Ua Na’o Tusiga Faaeletonika
Faamalosia o Lagona o le Filemu i Mafutaga
“A o tatou mulimuli i le Alii o le Filemu, o le a avea i tatou ma Ana e faatupuina le filemu.”1
A o lei puapuagatia Iesu Keriso i Ketesemane, sa Ia faamafanafanaina Ona soo i le faapea atu, “Ou te tuuina atu ia te outou le manuia, o lo’u manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27; tagai foi i le fuaiupu e 26–31).
I le avea ai ma soo o Iesu Keriso, o se tasi o a tatou sini o le faataitai i Lana faataitaiga ina ia mafai ai ona tatou toe foi atu i lo tatou Tama Faalelagi ma nonofo faatasi ma Ia e faavavau.
Sa finagalo le Faaola e fesoasoani i isi ia maua le filemu. E mafai faapefea ona tatou faalauiloaina le filemu i a tatou mafutaga?
Na saunoa Elder Ulisses Soares o le Korama a Aposetolo e Toasefululua, “A o tatou taumafai e atiina ae uiga e pei o le Faaola, e mafai ona avea i tatou ma meafaigaluega o Lona filemu i le lalolagi e tusa ai ma le mamanu na ia faatuina e Ia lava.”2
O le atiina ae o uiga auaumama o Keriso o se tasi lea o auala tatou te ono maua ai le filemu i mafutaga ma isi ma i tatou lava. O nisi nei o faataitaiga a Iesu Keriso e faaaoga ai Ona uiga paia e faasoa atu ai Lona filemu.
Alofa Mama ma le Alofa
O le fa o aso talu ona mavae le maliu o Lasalo, na afio mai ai Iesu ia Maria ma Mareta a o la faanoanoa. E ui ina sa Ia silafia o le a ia faatuina mai Lasalo mai le oti, ae sa agaalofa tele o Ia mo tuafafine, ma “sa tagi Iesu” (Ioane 11:35). Sa ia faaalia se faataitaiga sili o le faatinoina i le alofa mama ma le naunautai e “faanoanoa faatasi ma e e faanoanoa” (Mosaea 18:9).
Na saunoa mai Peresitene Russell M. Nelson: “O le alofa mama o Keriso o le tali lea i finauga ia ua āfāina ai i tatou i le taimi nei. O le alofa mama e uuna’ia ai i tatou e “tauave avega a le tasi’ [Mosaea 18:8] nai lo le faafaupu’e o avega i luga o le tasi. O le alofa mama o Keriso e mafai ai ona tatou ‘tutu o ni molimau o le Atua i taimi uma ma i mea uma’ [Mosaea 18:91]—aemaise i tulaga popolevale. O le alofa mama e mafai ai e i tatou ona faapupula atu le ala e tautatala atu ai alii ma tamaitai o Keriso ma faatino—aemaise le taimi e osofa’ia ai e faitioga.”3
Po o le a lava le tulaga ua tatou i ai, e mafai ona tatou filifili e vaai atu i isi ma i tatou lava o ni fanau a le Atua. E ui atonu tatou te le malamalama atoatoa i mea o loo feagai ma isi pe atonu foi e ese lo tatou malamalama nai lo se isi tagata, e mafai ona tatou faaauau pea ona alolofa ma auauna atu ia i latou i le alofa mama faaKeriso ma le agaalofa.
Faamagaloga
A o puapuagatia i luga o le satauro a o lei maliu o Ia, sa fetalai Iesu e uiga ia i latou o e na faasatauroina o Ia, “Lo’u Tama e, ia e faamagaloina atu ia te i latou; aua ua latou le iloa le mea ua latou faia” (Luka 23:34).
I le olaga, atonu e faatiga i tatou e isi. Ma o nisi taimi o i tatou ia e mafua ai le tiga o isi. Afai e tuua e aunoa ma le atuatuvale, o nei mea tiga e mafai ona faaleagaina ai a tatou mafutaga. E ala i le Togiola a Iesu Keriso, e mafai ai ona tatou maua le malosi e maua ai le onosai e faamagalo atu ai ma saili le faamagaloga. A o tatou faia lea mea, e mafai e isi ma i tatou lava ona lagonaina ma faasoa atu le filemu ma le alofa ua ofoina mai e Keriso.
Na saunoa Peresitene Nelson: “O le faamagalo atu e le na o se faatinoga e tasi le taimi ae o se faagasologa faifai pea e manaomia ai le onosai, agaalofa, ma le malamalama. E le faigofie i taimi uma ona faamagalo i latou o e na faatiga ia te oe. E mafai ona e maua le malosi mai ia Iesu Keriso. … Ou te valaaulia outou ia manatua le mataupu faavae o le faafitugafulu ni fitu ma tuuina atu le faamagaloga i se tasi na faia se mea sese ia te oe. A o e faia, o le a aveesea e Iesu Keriso oe mai le ita, le fiafia, ma le tiga. O le a aumaia e le Alii o le Filemu ia te oe le filemu.”4
E taua le manatua, aemaise lava i tulaga o le faatautala/sauaina, e faapea “o le faamagalo atu e le faapea o le galo o le solitulafono na tupu pe faafoliga e lei tupu lava. E le faapea o le a e faatagaina le sauaga faatautala e faaauau pea. E le faapea e mafai ona faamaloloina mafutaga uma lava. Ma e le faapea o le tagata agasala o le a le faamasinoina i ana mea sa fai. O lona uiga e mafai ona fesoasoani le Faaola ia te oe e faamatuuese.”5
A o tatou galulue i le atiina ae o uiga faaKeriso, e mafai ona tatou faaaogaina e faamalosia ai le filemu i totonu o a tatou mafutaga.
Na faapea mai Peresitene Nelson:
“A o tatou mulimuli i le Aloalii o le Filemu, o le a avea i tatou ma ē e faatupuina le filemu. …
“Afai e te faamaoni e uiga i lou fesoasoani e faapotopoto Isaraelu ma le fauina o mafutaga o le a tumau e oo i le faavavau, o le taimi lenei e lafoa’iese ai mea inosia. Onei o le taimi lea ia faamuta ai lou tausisi pea a lē o lau ala ia e leai. Onei o le taimi lea ia taofi ai le faia o mea e faaeteetegatā ai isi ona o le popole i e ita. Onei o le taimi lea e tanu ai a outou auupega o taua [tagai i le Alema 24:19; 25:14]. Afai ua tumu lau ma’a faaleo i mea faatiga ma tu’uaiga, o nei o le taimi lea e lafoa’ia ai [tagai i le 1 Korinito 13:11]. O le a e tula’i a’e o se alii po o se tamaitai malosi o Keriso.”7
E ala i le avea ma e faatupuina le filemu, e mafai ona tatou molimauina isi o selesele ia faamanuiaga e maua mai le Aloalii o le Filemu, lo tatou Faaola, o Iesu Keriso.