“O Ai Ua Maliu?,” Liahona, Ape. 2024.
O Leo o le Au Paia o Aso e Gata Ai
O Ai Ua Maliu?
Sa faatele ona ou tagofia le faamanatuga. Aisea na ou le vaai ai i faatusa matagofie?
Ata na tusia e David Green
I le avea ai ma faifeautalai o le uarota, sa ma faaaumeaina ai ma lo’u toalua se ulugalii talavou. Sa ma alolofa ia i la’ua ma le la’ua fanau. Mulimuli ane, sa la’ua taliaina la ma valaaulia e o mai i le lotu.
Peitai, ina ua matou taunuu atu e piki i latou i se tasi taeao o le Aso Sa, sa latou faatoese mai ona latou te le’i saunia. Ae o le la atalii e ono tausaga, o Keaton, sa aioi atu i ona matua e matou te o. O lea la, faatasi ai ma la la’ua faatagaga, sa fai ona lavalava ma matou o faatasi i le lotu.
I le tuai ai ona taunuu, sa matou o i le pito i tua o le falesa. Sa faafuasei ona ou lagonaina le toso atu o lo’u suti e Keaton o loo pipii mau ai. Faatasi ai ma se foliga naunautai ma ona mata o loo taulai atu i luma o le falesa, sa ia fesili ai, “O ai ua maliu?”
“O le a?” Sa ou tali atu, ma mulimuli i lona sioa atu. “E leai se isi o oti.”
A o ou mafaufau loloto i le fesili a Keaton, sa ou tilotilo atu i le laulau o le faamanatuga. Mo se tamaitiiti e itiiti sona iloa i le Ekalesia, o le a faigofie ona vaai i le mea sa foliga mai o se tino o loo taoto i lalo o le ie o loo ufitia ai le falaoa ma le vai o le faamanatuga. Ona ou manatua ai lea: na maliu se tasi. O faatusa paia ua suitulaga i le tino o Iesu Keriso sa i o matou luma. Faatasi ai ma le tele o aafiaga i le Ekalesia, aisea na ou le vaai ai i faatusa matagofie?
Sa ou faafetai ia Keaton mo lana fesili ma faamatala atu o le ie faamanatuga na ufitia ai le areto ma le vai ma le taua ia i tatou. O lana fesili faatauvaa na faamanatu mai ai ia te au na maliu moni lava le Faaola ina ia mafai ai ona tatou ola.
Talu mai lena aso, o loo faaauau pea ona tatagi le fesili a Keaton i lo’u agaga. Ua fesoasoani ia te a’u e agai atu ai i le laulau o le faamanatuga e taulai atili atu ai i le Faaola. O faatusa o le faamanatuga ua sili atu ona manino, ma o o latou uiga o loo tumau pea ia te au i le aluga o le vaiaso. O le a ou faafetai pea e faavavau mo le fesili mamā a Keaton.
Na saunoa mai Elder Jeffrey R. Holland o le Korama a Aposetolo e Toasefululua: “A o tatou lotogatasi ai i le lalolagi atoa i vaiaso taitasi i le mea ua tatou faamoemoe o se faamamaluga paia faateleina o le meaalofa mamalu o le togiola a Keriso i tagata uma, tau ina ia tatou aumaia i le fata faitaulaga o le faamanatuga “nisi loimata mo ona faanoanoaga [ma] nisi tiga i lona faavauvau.” A o tatou manatunatu ai, tatalo, ma faafou feagaiga, tau ina ia tatou ave mai lena taimi paia se “onosai [atili] i tiga, … [ma viia atili] se mapusaga” [Fa’apa’ia Mai A’u,” Viiga, nu. 70].”1