Ua Na’o Tusiga Faatekinolosi: Talavou Matutua
Tafaoga Faamasani faatasi ma se Fuafuaga ma se Faamoemoega
O ni nai mea ua ou aoaoina e mafai ona faafaigofie ai ou aafiaga i tafaoga faamasani ma faaitiitia ai le atuatuvale.
Tafaoga Faamasani. Tau lava o le fai atu o le upu e mafai ona aumaia ai ni tali eseese: o se ataata, o se faanonou, o se faataavaleina o polo o mata (sei tulou), o lagona popole, ma e oo lava i le faafaufau. E manino lava, o tafaoga faamasani e le tutusa aafiaga o tagata uma. Ua ou faalogo i talavou matutua o tafafao faamasani o se olioli, se tiga, se malaga, se taunuuga, se faalavelave, ma se manumalo. Sa ou talanoa talu ai nei ma se tamaitai talavou o lē, faatasi ai ma se ataata tagi, sa faasino i lona olaga tafao faamasani o se “e le o iai.”
I le mavae ai o le silia ma le sefululua tausaga o le aoaoina o vasega sauniuni a talavou matutua mo faaipoipoga, ua ou maua ai ni upu se lua e aotele ai le aafiaga mo le toatele: faigata ma lavelave.
I se isi itu, ua ou vaai i ni nai mataupu faavae ua malamalama lelei i ai, e mafai ona faafaigofie ai le aafiaga o tafaoga faamasani ma faaitiitia ai le atuatuvale. E amata uma lava i se malamalama mausali i le faamoemoega o le Atua mo le faaipoipoga ma le matafaioi e mafai ona faia e tafaoga faamasani i le faataatiaina o le faavae mo se faaipoipoga faamanuiaina.
O Le Faamoemoega o le Atua mo le Faaipoipoga
Atonu e faigata ona fai atu leotele, ae o le manatu lautele o le tafao faamasani o se talavou matua e faapea, e taitai atu ai i le faaipoipoga—pe tatou te faamoemoe foi i ai. O le faaipoipoga i le va o se alii ma se tamaitai, i se isi itu, e taitai atu ai i tatou ia avea atili e faapei o o tatou matua faalelagi—i le i ai o so tatou lava aiga.
Ua ou faalogo i le toatele o talavou matutua o fai mai o le manatu o le faaipoipo e taufaafefe aua ua latou iloa le toatele naua o tagata e lei iu lelei a latou faaipoipoga. Ou te iloa o se mea moni faanoanoa lenei. Ae o le tumau i le faaipoipoina e mafai ona faaitiitia ai le petipetiga lea tatou te faamoemoe i ai ae ia matele i se fuafuaga tatou te faatinoina. Ma o le faateleina o lo tatou malamalama i le ata o le faaolataga, o le tele foi lena o lo tatou malamalama i le matafaioi o le faaipoipoga i totonu o lena fuafuaga.
E pei na aoao mai Elder Gary E. Stevenson o le Korama a Aposetolo e Toasefululua:
“E malamalama Satani o le aiga e totonugalemu i le fuafuaga o le fiafia a le Alii. … O loo ia taumafai e lulu fatu pogisa o le fefe i lou loto, soo se mea e taofia ai oe mai aafiaga o le vaega aupito mamalu ma tauia o le olaga faaletino: o le paia ma le fiafia susulu lea e sau mai le mauaina o se paaga e faavavau ma le aumaia o fanau a le Tama Faalelagi i lenei lalolagi.
