E Na o Tusiga Faaeletonika: Aoaoga a Taitai o le Ekalesia mai Ala o Faasalalauga Faaagafesootai

Fesootai ma le Tama Faalelagi e ala i le Tatalo

Tagai po o ai perofeta, aposetolo, ma isi taitai o le Ekalesia na aoao mai i luga o ala o faasalalauga faaagafesootai e uiga i le tatalo.

Faatasi ai ma le tele o avega, fesili, po o atugaluga i o tatou olaga, oka se meaalofa o le mafai ona tatalo i lo tatou Tama Faalelagi alofa mo le taitaiga, malosi, faamoemoe, faatuatua, ma le mafanafana! O lenei faamanuiaga o loo avanoa mo tagata uma, e pei ona aoao mai Peresitene Russell M. Nelson:

“E ala i le tatalo, tatou te faaalia ai lo tatou alolofa mo le Atua, Ma uaa Ia faia ia faigofie lava. E mafai ona tatou tatalo atu ia te Ia i soo se taimi. E leai se masini faapitoa e manaomia ai. E le manaomia foi ona tatou fafagaina ni maa pe totogi se pili faalemasina mo le auaunaga.”¹

Na faaopoopo mai foi Peresitene Nelson:

“Sa faaali mai e Iesu tatou te tatalo atu ai i se Tama poto o lē e silafia mea tatou te manaomia, ae tatou te lei ole atu ia te Ia [tagai i le Mataio 6:8]. …

“E le o a tatou tatalo uma o le a taliina mai e pei ona tatou moomoo i ai. O nisi taimi o le tali o le leai. E le tatau ona tatou ofo ai. O matua faaletino alolofa e le fai mai ioe i talosaga uma a a latou fanau. …

“E tatau ona tatou tatalo e tusa ai ma le finagalo o lo tatou Tama Faalelagi [tagai i le Helamana 10:4–5]. E finagalo o Ia e tofotofo i tatou, ia faamalosia i tatou, ma fesoasoani ia i tatou ia ausia o tatou gafatia atoatoa.”²

A o tatou saili ia iloa atili e uiga i le auala e mafai ai e le tatalo ona fesoasoani ia i tatou e faalatalata atili atu ai i le Tama Faalelagi ma avea atili ai e faapei o Ia, e mafai ona fesoasoani savali nei o ala o faasalalauga faaagafesootai talu ai nei mai taitai o le Ekalesia.

Valaau atu i le Atua mo le Malosi E te Manaomia

“Ia loto tatalo. Valaau atu i le Atua mo le malosi e te manaomia a o e galue ma le filiga ia avea oe lava ma se tagata e sili atu ona lelei—o se soo sili atu o Iesu Keriso, o se malamalama susulu atu i le lalolagi. Aua ‘o e faatalitali ia Ieova, e toe faafouina lo latou malosi, latou te sii ae apaau pei o aeto; latou te femoei ae le vaivai, latou te savavali ae le tigaina’ (Isaia 40:31).”

Peresitene Russell M. Nelson, Facebook, Jan. 1, 2023, facebook.com/russell.m.nelson.

Tatalo mo le Taitaiga e Fesoasoani ai i Isi

“I lenei Aso Faaleatunuu o Le Tatalo, sa ou mafaufau loloto ai i le uiga o le faatupulaia i lo tatou sosaiete o le fuaitau ‘mafaufauga ma tatalo.’ Mo le toatele, o se faailoaga faamaoni lava lea o le faamaisega ma le popole. Mo isi, e manatu i ai o le leai o se faatinoga ua vaaia i le feagai ai ma faalavelave.

“E i ai so’u talitonuga mausali o le tatalo mo i latou e manaomia le fesoasoani e fiafia i ai le Atua; o le mea moni, ua Ia poloaiina i tatou ia liliu atu ia te Ia ma tatalo mo isi! Peitai, o lo’u lava aafiaga patino pe a ou ole atu i le Atua i le tatalo mo le taitaiga i mea e mafai ona ou faia e fesoasoani ai e auauna atu, siitia, alofa, ma lagolago i latou e le tagolima, e tali mai o Ia i nei tatalo i mea patino ma faatauvaa e mafai ona ou faia e faamanuia ai se tasi o Ana fanau.

