Tedei Hem I Dei blong Serem Gospel blong Sevya

Presiden Russell M. Nelson i bin talemaot, “I neva bin gat wan taem long histri blong wol we i save abaot Sevya blong yumi i moa impoten long wanwan man o woman, mo i moa tru long evri sol blong man” (“Trutok we I Stret Gud, Doktrin we I Stret Gud, mo Revelesen we I Stret Gud,” Liahona, Novemba 2021, 6). Hemia i from wanem yumi akseptem invitesen blong Sevya mo komanmen blong Hem blong serem gospel blong Hem (luk long Matiu 28:19).

Hemia hem i wan impoten wok we evriwan i save tekempat long hem. Long namba ia, Elda Quentin L. Cook blong Kworom blong Olgeta Twelef Aposol i tijim se “ol janis oli stap evri ples blong helpem ol narafala man oli kam long Kraes, taem yumi serem ol biliv blong yumi, mo invaetem olgeta blong joenem yumi blong eksperiensem glad blong gospel ia blong Jisas Kraes” (pej 4).

Mifala i talem tangkyu long evri yang man mo woman we oli givim seves long wan tijing o wan seves misin, be olsem we mi talem long atikol blong mi long namba ia, “Yumi nidim, moa, plante moa, long ol laen long fored—wan ami blong ol misinari mo memba.”

“Tedei hem i dei ia,” mi serem tu se, “blong yumi save soem fasin blong yumi mo strong paoa long tingting mo blong serem gospel blong Jisas Kraes” (pej 40). Taem yu stadi long ol hadwok blong Amon, Abis, mo ol narawan long Buk blong Momon long manis ia, mi invaetem yu blong luklukbak long olsem wanem yu save serem glad ia blong gospel blong Sevya wetem olgeta raon long yu.

Elda Eduardo Gavarret

Blong Olgeta Seventi