“A o e feagai ma le faaiuga e amata lou lava aiga e faavavau, aua e te faatali ona ua e fefe. Manatua le mau, ‘Aua e te matau, tau lava ina e faatuatua’ [Mareko 5:36]. O la’u faaipoipoga ma le aiga o … se faaaliga patino moni lava o le fuafuaga sili o le fiafia mo au. Ou te folafola atu ia te outou e mafai foi ona moni lena mea mo oe. O le taulai atu i le malamalama fiafia lea e aumaia e le olaga faaleaiga e tulia ese ai le fefe.”1
Ina ia avea ma tagata e uunaia tafaoga faamasani, e tatau ona tatou vaai i le faaipoipoga e sili atu nai lo o se poloaiga; e manaomia ona tatou taliaina le upumoni e mafai ona avea ai le faaipoipoga, ma o se vaega matagofie, ma le olioli o le fuafuaga a le Tama Faalelagi mo Ana fanau. O le i ai o se paaga e te alofa i ai ma se aiga e te faatauaina, e taitai atu ai i le olioli silisili o le olaga nei ma le faavavau. Afai e leai, semanu e le taitaiina i tatou e le Tama Faalelagi i lalo o lena ala. Na aoao mai Peresitene Russell M. Nelson, “O le folafolaga i le aiga e fesoasoani tatou te iloa ai o le faaipoipoga faaselesitila e aumaia ai avanoa sili atu mo le fiafia nai lo se isi lava sootaga.”2
Tafao Faamasani Sa’o e oo i le Faaipoipo Sa’o
Sa aoao mai Peresitene Spencer W. Kimball (1895–1985) i se tasi taimi e faapea, ina ia faaipoipo sa’o e tatau ona tatou tafafao faamasani sa’o.3 E mafai ona foliga mai e faigofie atu lena tala nai lo le faia. Na tuuina mai e Peresitene Thomas S. Monson (1927–2018) se taitaiga taua i alii talavou matutua o le Ekalesia e uiga i le mataupu: “Saili se tasi e mafai ona oulua galulue tutusa.”4
Puupuu ma faigofie, ae matua loloto lava.
Ae e faapefea ona tatou maua sea tagata? Ae e faapefea ona tatou iloa tatou te tutusa?
Mo le toetoe lava o tagata uma, o le sailia o se tasi e manaomia ai le tafao faamasani. O lena tafaoga faamasani e tatau ona i ai se faamoemoega ma anoa. O le mea e lelei ai, o le ituaiga o tafaoga faamasani lea e fesoasoani tatou te tofotofoina ai le galulue tutusa. O tafaoga faamasani foi tatou te maua ai se avanoa e aoao ai tomai—ioe, o tomai—o le fatuina o se mafutaga anoa.
Muamua, o le luitau aupito tele—o le mauaina o se tasi e tafao faamasani i ai. O se tusiga atoa lava e mafai ona tuuto atu i lenei autu, ae sei ou fautuaina atu ni upu faigofie: “Ina faateleina le o e tafafao, ma atili o ese e [tafafao].” I soo se tasi e fia tafao faamasani atili ma faamasani atili i isi tagata, ou te fautuaina le auai ma o e tafafao. E ono alu ai ni taumafaiga e sue ni nofoaga ma ou ituaiga o tagata, ae o le aafiaga o le a aoga lava.
O se tasi o valoaga aupito sili ona maoae o le tutusa o paaga faaipoipo o le tutusa lea o mea e fiafia i ai. A o e alu i gaoioiga ma nofoaga e te fiafia i ai, o le a e maua ai isi e tutusa mea latou te fiafia i ai ma oe. E aoga i taimi uma le manatua o le feiloai atu i se tasi e manaomia ai le feiloai i se isi.
Fetaui [Tutusa] Lelei: O Se Faagasologa e Lua Laasaga
Mafaufau i tafaoga faamasani e suesue ai le tutusa lelei o se faagasologa e lua laasaga. Muamua, a o amata ona e tafao faamasani, taumafai e tafao faamasani i ni tagata eseese. O le iloaina o ni uiga eseese o le a fesoasoani ia te oe e aoao ai po o le a le ituaiga o tagata e te fesootai lelei i ai ma mea e vaavaai i ai i se uo. O se tasi lea o mafuaaga ua fautuaina ai e perofeta ia tupulaga talavou ina ia aloese mai mafutaga tamau seia oo ina latou matutua atu ae ia “atiae ni faauoga lelei ma ni tagata toatele.”5
O le tafao faamasani i ni tagata eseese e mafai ona luitauina. E le o tagata uma e i ai le avanoa po o le filifiliga o le alu i ni tafaoga faamasani faasamasamanoa. Ma o loo i ai foi le tulaga matautia o le soona naunau ia maua le tagata atoatoa ona tutusa lele.
