Itulau i le Lotoifale
O Lo’u Tamamatua ma Mr. Hu
Ua musuia se Faifeautalai Ausetalia i Vavega Faafaifeautalai a lona Tamamatua i Taiuani
O Elder Daniel Stolt o le Misiona a Melepone i Ausetalia sa i ai i luga o le pa e uiga i le auauna atu i se misiona. “O le tele ina ou mafaufau iai o le tele foi lea o le le manino o le oo mai o le faaiuga,” sa ia toetomanatu. O le tasi aso, sa ia tuu atu ai ona atugaluga i le Alii. “Sa ou matua tatalo lava, ma [sa] iai so’u lagona e tatau ona ou sailia le tala a lo’u tamamatua. Sa ta’u mai e lo’u tina ia te a’u, ‘E te iloa o loo ia i tatou tusi a lou tamamatua o le misiona; ou te manatu e manao o ia e te faitauina.’”
O le tamamatua o Elder Stolt o Vernon Carl Poulter II, sa auauna atu mo le tolu tausaga, i le misiona i le gagana Mandarin mo Le Ekalesia a Iesu Keriso o le Au Paia o Aso e Gata Ai i le 1957. O le uluai tofiga o Elder Poulter i le misiona o Asia Sasae Mamao o Taipei, Taiuani. Faato’a tatala lava i faifeautalai mo nai masina, ma talu ai e lei faaliliuina ni faaaliga o aso e gata ai o le Ekalesia i le gagana faaSaina, o le aoaoina atu o le talalelei e manaomia ai ni lesona e 17 a o le’i papatisoina ma le isi 20 i le mae’a ai ona papatiso.
O le toatele o tagata na faafesootai e Elder Poulter sa faaalia le tulaga lelei, peitai e masani lava ona siitia atu o ia i se eria fou ao lei faagasolo i latou i lo latou liuaina. I le mae’a ai o se tasi o siitaga, na o la filifili ai ma lana soa laitiiti e tuuina atu a la tatalo i se suega. Sa fautuaina e Elder Poulter: “Ta tatalo patino lava ina ia taitaiina atu i se tasi ua saunia e faalogo i le talalelei, ona tumau ai pea lea i luga o ta uila se’ia o ta mauaina le taitaiga a le Agaga.”
I le itula na sosoo ai, i se taulaigaala pisi i le fetineiai o taavale o Taipei, sa maua ai e Elder Poulter se lagona manino e liliu i le taumatau. Ina ua ia maua atu lana soa, sa toe foi mai le uunaiga—ua malosi atu i le taimi lea—e tatau ona la toe foi atu.
Sa faamaumauina e Elder Poulter: “Sa ma toe foi atu i taavale feoai, toe liliu i tua agai i le fa laina . . . toe foi i le taulaiga o auala, ma liliu i le agavale e auala atu i le isi valu laina o taavale.”
Na oo lava ina maua e faifeautalai i la’ua lava i se auala sa vaapiapi tele e oo lava i uila vilivae. “A o ma faaauau ona savavali, sa ou vaaia se alii i nai futu le mamao ese o vaavaai mai ia i ma’ua ma le naunau i se faamalama matala. Sa fetaui o ma mata ma sa ou iloa o ia tonu le tagata sa taitaiina mai iai ma’ua.”
Sa valaaulia e Mr. Hu ia faifeautalai i totonu ma talia, e aunoa ma se fesili, le la lesona muamua e uiga i le manaomia mo perofeta o aso e gata ai. “Talu ona vaaia e Iosefa Samita ia le Atua ma Iesu Keriso ma o le tagata aupito taua o o tatou taimi,” Sa mafaufau leotele Mr. Hu, “e faapefea ona ou faamamaluina o ia?”
I lana talosaga, sa toe foi atu ai faifeautalai i le aso na sosoo ai e faaauau ona aoao Mr. Hu ma lona aiga. A o faagasolo le lesona, na toe manatua e Elder Poulter se ‘malamalama paepae mama’ na susulu mai le faamalama, peitai e leai se puna e sau ai. Sa ia tusia: “Sa manino i lo’u mafaufau sa o ma iai i luma o le Agaga Paia, e mafai ona iloa atu lona susulu ae faapea foi ona lagonaina.”