“Ou te valaaulia outou e mafaufau pe mafai faapefea ona avea ou mafaufauga ma tatalo ma se faatosinaga mo le Atua e musuia ma taitai atu ai oe i faatinoga o le agalelei, agaalofa, ma le agalelei. Vaai faalemafaufau i le tele o le lelei e mafai ona e faia i le lalolagi—ma i lou lava aiga, aoga, ma le fale faigaluega. A o tatou saili e avea ma Ona aao faamalolo ma aao fesoasoani, o le a mautinoa lava o le a tatou faaea le Alii.”

Peresitene Russell M. Nelson, Facebook, May 5, 2022, facebook.com/russell.m.nelson.

Ia Saili Faaaliga mai le Atua

“E toatele o loo faitauina lenei tusiga i le asō o ē o lagona se mana’o faanatinati mo lena faamanuiaga o le faaaliga faaletagata lava ia mai lo tatou Tama Faalelagi alofa.

“Mo i latou o i ai i se nofoaga o le lagolagi na faatamaiaina e taua, o le a avea ma se mana’o naunautai e iloa pe siitia atu lo latou aiga i le saogalemu pe faamautu ai pea i le mea o i ai. Mo le toatele o loo tatalo ia iloa pe faapefea ona fesoasoani i le Alii e laveai se mamoe ua leiloa.

“Tatou te iloa uma o faaiuga faaletagata ma manatu faautauta o le a lē lava e maua ai tali i fesili e aupito sili ona taua i le olaga. Tatou te manaomia faaaliga mai le Atua. Ma e le na o se tasi se faaaliga o le a tatou manaomia i taimi e atuatuvale ai, ae tatou te manaomia se tafe mai faafouina faifai pea o faaaliga.

“E faafofoga le Tama Faalelagi i a outou tatalo. E alofa o Ia ia te oe. Na te silafia lou igoa. O Iesu o le Keriso, o le Alo o le Atua, ma lo tatou Togiola. Ou te folafola atu Na te liligi mai faaaliga i luga o i tatou uma lava e ala i le Agaga Paia a o tatou sailia Lana taitaiga.”

Peresitene Henry B. Eyring, Facebook, July 16, 2023, facebook.com/henry.b.eyring.

Faailoa Atu o Tatou Manao e Faalatalata Atu i le Tama Faalelagi

“Po o fea lava o tatou i ai, e mafai e oe ma a’u ona savavali i le ala o le avea ma soo i le asō. Ia tatou lotomaualalo; ia tatou tatalo atu i le Tama i le Lagi ma o tatou loto atoa ma faaleo atu o tatou manaoga e faalatalata atu ia te Ia ma aoao e uiga ia te Ia.”

Elder Dieter F. Uchtdorf, Facebook, Apr. 22, 2023, facebook.com/dieterf.uchtdorf.

Fai se Talanoaga Faamaoni ma le Tama Faalelagi

“O se tasi o a matou uluai fonotaga i Initia o se faigalotu a le Siteki a New Delhi lea na pa’i loloto mai ai le tatalo amata i lo’u loto—ma le loto o Harriet—.

“O le tatalo, na fofogaina e Sister Dorothy Elisabeth Mehra, o se aioiga faamaoni a se afafine mama o le Atua i lo tatou Tama oi le Lagi lea na fatuina se avanoa loloto faaleagaga i savali o le afiafi.

“Sa ia amataina i se talosaga i le Tama Faalelagi e faamalosia o ia e pei o le taimi muamua lea i lona olaga e tatalo ai i se nofoaga faapena. ‘Faamolemole fesoasoani mai ia te au, ina ia leai se faafitauli i lo’u faia o se tatalo laitiiti ia te oe,’ sa ia ole leotele atu ai mai lona loto.

“O le toe faamatalaina o lona aafiaga, na fai mai ai Sister Mehra sa na ona ia manao lava e ‘talanoa i le Atua’ aua sa ‘gatete o ia i le fefe.’ Sa ia lagonaina le Agaga a o fesoasoani le lagi e auina mai se tali i lana tatalo. A o faasolo ona ia lagona le toafimalie, sa malosi le aumaia e lana tatalo o le Agaga, ma faatumulia ai le potu tele mo sauniga.

“O lana tatalo faigofie ma faamaoni na ootia ai le toatele. Sa ou iloaina o le mea sa ma faalogo i ai o se talanoaga faamaoni ma le Tama Faalelagi. Pe le o tatalo ea na?

