Savali Faaleautaitai i le Eria
“Na Fai Faatasi”
I le tusa o le toeitiiti 40 tausaga o se molimau faapitoa a le Alii, e faasoa ai pea e Peresitene Russell M. Nelson lana molimau tumau ma le le maluelue i Le Togiola a Iesu Keriso. O iinei tatou te toeiloilo ai nisi o ana savali mamana e uiga i le taulaga silisili a le Faaola.
Malamalama i le Fuafuaga o le Faaolataga
“Ae tatou te le’i malamalama i le Togiola a Keriso . . . e tatau ona tatou malamalama muamua i le Pa’u o Atamu, e tatau ona tatou malamalama muamua i le Foafoaga. O nei vaega taua e tolu o le fuafuaga o le faaolataga e fesootai le tasi ma le isi”
I lana saunoaga1 o le Konafesi Aoao ia Aperila 1996, na faamatala mai ai e Elder Nelson:
“Na taualuga le Foafoaga ia Atamu ma Eva i le Faatoaga o Etena . . . [O] se foafoaga faaparataiso, lea e manaomia ai se suiga taua ae la’ua te lei faataunuuina le poloaiga ia maua ni fanau ma faapea ona saunia ni tino faalelalolagi mo atalii ma afafine agaga o le Atua i le muai olaga.
“O le Pa’u o Atamu (ma Eva) na fausia ai le foafoaga faaletino ma aumaia ai suiga manaomia i o la’ua tino, e aofia ai le fetafeai o le toto ma isi foi suiga. Ua la mafai nei ona maua ni fanau. O i la’ua ma a la fanau ua afaina foi i manuaga, faamai, ma le oti.
“Faanofovaavaaia, fanauina, ma le matua o vaega uma ia—ma o le oti faaletino sa alagatatau i le—fuafuaga tele o le fiafia a le Atua.’2
“Ae o le olaga faaletino, mamalu e pei ona i ai, sa lei avea lava ma sini autu o le fuafuaga a le Atua. O le ola ma le oti iinei i le paneta Lalolagi ua na o se uiga o le iuga.”
I le upusii mai ia Paulo, sa faaauau Elder Nelson:
“‘Aua faapei ona oti uma ia Atamu, e faapea foi ona faaolaina uma ia Keriso.’3
“O le Togiola a Iesu Keriso ua avea ma foafoaga ola pea. Sa ia ofo mai e faamalieina ai faamoemoega o le tulafono na solia muamua.4 Ma i le faamaligiina o Lona toto, O Lona5 ma o tatou tino faaletino e mafai ona faaatoatoaina. . . . Na aoao mai Paulo e faapea “e le mafaia ona avea o le malo o le Atua ma tofi o i latou ua i ai tino o aano ma toto; . . . e tatau ona ofu lenei tino iu vale i le tino ola pea.”6
O le Misiona Matagofie a Iesu Keriso
Sa saunoa atu Elder Nelson i se faigalotu a le BYU7 i nai tausaga mulimuli ane sa ia faaalia ai lona agaga faafetai e faavavau mo le meaalofa lea ua na o lo tatou Faaola o Iesu Keriso e mafai ona ofoina mai.
“I se taimi puupuu na Ia iai i le olaga nei, na ausia ai e le Faaola ni sini autu se lua: O le tasi o lana galuega ma [lona] mamalu—ia aumaia le tino ola pea ma le ola e faavavau o le tagata.’
“… [o lenei sini] tatou te iloa o le Togiola.
