“O I Ma’ua O Faifeautalai,” Liahona, Ape. 2024.
O Leo o le Au Paia o Aso e Gata Ai
“O I Ma’ua O Faifeautalai”
Sa ou ole atu i le Atua e fesoasoani mai ia te au ia maua Lana ekalesia faafaifeautalai.
Ata na tusia e Brian Call
Sa fiafia o’u matua e faasoa atu le afioga a le Alii. Sa laua foai atu e le aunoa atigipusa o loo i ai kopi o le Feagaiga Fou i tuaoi, falepuipui, falemai, ma aoga.
I le avea ai ma se vaega o taumafaiga a ou matua, sa pese ai lou tama, faitau tusitusiga paia, molimau atu ia Iesu Keriso, ma faaiu i le tatalo. O le faaaofia ai i lena aafiaga a o ou laitiiti, sa ou atiina ae ai se manao e auauna atu i le Atua.
Peitai, ina ua puapuagatia lo’u tama i se gasegase o le fatu, sa faamutaina le mea sa matou ta’ua o le “faaevagelia”. Sa le mafai ona ou tufaina atu na o au ni kopi o le Feagaiga Fou, o lea sa ou talosagaina ai lo’u tama mo se faatagaga e saili ai se lotu faafaifeautalai.
E oo atu i le 15 o o’u tausaga, ua amata ona ou faia ni fesili e uiga i le aoaoga faavae, papatisoga, sefuluai, ma le faatulagaga o le ekalesia. Sa fai mai lo’u tama e leai se lotu i le asō na faia ni mea e pei ona aoao mai e le Faaola. Ae afai ou te mauaina se lotu faapena, na ia fai mai ai, e tatau ona ou auai i ai.
I ni tausaga mulimuli ane, sa i ai se ma feeseeseaiga ma se tagata faigaluega. Ina ua sau o ia i lo matou fale e faatoese mai, sa ia tuua se tusi ua faaulutalaina O Lo Tatou Tupuaga: O Se Talafaasolopito Puupuu o O Le Ekalesia a Iesu Keriso o le Au Paia o Aso e Gata Ai. I totonu, sa ou faitau ai i le faamaturoina o le Perofeta o Iosefa Samita. O lenei tala na matua ootia ai lava au.
Sa ou mauaina ai foi se ata o ni alii talavou se toalua o ofuina ni ofutino papa’e, fusiua, ma pine o igoa. Sa la’ua faasoa atu le talalelei a Iesu Keriso i le lalolagi atoa. Sa ou mafaufau pe na i ai ni faifeautalai faapena i lo’u nuu.
O lena afiafi sa ou tatalo ai ma ole atu i le Atua e fesoasoani mai ia ou maua Lana ekalesia faafaifeautalai. O le aso na sosoo ai sa ou sueina ai faifeautalai. Sa ou siakia tagata uma sa ou vaai i ai o loo ofuina se ofutino paepa’e, ae sa le’i faamanuiaina a’u.
I fafo atu o lo’u fale i ni nai aso mulimuli ane, sa ou vaaia ai ni tagata se toatolu o ofuina ni ofutino papa’e, fusiua, ma pine o igoa! Sa ou tamoe i totonu, aumai le tusi, ma faatopetope atu ia i latou.
Ina ua ou mauaina i laua, sa fesili mai se tasi o i latou, “E mafai ona matou fesoasoani ia te oe?”
“Pe o le tusi lenei mai la outou ekalesia?” Sa ou fesili atu ai.
“Ioe, o le matou tusi lea,” sa ia tali mai ai ma le naunautai. “O i ma’ua o faifeautalai.”
Ina ua mavae ni nai vaiaso o le aoaoina e uiga i le talalelei toefuataiina, sa papatisoina a’u o se tagata O Le Ekalesia a Iesu Keriso o le Au Paia o Aso e Gata Ai. O le tausaga mulimuli ane, sa papatisoina ai lo’u tamā.
Ona sa o’u manao pea e auauna atu i le Alii—o se manao sa tumau ia te au talu mai lo’u laitiiti—sa amata loa ona o’u sauniuni e auauna atu i se misiona talai. Oka se olioli na ou lagonaina i le aso na ou maua ai lo’u lava valaauga e avea ma se faifeautalai faamisiona!