O Leo o le Au Paia o Aso e Gata Ai

O A Nisi Mea e Mafai Ona Ou Faia mo O’u Afafine?

Saunia e Georgina Montemayor Wong, Nuevo León, Mekisiko

Sa ou manao e faamalosia faaleagaga o’u afafine, o lea sa ou liliu atu ai i le Tama Faalelagi i le tatalo.

Ata pu’e mai faaaloaloga a le tusitala

Ou te faiaoga i le aoga lava lea e tasi e aooga ai o’u afafine. O aso uma lava matou te faatopetope faatasi ai i le 6:00 i le taeao. A matou taunuu, ou te alu i lou potuaoga ma latou o i o latou potuaoga.

A tuua le aoga, matou te faatopetope atu i le fale, aai, ma faanatinati atu i isi gaoioiga, e pei o Tamaitai Talavou ma lesona musika. O lo’u toalua o le peresitene o le korama a toeaina, o lea e pisi tele ai foi o ia.

Sa amata ona ou lagonaina ua pisi tele lo matou aiga. Sa leai so ma taimi mo ni talanoaga patino ma vavalalata e uiga i le talalelei, sei vagana ai Aso Sa.

Ou te manao i ou afafine e atiina ae ni molimau malolosi i le Faaola o Iesu Keriso ma Lana talalelei—e amata atu nei, a o laiti i latou. I le avea ai ma o latou matua, ua ma iloa ma lo’u toalua o lena tiutetauave e a i ma’ua (tagai i le Mataupu Faavae ma Feagaiga 68:25). Sa ou filifili e tatalo e uiga i ai.

“E le gata i le faia o afiafi faaleaiga ma ave o ma afafine i le lotu,” sa ou fesili atu i le Tama Faalelagi, “o le a se isi mea e mafai ona matou faia?”

O le tali na ou mauaina o le faitauina lea o tusitusiga paia i le taeao ma faaaoga musika. O lea la, a o agai atu i le aoga i taeao taitasi i la matou veni, sa amata ona ou taina viiga ma isi musika talafeagai. Ma, mo ni nai minute talu ona matou taunuu i le aoga, sa amata ona matou faitauina faatasi tusitusiga paia, talanoaina le talalelei, ma tatalo a o lei o atu i vasega. E oo lava i la’u lima tausaga sa manao e auai.

O se mea matagofie le vaai atu i la’u fanau o faitau ma molimau ia Iesu Keriso ma vaai i ou afafine matutua, 9 ma le 12, ma le naunautai e fesoasoani i le uii, 5, e faitau tusitusiga paia.

Ina ua uma ona matou faaopoopoina la matou faigalotu puupuu i la matou faiga masani pisi o le taeao, sa ou fesili atu i la’u fanau teine, “O le a so outou manatu?” Sa ootia lo’u loto i a latou tali.

“Sa i ai sa’u suega i le asō, ma sa ou lagona le popole tele,” o le tala lea a se tasi o i laua. “Ae sa ou manatua mai lenei taeao e mafai ona matou ole atu i le Atua mo se fesoasoani. Sa ou faia se tatalo i lo’u loto, ma ole atu ia te Ia e fesoasoani mai ia te a’u ia ou to’a, ma sa Ia faia.”

Fai mai le isi, “Mama, ou te iloa se teineitiiti e leai se tasi e talanoa i ai. Sa ou manatuaina mai la tatou faigalotu e alofa le Atua i tagata uma, o lea sa ou filifili ai e talanoa atu ia te ia ma avea ma ana uo.”

Ou te faafetai tele i le Tama Faalelagi mo le fesoasoani mai ia te au e faataunuu lelei la’u matafaioi o se tina. Ou te iloa e tali mai o Ia i tatalo ma ua tuuina mai ia i tatou le talalelei e faafiafiaina ai i tatou.