auina atu i se Aposetolo se fesili e sili ona latou popole ai i le avea ai o se soo o Iesu Keriso. Sa ou faavasegaina fesili i ni autu talitutusa. O se tasi o na vaega e faatatau i le salamo ma le faamagaloina o a tatou agasala, lagonaina le agavaa e ai ma inu i le faamanatuga, ma lagonaina le alofa o le Atua mo i tatou tusa lava pe tatou te lagonaina le le agavaa. Ou te fia talanoaina lena autu iinei.

Pe mafai ea e le Atua ona alofa pea ia te a’u e tusa lava pe ua ou agasala?

E mataina le matau e faapea, o le mataupu faavae o le salamo e oo mai pe a mavae le faatuatua ia Iesu Keriso. Ia, e tatau ona ou ta’u atu ia te outou e alofa le Atua ia i tatou, e tusa lava pe ua tatou oo i leloloto o le agasala. E faamagaloina i tatou pe a tatou faamaualaloina i tatou lava i luma o le Atua, fefautuaai ma taitai tatau ai o le Ekalesia pe a manaomia, ma salamo ma lafoai a tatou agasala. O le faia o nei laasaga e faalatalata atili atu ai tatou i le Faaola, o Lē e mafai ona faasaolotoina tatou mai le tausalaina, faanoanoa, ma le pologa faaleagaga ma faaletino.

Aisea Ou te Lagona ai Pea le Tausalaina Tusa Lava Pe Ua Uma Ona Ou Salamo?

Tatou te le iloa pe aisea tatou te faaauau ai pea ona lagona le tausalaina i nisi o taimi e tusa lava pe ua uma ona tatou salamo mo agasala ua tatou faia. Nai lo le taumatemate, talanoa i lo tatou Tama Faalelagi e uiga i ai. Fai sa’o atu ia te Ia le fesili lea. Ou te iloa i le aluga o taimi, o le a Ia faaali atu ia te oe le mea e te manaomia. I lo’u tulaga, o loo i ai pea ni manatuaga o nisi o a’u mea sese ua tuanai. A o ou tatalo e uiga i ai, sa ta’u mai e le Alii ia te au ua faamagaloina au, ma e le tatau ona ou toe popole i na mea. Peitai, ou te lagona foi o na manatuaga o se lapataiga mo au e taumafai ai e aua nei toe pa’u atu i na mea sese.

O lea la, e le o se mea le lelei le i ai o na manatuaga. Ou te vaai ia i latou i lo’u olaga o se faaaliga o le alofa o le Atua mo a’u a o Ia lapataia pea a’u ia aloese mai le toe uia o lena ala. A o faaauau pea ona tatou taumafai e faia le mea sili tatou te mafaia, o le faaalia e ala i a tatou galuega le manao e faamama totonu o le ipu (tagai i le Alema 60:23), o lagona o le tausalaina ma le lotovaivai e foliga mai ua aluese. I se taimi, o lo tatou aafiaga e mafai ona faapei o Alema, o lē na molimau mai ina ua uma ona salamo “e mafai lava ona ia manatua ana agasala, ae o le manatuaina o ana agasala e le toe faanoanoa ma faatigaina o ia, aua sa ia iloa ua faamagaloina o ia.”¹

E Mafai Faapefea Ona Ou Faamagalo Atu i Isi O E Na Faatiga ia te A’u?

O se popolega mataina na faailoa mai e ala i fesili na auina mai e faatatau i le faamagaloina o i latou o e na faatiga mai ia i tatou ma faia mea leaga ia i tatou.

Ia, o se fesili manaia lenei. Sei o tatou taulai atu i nisi o mataupu faavae ma vaai pe mafai faapefea ona tatou faaaogaina. A o tatou suesue i le afioga a le Atua, ua tatou aoao ai o le faamagalo atu i isi e aumaia ai faamanuiaga maoae faaleagaga, e aofia ai le filemu ma le faamoemoe. Atonu o le faamanuiaga aupito sili ona taua o le, a tatou faamagalo atu i isi, e mafai foi ona faamagaloina i tatou i a tatou lava agasala. Ua aoao mai i tatou e le Alii e faapea o le faamagaloga o se poloaiga aoao ma ua “manaomia i tatou e faamagalo atu i tagata uma” (Mataupu Faavae ma Feagaiga 64:10). Peitai, atonu e faigata pea.