Ina ua mae’a ona toe ta’u atu e faifeautalai le tala ia Iosefa Samita mo lona toalua ma le fanau, sa tuuina atu e Mr. Hu lana molimau ma tuu atu lana lava lesona i lona aiga e faalagolago i ana faitauga o se pepatufa sa tuu iai e faifeautalai i le aso muamua. “O lona malamalama ma le faamaoni sa matuai malualii lava,” Sa toe manatua e Elder Poulter. Sa faaiu e Mr. Hu e ala i lona faapea mai o nei faifeautalai o vaa ma ipu o le upumoni, ona fesili lea mo se faatagana e faaliliu ai le pepatufa ina ia mafai ona ia faasoa atu i ana uo ma tuaoi.
“I le le iloa lelei, sa ou fai atu ua lelei . . . sa o ma fiafia lava e vaaia ia Mr. ma Mrs. Hu ma le la fanau teine e toalua i le lotu i le Aso Sa na sosoo ai.” Ona, toe siitia foi lea o Elder Poulter. Ao faasauni e tuua le eria sa ia amata ai ona teu ni tusi sa tuu atu e lona tama ia te ia mo le misiona. Faatasi ai ma tusitusiga paia e fa, sa aofia ai le, Sauniga o le Faatuatua, Na Faamatala e Iosefa Samita Lana Lava Tala, ma le tusi a James E. Talmage, O le Liliuese Tele. “Sa ou maua se uunaiga malosi e ave atu ia tusi uma ia Mr. Hu i le aso na sosoo ai . . . sa mauina ia [tusi] i le olioli ma le faafetai. O le taimi mulimuli lena na ou faalogo ai ile aiga o Hu i la’u misiona.”
Ina ua ia toe foi atu i le fale, sa lagona e Elder Poulter le lotovaivai ma le maasiasi e uiga i le taunuuga faatauvaa o lana misiona tolu tausaga i le misiona. I lea taimi, na suia lana vaaiga ma i se 40 tausaga mulimuli ane, sa musuia o ia e faasoa atu lona aafiaga i se vasega o le Aoga Sa.
“Sa ou faasoa atu la’u molimau e faapea o la tatou vaega i le fuafuaga a le Alii e le faapea o le a iloa i taimi uma. Ou te lei iloaina lava pe o le a se tulaga na oo iai le aiga o Hu, [ae] e tatau ona ou iloa; o le faia o le galuega a le Alii o lona lea taui.”
Tolu aso na sosoo ai, sa maua ai e Elder Poulter se tusi lea sa momoliina atu ia te ia e ui mai i se faifeautalai i Taipei. Sa aumai ia Mr. Hu Wei Yi. I le tusi, o Uso Hu, lea ua silia lona 80 tausaga, ua toe faamatalaina le papatisoga o lona aiga ma ripoti mai sa avea o ia ma peteriaka, o se faifaamauga i le malumalu ma sa vaetofia foi e Peresitene Spencer W. Kimball e avea ma faaliliu upu.
O le lisi o igoa o tusi sa faaliliuina e Uso Hu e aofia ai tusi uma sa tuuina atu ia te ia e Elder Poulter, faaopoopo ma le tele o isi tusi, “ma sa ou faitau lea, O Le Tusi a Mamona. Sa le talitonu la’u vaai,” sa tusia e Elder Poulter. Ioe, le Tusi a Mamona, o le upu faaalia a le Atua sa faaliliuina i le gagana lona lua aupito taatele lona tautalagia i le lalolagi, e ala mai i se alii lotomaualalo o le na saunia e le Alii e feiloai i se soa o faifeautalai faatuatua.
“O le tala a lo’u tamamatua sa faailoa mai ia te au e faapea tatou te le iloa soo le ituaiga o aafiaga tatou te maua pe a faasoaina atu le talalelei,” ua atagia mai e Elder Stolt, “ae e iai lo tatou aafiaga.” O le faitauina o tusi o le misiona a lona tamamatua sa ia maua ai le tali sa ia manaomia e auauna ai i lana lava misiona.
“I le taumafai ai e faia le galuega a le Alii, o le lesona ua ou iloa e moni o le e tatau ona taumafai i lo tatou malosi, faaalia le faatuatua ia Keriso, ma o le a tulaga lelei mea uma.”