“O le Taunuuga Paia o a Tatou Fanau,” Liahona, Ape. 2024.
O le Taunuuga Paia o a Tatou Fanau
O auala e fa e mafai ai e matua ona fesoasoani ia latou fanau e aoao e uiga ia Iesu Keriso ma iloa le paia i totonu o i latou.
E masani ona fesiligia fanau, “O le a se mea e te mana’o e avea ai pe a e matua?” I le muai olaga, pe ana fai mai ia i tatou se fesili faapena, atonu o la tatou tali o le, “Ou te fia avea e faapei o o tatou matua faalelagi.”
O le tulaga faamatua e masani lava ona faatatau i taimi e momoe ai ma taimi taeele, aoao atu ma faalilii, faasa’oga ma faamafanafanaga. Ae atonu e mafai ona tatou laa i tua mo sina taimi ma vaai i lo tatou tulaga faamatua mai se vaaiga lautele atu, manatua le natura paia o a tatou fanau—o i latou foi o fanau a le Atua—ma ua i ai so latou taunuuga paia, e oo lava ina avea faapei o le Atua i se aso (tagai i le Mataupu Faavae ma Feagaiga 132:20).
Na aoao mai Peresitene Dallin H. Oaks, Fesoasoani Muamua i le Au Peresitene Sili, “O lo tatou talitonuga faalelotu e amata i matua faalelagi, ma o lo tatou faamoemoega aupito maualuga o le mauaina lea o le atoaga o le faaeaga e faavavau.”1 Ma ua tofu i tatou uma taitoatasi ma lena gafatia paia. Ua ta’ua e “Le Aiga: O Se Folafolaga i le Lalolagi”: “O tagata uma—tane ma le fafine—ua foafoaina i le faatusa o le Atua. O i latou taitoatasi o se atalii po o se afafine agaga faapelepele a ni matua faalelagi, ma, o lea ua tofu ai ma se natura paia ma se taunuuga.”2
E mafai e matua ona fesoasoani i fanau e faatautaia ma faamanuiaina i o latou ala ia avea e faapei o le Atua. Ae ina ia avea atili e faapei o Ia, e tatau i a tatou fanau ona aoao muamua atili e uiga i le tulaga e i ai le Atua. O se tasi o mafuaaga na afio mai ai Iesu Keriso i le lalolagi o le fesoasoani lea ia i tatou ia malamalama i lo tatou Tama Faalelagi. E pei ona fetalai mai le Faaola, “O a’u ma le Tama, e tasi lava i ma’ua” (Ioane 10:30); “o le ua vaai mai ia te au, ua vaai o ia i le Tama” (Ioane 14:9). Ina ia avea e faapei o le Atua, tatou te liliu atu i le Faaola, aoao e uiga ia te Ia.
O mea nei e fa e mafai ona tatou faia e fesoasoani ai i a tatou fanau e aoao po o ai Iesu Keriso ma o le a latou iloa ai lo latou Tama Faalelagi:
-
Aoao i latou e faalagolago i aposetolo ma perofeta a le Faaola.
-
Aoao i latou e galulue i le faatuatua.
-
Aoao i latou i le taua o faaaliga.
-
Faataitai mai uiga auaumama o le Faaola.
Faatuatuaina o Aposetolo ma Perofeta
O se tasi o auala sili ona taua o le a iloa ai e a tatou fanau Iesu Keriso o le faalogo lea i Ana molimau faapitoa filifilia. E pei lava ona i ai i taimi o le Feagaiga Fou, ua fesoasoani foi Aposetolo i aso nei ia tatou malamalama i Lona uiga ma Lana galuega. Na aoao mai Peresitene Russell M. Nelson: “O Aposetolo faauuina a Iesu Keriso e molimau atu e le aunoa ia te Ia. Latou te faasino mai le ala a o tatou savalia lo tatou ala e ui atu i le lavelave ma fita faapopoleina o lo tatou olaga faaletino.”3 Ma na aoao mai Elder Neil L. Andersen o le Korama a Aposetolo e Toasefululua: “E le tu se perofeta i le va o oe ma le Faaola. Ae, e tu o ia i ou talaane ma faasino atu le ala i le Faaola.”4
E taua foi le aoao o a tatou fanau ia maua le lotomaualalo ma le onosai a o latou faalogologo atu i o tatou taitai musuia. Na saunoa mai Elder Andersen: “Aua nei faate’ia oe pe a i ai se taimi e le muai ogatusa ai ou lava manatu patino ma aoaoga a le perofeta a le Alii. O taimi nei o le aoaoina, o le lotomaualalo, pe afai tatou o i o tatou tulivae i le tatalo. Tatou te savavali i luma i le faatuatua, faalagolago i le Atua, iloaina o le a i ai le taimi o le a tatou maua ai le manino atili faaleagaga mai lo tatou Tama Faalelagi.”5 Na aoao mai e le Alii se mataupu faavae taua ina ua Ia fetalai e uiga i le Perofeta o Iosefa Samita, “Ona o lana upu ia outou talia, e pei lava ua mai i lo’u lava gutu, i le onosai ma le faatuatua atoa” (Mataupu Faavae ma Feagaiga 21:5). O le aoaoina o a tatou fanau ia maua le onosai ma galulue mo le malamalama o le a latou ola tutoatasi ai faaleagaga i o latou olaga atoa.