O nisi taimi tatou te faatagaina ai le faamaualuga, fefe, le fiafia, po o le lototiga e faalotovaivaia ai i tatou ma poloka ai lo tatou tomai e lagona ai le faamoemoe. Ae o le lototele e faamagalo atu e oo mai ia i latou o e tuu atu lo latou faatuatua ma le faalagolago i le Alii. Faatasi ai ma Lana fesoasoani, e mafai ai ona tatou maua le malosi e faamagalo atu ai i isi, pe na faia e le tagata sese se agasala matuia po o se solitulafono e lei faamoemoeina. O le faamagalo atu o lona uiga o le lafoai o le tuuaia mo se tiga ua tuanai. O le faamatuu ese foi lea o se avega tele. O le agai i luma i le olaga.

E faatatau i le faagalo, e taua le manatua faapea “o le faamagalo atu e le faapea o le galo o le solitulafono na tupu pe faafoliga e lei tupu lava. E le faapea o lona uiga o lou faatagaina o le [amioga faatiga] e faaauau pea. E le faapea e mafai ona faamaloloina mafutaga uma lava. Ma e le faapea o le a le tali atu le tagata agasala mo ana mea sa fai. O lona uiga e mafai ona fesoasoani le Faaola ia te oe e faateaese [lagona tiga].”²

O ni nai fautuaga nei e fesoasoani ai i lenei faagasologa:

Tatalo mo le lotomaualalo. O le lotomaualalo o le faafeagai lea o le faamaualuga, o le faafitauli autu lea i la tatou taumafaiga e faamagalo atu. O le faamaualuga e taitai atu ai i tatou e taulai atu i lagona o le ita i isi. E mafua ai foi ona tatou le aloese mai o tatou lava vaivaiga, mea sese, ma agasala. Ae na tautino mai e le Alii, “Afai latou te faalotomaualaloina i latou lava i ou luma, ma faatuatua mai ia te au, ona Ou faia lea o mea vaivai ia avea ma mea malolosi ia te i latou” (Eteru 12:27). E tusa ai ma lo tatou lotomaualalo ma le faatuatua, o le a fesoasoani le Alii ia i tatou ia avea atili e faapei o Ia ma faamagalo moni atu e pei ona Ia faia.
Faaali atu le agaga faafetai. O le faaalia o le lotofaafetai e valaaulia atoatoa atili ai le Agaga i o tatou olaga, lea e mafai ona faamaluluina ma suia ai o tatou loto. Manatu i le teuina o se api talaaga o ni mea e te faafetai ai. Vaavaai mo faaaliga o le alofa o le Atua i aso taitasi. A o e atiina ae se uiga faaalia o le lotofaafetai, atonu e te iloaina e mafai foi ona e faailoa maia mafuaaga e faafetai ai mo ou tofotofoga.
Ia onosai. O le faamagalo atu pe a e i ai i se tiga tele e ono umi se taimi e alu ai. O se tamaitai na toe manuia mai se teteaga tiga na mauaina lenei fautuaga atamai mai lona epikopo: “Ia i ai se nofoaga i lou loto mo le faamagaloga, ma a oo mai, ia talia i totonu.” E mafai ona e faia se avanoa mo le faamagaloga e ala i le tatalo faatauanau, suesue, ma mafaufau i ai. O le taumamafa fiafia i afioga a Keriso i aso taitasi o le a fesoasoani foi ia te oe e faalatalata atili atu ai ia te Ia ma o le a aumaia ai le mana faamalolo tele i lou olaga (tagai i le i le 2 Nifae 31:20; Iakopo 2:8).
Faagalo le tuanai. O le mea na tupu na tupu ma e le mafai ona suia. Ae e mafai ona e taulai atu lou malosi i le asō; aua o le asō, ua ia te oe le mana e filifili ai e faamagalo atu. Lafo lau avega i le Alii. Na augani mai Keriso “Ia outou o mai ia te au, o outou uma o e tigaina ma mafatia i avega, o a’u foi e malolo ai outou” (Mataio 11:28). Manatua e le gata i le tauaveina i Ona luga o agasala a le lalolagi, ae sa tauave foi e Keriso i Ona luga o tatou tiga ma vaivaiga (tagai i le 2 Nifae 9:21; Alema 7:11–12; Mataupu Faavae ma Feagaiga 18:11). Afai e te faatagaina o Ia, e mafai ona Ia faamāmāina lau avega.

O le mauaina o le malosi e faamagalo atu ai e mafai ona luitauina, ae o le Faaola ma Lana Togiola ua mafai ai. O le mea moni, a o tatala o tatou loto e faamagalo atu i isi, o le a faamanuiaina i tatou i le filemu. Ou te valaaulia outou e talia le mana faamalolo o le faamagaloga.