“Sa ou iloaina mulimuli ane o le tatalo a Sister Mehra na utuvai mai i se molimau ua tuputupu ae talu mai le 2011 ina ua ia feiloai mo le taimi muamua i faifeautalai i le fale o lana uo i New Delhi. O le auala na talanoa ai faifeautalai e uiga ia Iesu Keriso na ootia ai o ia. I le 2012, sa papatisoina ai o ia faatasi ma lana fanau teine e toalua ma lana tama tama e le atoatoa le malosi.

“I se talanoaga faamomoiloto ina ua maea le sauniga, sa talosaga mai ai Sister Mehra ou te tatalo mo lana tama tama, ma sa ou folafola atu ma le fiafia o le a ou faia. O lona faatuatua ma le talitonu i le tatalo o se faatusa o tagata O Le Ekalesia a Iesu Keriso o le Au Paia o Aso e Gata Ai i Initia.”

Elder Dieter F. Uchtdorf, Facebook, Feb. 13, 2023, facebook.com/dieterf.uchtdorf.

Tatalo Ia Avea o se Meafaigaluega i Aao o le Atua

“Na faatoa ma faamanatuina ma Melanie le 50 o tausaga o le ma faaipoipoga faatasi ma lo matou aiga, ma savavali i ala o le laueleele na faapaiaina e lo tatou Faaola.

“Ona sa o se malaga faaleaiga lenei—ma e le o se tofiga aloaia o le Ekalesia—sa ou manao ai e avea ma se tamā ma se tane ae faapea foi ona faataunuu lo’u valaauga o se Aposetolo e avea o se molimau faapitoa a le Alii, po o fea lava ou te i ai. Sa ou tatalo ina ia tuu e le Atua ni aafiaga ma ni tagata i lo’u ala ina ia mafai ona avea a’u ma se meafaigaluega i Ona aao—ma sa Ia faafofogaina a’u tatalo.

“O se tasi o na faataitaiga o se vaega o volenitia talavou o fesoasoaniga alofa. Sa faafuasei ona matou fetaui ma le toatele o tagata o lenei vaega i Kaisareia Filipi. Sa ou molimau atu ia i latou a o folafola atu e Aposetolo anamua iina e moni lava o Iesu o le Keriso ma le Alo o le Atua soifua, e mafai foi ona ou tuuina atu la’u molimau paia o lea lava mea e tasi. Ma ou te faia ma le lotomaualalo!

“O le aso na sosoo ai, sa amata ai lo’u taeao i le tatalo afai e mafai ona tuu a’u i le ala o soo se tasi e manaomia lo’u alofa po o le molimau, ona faatonuina lelei lea o a’u. O le nofoaga sa ma fuafua e o i ai mo le taumafataga o le aoauli sa tapunia, o lea sa ma o ai i se isi mea. E lei leva ona matou saofafai i lalo, ae ulufale mai foi le vaega atoa o volenitia talavou o galuega alofa mai le aso na muamua atu. Sa toe suia foi a latou fuafuaga mo le taumafataga o le aoauli. Sa matou iloa ai sa tagi se tasi o alii talavou i le po na muamua atu ona sa ia misia le avanoa e feiloai ai ma se Aposetolo. Sa faafofogaina uma a ma tatalo, ma sa fuafuaina e le Atua o ma ala ia fesopoai—mo le toatasi.

“E faafofoga le Atua i a tatou tatalo. Na te tali atu i lena toatasi E ala i le mamanu faalelagi, Na te taitaia auiliiliga o o tatou olaga. E alofa tele o Ia ia i tatou taitoatasi. E pei lava ona auauna atu Iesu Keriso ia i latou i le Nuu Paia i le 2,000 tausaga ua mavae, na Te faia foi lea lava mea e tasi mo i tatou i aso nei, po o fea lava o tatou i ai.

“Ou te faafetai i le avea ai ma se molimau i Lona mana ma Lona alofa, ina ia mafaia mea uma ia i latou o e talitonu. Tau ina ia faapena mo i tatou taitoatasi pe a tatou tuu atu o tatou olaga ma faamoemoega i Ona aao.

Elder Ronald A. Rasband, Facebook, July 30, 2023, facebook.com/RonaldARasband.

Ave Atu Au fesili Faamaoni i le Tama i le Lagi i le Tatalo.