“O lena misiona sa faapitoa lava mo Ia. Na soifua mai i se tina faaletino ma se Tama ola pea, ua na o Ia lava e mafai ona tuuina atu lona ola ma toe aumai ai.8 O le taunuuga mamalu o lana Togiola e le gata ma e faavavau. Sa Ia aveesea le tui o le oti ma faia ia le tumau le faanoanoa o le tuugamau.9 O Lana tiutetauave mo le Togiola sa iloa lava a o lei oo i le Foafoaga ma le Pa’u. E le gata ina ia saunia mo le toetu ma le tino ola pea o tagata ola uma, ae sa faaagavaaina i tatou ina ia faamagaloina mai ia tatou agasala—i luga o tuutuuga na Ia faavaeina. Ma o lana Togiola na tatalaina ai le ala e mafai ai ona tatou faatasia ma Ia ma o tatou aiga e faavavau. O lenei faamoemoe sa tatou manatu iai o le ola e faavavau—o le meaalofa silisili a le Atua i le tagata.10
“E leai se tasi e mafai ona faia le Togiola. E leai se isi tagata, e tusa lava poo le a le tamaoaiga ma le mana silisili, ona laveai se agaga se toatasi—e oo lava i lona agaga.11 Ma e leai se isi tagata o le a manaomia pe faatagaina e faamasaaina le toto mo le faaolataga e faavavau o se tasi tagata soifua. Sa faia e Iesu “faa-tasi mo tagata uma.”12
O se Tala Fou Maoa’e o le Fuafuaga a le Atua
I le auauna ai nei o se perofeta, tagata vaai ma se talifaaaliga mo o tatou taimi, o le molimau mamana a Peresitene Nelson ia Iesu Keriso e le faavaivai. Sa ia saunoa i le Konafesi Aoao ia Oketopa 202313 a o toe malosi mai ai i se manua i lona papatua.
“A o ou tauivi ma le tiga matuitui na mafua ona o lo’u manuaga talu ai nei, sa ou lagona loloto atili ai le talisapaiaina o Iesu Keriso ma le meaalofa lemafaamatalaina o Lana Togiola. Mafaufau iai! Sa puapuaga le Faaola i “tiga ma mafatiaga ma faaosoosoga o ituaiga uma”14 ina ia mafai ona Ia faamafanafana i tatou, faamalolo i tatou, laveai i tatou i taimi e manaomia ai.15 Sa faamatala e Iesu Keriso Lona aafiaga i Ketesemane ma Kalevario: “O le mafatia lea na oo ai ia te au lava, o le Atua lava lea, o le ua silisili i tagata uma, le gatete ona o le tiga, ma tafe toto ai i pu afu uma.”16 O lo’u manu’aga na mafua ai ona ou toe mafaufau pea lava pea “le silisiliese o le Paia e Toatasi o Isaraelu.”17 I le gasologa o lo’u faamalologa, sa faailoa mai e le Alii Lona mana paia i ni auala filemu ma le le mafaaseseina.
“Ona o le Togiola le i’u a Iesu Keriso, o le fuafuaga a lo tatou Tama Faalelagi o se fuafuaga atoatoa! O se malamalamaaga i le fuafuaga ofoofogia a le Atua ua aveesea ai le mealilo mai i o tatou olaga ma masalosaloga ma lemautonu mai lo tatou lumanai. Ua faataga ai i tatou taitoatasi e filifili pe faapefea ona tatou ola iinei i le lalolagi ma pe o fea o le a tatou ola ai e faavavau.”
Sa folafola mai e Peresitene Nelson o le a tatou maua le malosi ma le filemu i lo tatou lalolagi vevesi pe afai tatou te aoao e ‘mafaufau faaselesitila’, ia manatu faaleagaga ma ola i le auala lea e faaagavaaina ai mo faamanuiaga o le faavavau.
“O lea la, o’u uso e ma tuafafine pele,” ua ia aioi atu, “e faapefea ma o fea ma o ai foi e te manao e te ola faavavau ai? O oe e filifili.
“Pe a e faia ni filifiliga, ou te valaaulia oe ia faia se vaaiga umi—o se vaaiga e faavavau. Ia faamuamua Iesu Keriso ona o lou ola e faavavau e faalagolago i lou faatuatua ia te Ia ma i Lana Togiola.18 E faalagolago foi i lou usiusitai i Ana tulafono. E saunia e le usiusitai le ala mo le olaga fiafia mo oe i le taimi nei ma se taui mamalu e faavavau a taeao.”