Galulue i le faatuatua
O le iloa o se mea e sili atu nai lo le taulotoina o mea moni. E mafai e tagata ona faitau i tusi e uiga i le taina o le piano, ae afai latou te le taina lava se nota, o le a lē fesoasoani lava lo latou malamalama ia i latou e avea ai ma se tagata ta piano. E faapena foi ona moni i le iloaina o Iesu Keriso. O le iloaina o Ia e sili atu nai lo na o le iloaina o mea moni. Ina ia iloa o Ia, e tatau ona tatou faia e pei ona Ia faia.
Na faamamafa mai e le Faaola e faapea o le faatinoina o se vaega taua lea o le iloaina: “Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a’u” (Ioane 7:17 Na saunoa mai Elder David A. Bednar o le Korama a Aposetolo e Toasefululua, “Ua amata ona tatou iloa le Faaola a o tatou faaosofia o tatou mafaufau faaleagaga ma tofotofo i Ana aoaoga.”6 Na fesili le Tupu o Peniamina, “Aua pe faapefea ona iloa e se tagata le matai e lei auauna i ai o ia?” (Mosaea 5:13).
E mafai e a tatou fanau ona aoao e uiga ia Keriso e ala i le suesue i tusitusiga paia, seminare, ma le konafesi aoao. Peitai, o nei mea o le a le lava e aunoa ma le faia o le mea na faia e Keriso: talaiina atu o le talalelei, tausia o i latou e le tagolima, ma galulue e “agalelei” (Galuega 10:38).
O le polokalama a Tamaiti ma le Autalavou a le Ekalesia e mafai ona fesoasoani i a tatou fanau e galulue ai i le faatuatua. E mafai ona tatou fesoasoani ia i latou e mafaufau i sini o le a fesoasoani ia i latou e faia mea na faia e Keriso ma iloa ai pe o ai o Ia.7
Sailia o Faaaliga
Tatou te iloa foi Keriso i se tulaga e sili atu ona patino pe a, e pei ona uunaia ai e Peresitene Nelson, tatou faalogo ia te ia e ala i le Agaga: “Tatou te faalogo foi ia te Ia ma le manino atili a o tatou faaleleia lo tatou tomai e iloa ai musumusuga a le Agaga Paia. E leai lava se isi taimi ua sili ona matua taua ai le iloa o le auala e fetalai mai ai le Agaga ia te oe nai lo le taimi nei. I le Aiga Atua, o le Agaga Paia o le avefeau. O le a Ia aumaia mafaufauga i lou mafaufau ia e finagalo le Tama ma le Alo e te mauaina.”8
E mafai ona iloa e a tatou fanau le Faaola pe a latou faalogo i mea e finagalo o Ia latou te iloa ma faia taitoatasi. O le polokalama a Tamaiti ma le Autalavou e uunaia tamaiti ma le autalavou: “E mafai ona e tatalo e aoao po o a [au taleni] ma mea e mafai ona e galue ai i le taimi nei.”9 A o saili tamaiti ia malamalama i mea e finagalo ai le Faaola mo i latou, o lo latou avanoa e lagona patino ai Lona alofa o le a tuputupu a’e.
