Aisea Tatou Te Auauna Atu Ai?

Saunia e Christy Monson

Ua faasoa mai e tagata o le ekalesia le auala e fesoasoani ai auaunaga ia i tatou ia tuputupu ae, faalogo i le Agaga, ma avea ma se meafaigaluega i aao o le Alii i le faamanuiaina o olaga o isi.

Pe ua e tu ea e fesili ifo ia te oe lava pe aisea e te auauna atu ai? E faigofie ona taula’i atu i le mea e tasi i le pisi o le olaga ma auaunaga i le Ekalesia, ae pe o i ai ea se uiga loloto atu i a tatou amioga i aso taitasi? O le auauna atu e aoao ai i tatou e uiga ia i tatou lava. Afai tatou te faalogo i le Agaga, e mafai ona tatou sailiili i lo tatou gafatia e alolofa atu ai ma avea ma ni tagata e sili atu ona agaalofa. E aoaoina i tatou e le Agaga a o tatou auauna atu, ma faaogatusa atili ai i tatou lava ma isi.

Ua faasoa mai e tagata nei o le ekalesia mea na latou aoaoina e ala i le auauna atu.

Ata pue mai faaaloaloga a tusitala

E Taiala e le Agaga La Tatou Auaunaga

Sa ma faamaeaina uma fomu mo se misiona talai a o lei tapunia le lalolagi i le KOVITI-19. Ma te lei mananao e o atu i le misiona ma toe auina atu i le fale, o lea sa matou feiloai ai ma lo matou peresitene o le siteki ma le peresitene o le Misiona a Arcadia Kalefonia, lea sa matou nonofo ai, e vaai pe mafai ona ma auauna atu i le lotoifale. Sa vave ona valaauina i maua e avea ma taitai faamaopoopo o fale.

I ni nai vaiaso talu ona ma amata, na toe foi mai ai le anoanoa’i o faifeautalai mai le salafa o le lalolagi, a le o le faamaloloina mai a latou misiona pe o le toe tofia i le Iunaite Setete. O le aofai o faifeautalai faamisiona i le misiona a Arcadia na faatupulaia mai le 180 i le 250. Sa matou pisi e sue ni fale mo tagata uma, ae sa taialaina i matou e le Agaga.

O aafiaga o le olaga e foliga mai e taitaia e le Alii e saunia ai i tatou mo avanoa auauna atu. Ona o le Aualofa, sa ou iloa ai tuafafine i siteki lata ane o e e mafai ona fesoasoani i taumafataga mo konafesi faalesone. Ina ua oo mai se teineitiiti e leai se aiga i fasitepu o le ofisa o le misiona, sa ou iloaina punaoa i le lotoifale e mafai ona tuuina atu ai ia te ia le fesoasoani. O lo’u toalua, o Mika, sa i ai foi ni fesootaiga i le eria e saili ai ni fofo i ni faafitauli e foliga mai e le mafai ona foia, mai le sailia o ni vai taele mo papatisoga i fafo e oo lava i le faaleleia o masini fufulu ipu.

Ma te auauna atu ma Mika ona sa ma folafola atu e tuuto atu o ma taimi ma taleni i Le Ekalesia a Iesu Keriso o le Au Paia o Aso e Gata Ai. O se faamanuiaga le alofa i a matou faifeautalai e 250, ma e ma te faafetai mo le avanoa. O le auauna atu ua ma latalata atili ai ia Keriso (tagai Moronae 7:44–48).

Debra ma Mika O’Neil, Kalefonia, ISA

O Auaunaga i Talafaasolopito o Aiga ma le Malumalu e Aumaia ia i Tatou le Olioli

A o lei faapaiaina le Malumalu o Rio de Janeiro Pasila i le 2022, sa mananao la matou Aualofa e fesoasoani i aiga ia saunia igoa mo le tatalaina. E ala i fonotaga patino ma lesona i luga o le initoneti, sa matou fesoasoani ai i tagata uma e saili ni tuaa.

O lo’u olioli sili o le vaaia lea o aiga taitasi o saunia mo le malumalu. Sa faatumulia lo’u agaga i le alofa mo le Faaola ma le lotofaafetai ina ua mafai ona fesoasoani i isi e fesootai i o latou aiga e ala i sauniga o le malumalu.

Izabel de Queiroz Martins Silva, Rio de Janeiro, Pasila

O Le Auauna Atu e Faamanuiaina ai i Latou e Le Tagolima

Sa ma auauna atu talu ai nei o ni faifeautalai mo sootaga faavaomalo, sa galulue ma ni malo mai fafo i Malo Aufaatasi. Sa ma lagonaina le faamanuiaina ma le lotomaualalo e feiloai atu i le toatele o tagata alolofa, ma agaalofa mai le salafa o le lalolagi o loo saili e auauna atu i o latou tagatanuu.

Sa matou maua le avanoa e faasoa atu ai tupe o le Masini o le Faamalamalama le Lalolagi i tagata na faamanuiaina i le lalolagi atoa, e ala i le UNICEF ma le CARE (Cooperative for Assistance and Relief Everywhere).

Sa mafai ona ma lagonaina le Agaga a o ma ta’u atu i taitai o loo auauna atu le tama teine a lo ma afafine i se misiona i Kuatemala ma sa fesoasoani e tiliva atu moa, na faatauina e ala i le Masini Foai, ia i latou sa manaomia le fesoasoani. Oka o se faamanuiaga le iloa sa maua e aiga ni fuamoa e aai ai pe faatau atu e tusa ai ma lo latou mana’o.

Brent ma Julie Hill, Niu Ioka, ISA

Na saunoa mai Elder Dieter F. Uchtdorf o le Korama a Aposetolo e Toasefululua e faapea, “ua valaaulia i tatou e le Alii e avea ma Ona aao, ia o atu ma faia mea lelei.”¹ O se faamanuiaga mo i tatou le auauna atu mo le Faaola. A o tatou mafaufau loloto i le uiga o la tatou auaunaga, o le a taitai atu i tatou e le malamalama o le Faaola i se malamalama sili atu o Lona alofa.

E alala le tusitala i Iuta, ISA.