“I le lalolagi leoleoā o loo siomia ai i tatou, e mafai ona faigata ona faalogo i tali i fesili tatou te ole atu ai i le Alii. Sa ma talanoa talu ai nei ma Rosana ma le autalavou matutua i St. George [Iuta, Iunaite Setete] e uiga i nisi o a latou fesili.

“O la’u valaaulia mo i latou ma la’u valaaulia mo outou ia avatu i taimi uma a outou fesili faamaoni i lo tatou Tama Faalelagi i le tatalo. Ou te fai atu, o le ole atu, saili ma tu’itu’i atu, o se tasi lea o meaalofa ofoofogia na ofoina mai ia i tatou ina ua auina mai i tatou i le lalolagi. A taulai atu o tatou olaga i lena Iesu Keriso, o le a tatou maua tali i fesili loloto ma taua i o tatou agaga.

“O nisi o fesili na matou maua i le faigalotu na taulai atu i le auala tatou te taulimaina ai tofotofoga; o le a se mea e tatau ona tatou faia e tumau ai i luga o le ala o feagaiga, ma e mafai faapefea ona tatou lagonaina le alofa o le Faaola mo i tatou?

“Sei ou fai atu o le mulimuli i le Faaola o le tali lava lea i fesili o le olaga. Ua tumu le loto o le Faaola i le alofa mutimutivale. E saunia lava o Ia i taimi uma e fesoasoani ma fesoasoani mai ia i tatou. A o tatou faalatalata atili atu ia te Ia ma tuuina atu i tatou lava faaleagaga i Lana tausiga, e mafai ona Ia faamāmāina a tatou avega. Ou te tatalo ia mafai ona outou vaai atu i o outou tofotofoga e ala i mata o le faatuatua, ma aua le fiu.

“Po o le a lava lau fesili, ia iloa e faafofoga mai le Alii ia te oe ma o loo savali faatasi ma oe. A o outou savavali faatasi ma Ia, Na te faamanuiaina oe i Lona agaga, fesoasoani ia te oe e vaai manino i mea, ma Na te faatumuina oe i Lona alofa.

Elder Ulisses Soares, Facebook, Apr. 28, 2023, facebook.com/soares.u.

Maua le Olioli i le Fesootai atu i le Tama Faalelagi e ala i le Tatalo

“O le pese Peraimeri i le aso sa ou mafaufau soo i ai o loo maua i le Tusi [Pese] a Tamaiti itulau e 25. O le ‘Ou Te Fiafia e Tatalo.’ E te le fiafia ea i lena autu? Fai mai,

I le taeao pe a ou ala,
Ae ou te lei galue pe taalo,
Taimi uma ou te manatua
Ia tootuli ma tatalo lemu.

Pe a ou alu e moe i le po,
Ou te fiafia e tootuli ma fai atu,
‘Faafetai lava, Tama Faalelagi,
Mo faamanuiaga o le aso.’

“Ou te fiafia tele i lenei pese aua e fiafia ma e faamanatu mai ai ia te au ou te fiafia e tatalo, e le o se galuega. E le o se mea o loo ou taumafai e siaki ua uma ona fai i le amataga ma le afiafi o po taitasi. Ae e mafai ona ou maua le olioli i le talanoa atu i lo’u Tama Faalelagi ona e finagalo o Ia e faafofoga mai ia te au i aso uma.

“Ma o le mau ua tatou maua ua fautuaina ai i tatou e uiga i le mafuaaga e tatau ai ona tatou fiafia e tatalo o loo maua i le Alema37:37, lea ua aoaoina ai i tatou e tatau ona tatou ‘filifili faatasi ma le Alii i au mea uma e fai, ma o le a ia taitai oe mo le lelei; ioe, pe a e taoto i lalo i le po, taoto i lalo i le Alii, ina ia mafai ona Ia leoleo i ou luga a’o e moe; ma a e ala mai i le taeao ia tuu lou loto ia tumu i le faafetai i le Atua.’

“E saili le Atua e faamanuia i tatou i aso uma pe a tatou o mai ia te Ia e ala i le tatalo. Ma ou te valaaulia outou i le asō e talanoa atu i lo outou Tama Faalelagi i le suafa o lo tatou Faaola, o Iesu Keriso, ma vaai pe faapefea ona Ia taitaiina oe mo le lelei.”

Sister Tracy Y. Browning, Facebook, Feb. 28, 2023, facebook.com/Primary2ndCounselor.