E mafai ona tatou aoaoina i latou ia aua nei lotovaivai pe afai e le oo mai tali i le taimi lava lena. E mafai ona latou faaauau pea i le faatuatua, ma le iloaina o le a latou lagonaina le alofa o le Atua a o latou galulue e faalogo ia te Ia. Na otooto mai e Peresitene Nelson ia laasaga o le a fesoasoani ia i tatou, i upu a le Perofeta o Iosefa Samita, “tuputupu ae i le mataupu faavae o faaaliga,” e aofia ai: faatofuina i tusitusiga paia, faalatalata atu i le Alii i le tatalo, faalogo mo tali ma tusifaamaumau o tatou lagona, ma (e ui o le a tatou le atoatoa) faia taumafaiga i aso taitasi ina ia faateleina le agavaa.10
Avea ma se Faataitaiga
Ma le mea mulimuli, i le avea ai ma matua, o se tasi o auala sili ona taua tatou te aoao atu ai a tatou fanau e uiga ia Keriso o le faataitaia lea o Ona uiga auaumama i o tatou lava olaga. Na saunoa mai Elder Jeffrey R. Holland o le Korama a Aposetolo e Toasefululua: “Pe ua lototoa tele ea le faamoemoe ia maua e a tatou fanau sina vaega itiiti o le lagona mo i tatou lea na lagonaina e le Alo Paia mo Lona Tama? Pe mafai ona tatou maua atili lena alofa e ala i le taumafai ia avea atili ma tagata na i ai le Atua i Lona atalii? I soo se tulaga lava, ua tatou iloa o le mataupu atiae a se tagata talavou e uiga i le Atua e totonugalemu i uiga o loo matauina i matua faalelalolagi o lena tamaitiiti.”11
Pe a tatou faataitai ia Keriso, tatou te fesoasoani e faaali atu o Ia ma le Tamā i a tatou fanau. O nisi o uiga auaumama o Keriso o loo otooto atu i le Moronae 7:44–45, e aofia ai le alofa mama, faamoemoe, agalelei, agamalu, le faaitaitagofie, e loa ona tali tigā, ma le onosaia o mea uma.
O se tasi o tamaitai ou te iloa sa i ai se tamā sa masani ona ita ma lē fiafia gofie. Sa ia fai mai, “Mo le tele o tausaga, sa ou vaai ai i le Tama Faalelagi i le ala lava lea e tasi na ou vaai ai i lo’u tamā—o se tasi o lē mo le tele o taimi na faatumauina lona mamao ese ma sa faigofie ona le fiafia.” O lenei mea na aafia ai lona gafatia e malamalama moni ai i le Tama Faalelagi. Peitai, sa ia faasoa mai sa fesoasoani le Tama Faalelagi ia te ia e aoao e faapea “O loo faifaimalie lava ona Ia taitaieseina mai a’u mai le fefe ia te Ia e agai atu i le mana faaola o Lona alofa.” Sa amata ona ia vaai i Lona tagata moni.
O le faamoemoega muamua o le Peraimeri o le fesoasoani lea i tamaiti ia lagonaina le alofa o lo latou Tama Faalelagi.12 E mafai foi ona avea lenei mea ma se tasi o faamoemoega muamua o matua. A o lagona e tamaiti le alofa o le Tama Faalelagi, o le a latou maua se malamalama sili atu e uiga ia te Ia ma mananao e avea faapei o Ia.
O le a se mea e mananao a tatou fanau ia avea ai pe a matutua? I le avea ai ma matua, e mafai ona tatou faafaileleina se manao ia i latou ia avea faapei o o tatou matua faalelagi. O Iesu Keriso o lo tatou faataitaiga atoatoa, ma a o tatou fesoasoani ia tatou fanau ia o atu ia te Ia, o le a sili atu ona latou maua lenei manao. E mafai ona tatou fesoasoani ia i latou ia iloa le Atua ma Iesu Keriso e ala i le fausiaina o le faalagolago i aposetolo ma perofeta, fesoasoani ia i latou e galulue e ono pei ona faia e le Alii, fesoasoani ia i latou e faalogo ia te Ia e ala i le Agaga, ma faataitai i le Alii i a tatou lava faatinoga.
O a tatou faataitaiga ma a latou sootaga faalefeagaiga ma le Alii o le a fatuina ai le mausali, o se lagona o le auai, ma le malamalama i le alofa o le Atua lea e manaomia e a tatou fanau, ma faamanuiaina ai i latou mo le tele o tausaga a sau.