O le mea e faafetai ai, e te le manaomia ona e tafao faamasani “aloaia” i ni tagagata se toatele e aoao ai ni mea se tele. O le toatele o i tatou e maua le avanoa e fegalegaleai ai ma alii ma tamaitai eseese i aso uma. Afai tatou te atamamai, e mafai ona tatou faaaogaina na sootaga e faailoa ai uiga tatou te mananao e vaavaai i ai i se toalua.
Lona lua, a amata ona e tafao faamasani tumau i se tasi, ia o ni tafaoga faamasani eseese. O le tele o taimi, ou te vaai ai i ulugalii o faaalu uma a latou tafaoga faamasani i luga o se nofoa e matamata ai i ata o le TV e sili ona fiafia i ai, ma mulimuli ane faitio faapea, o o latou taitoalua e le o le tagata lea sa latou manatu e i ai.
Ina ia aoao atu le taua o le tafao faamasani i ni auala eseese, ua ou faaali atu ai i la’u vasega inisitituti se ata e foliga mai o se paso o foliga o lo’u toalua e le’i uma ona tuufaatasi. Ina ua ou fesili atu pe faapefea ona fesootai i tafaoga faamasani, o le tali e masani lava, “O loo e tuufaatasia lau avā.” Peitai, afai e te vaai toto’a i ai, o le a e iloa ai o loo ou aveesea ni fasi paso ina ia iloa atu ai lona ata atoa o loo i lalo ifo. O fasi paso taitasi e faatusa i se fegalegaleaiga (po o se tafaoga faamasani) e iloa ai se mea e faatatau i uiga o lo’u toalua.
O ituaiga eseese o fegalegaleaiga o le a faaalia ai uiga eseese e uiga ia te ia. Afai ou te fiailoa e uiga i lona faaleagaga, e tatau ona ma faia faatasi se mea e faavae faaleagaga. E faapena foi, afai ou te fia iloa pe faapefea ona ia fesootai ma tamaiti, o le a ma mananao e tafafao ma tamaiti.
Faateleina le Talitonu, Faaitiitia le Popolevale
I le mafiafia o tafaoga faamasani mo le tutusa, ia manatua o le tafao faamasani lava ia e mafai ma e tatau ona faafiafiaina. O le tafao faamasani o se avanoa lea e feiloai ai i tagata fou, fatufatu ni faauoga, ma o ese atu ma fai se mea! O se tafaoga faamasani muamua e le manaomia ona avea o se suega e fausia pe motusia ai feiloaiga uma i le lumanai. E tusa lava pe e te lei mauaina lou toalua, ae o le mea taua ua e maua se uo fou.
E tatau ia i tatou uma ona galulue agai atu i le faaipoipoga e faavavau, ae o le soona atuatuvale e uiga i tafaoga faamasani ma faaipoipoga, aemaise lava o le fuaina o lou taua faaletagata lava ia e ala i lou manuia i tafaoga faamasani, o le a mautinoa lava lou faanoanoa ai. O le sailia o se toalua e tutusa lelei ma le faia o lau faaipoipoga ia manuia e mafai ona avea o se malaga matagofie ma faatumulia i le faatuatua.
O loo i ai se filemu maoae i le iloaina o le a faamanuiaina i tatou i mea uma tatou te manaomia mo le fiafia ma le alualu i luma a o tatou taulai atu i a tatou feagaiga ma faamoemoega ma folafolaga a lo tatou Tama Faalelagi alofa.