“Tufala Trutok We I Helpem Mi blong Andastanem Fasin blong Gat Tingting We I Stap Daon,” Liahona, Julae 2024.
Ol Yang Adalt
Tufala Trutok We I Helpem Mi blong Andastanem Fasin blong Gat Tingting We I Stap Daon
Fasin blong gat tingting we i stap daon, i save help wetem ol filing blong gat hae tingting mo tu ol filing we yu filim taem yu ting se yu no inaf.
Foto blong ol memba long Paragwe, we i kam long Leslie Nilsson
Wan trutok: Mi mi wan pikinini blong God. Mo hemia i wan tabu trutok we i gud tumas.
Wan trutok we i impoten semmak: From se evriwan long wol ia tu oli ol pikinini blong God, olgeta tu oli ol tabu man o woman we oli gud tumas.
I isi blong luksave se tufala trutok ia oli tru, be i tekem mi sam taem blong akseptem fulwan mo andastanem wanem i minim long laef blong mi. Samtaem mi gilti blong go tru wan situesen wetem hae tingting, mo blong tingting se wei blong mi i raet wei o we mi mi save mekem moa gud bitim ol narawan. Long ol nara taem, mi mekem oposit, we mi filim se mi no klin inaf o gat valiu olsem ol narawan raon long mi.
Ansa blong tugeta hadtaem ia i semmak:
Fasin blong gat tingting i stap daon.
?Mi Mi No Inaf?
Wan eksperiens we i bin rili mekem mi mi putum tingting blong mi i stap daon, i bin hapen long misin blong mi. Mi ting se plante misinari oli stap gat hadtaem wetem ol filing ia se oli no inaf, taem oli stap traem blong karem ol pipol i kam long Jisas Kraes. Long misin blong mi, mi bin spendem ol aoa long wan dei, jes blong traem blong faenem wan blong tijim mo oli no akseptem mi bakegen mo bakegen. Mi no bin filim se mi gat sakses. Mi no bin filim se ol hadwok blong mi oli inaf. Long en, mi stat blong filim se mi mi no inaf.
Maet bae i luk olsem fasin blong gat tingting we i stap daon, i no wanem we mi nidim, taem mi bin eksplenem ol filing blong mi long misin presiden, hem i bin helpem mi blong luk se wan pat blong problem blong mi, hem i blong stap tingting se bae mi mi no go tru long ol problem we evri misinari raon long ful wol, oli stap go tru long hem. Be mi mi no fas misinari we mi filim se oli no akseptem mi, mo mi sua se bae mi mi no las wan.
I hapen se mi bin winim tingting blong miwan blong tingting se ol hadtaem blong mi, oli from rong blong miwan nomo, nomata long trutok ia se sam long ol bes misinari long histri—olsem ol fas Twelef Aposol, ol boe blong Mosaea, mo Yangfala Alma—oli bin go tru ol hadtaem we oli moa bigwan bitim blong mi.
Mi nomo filim sori long miwan, be mi stap blong save filim se mi stap stanap tugeta wetem Jisas Kraes long ol hadtaem blong mi. Mo taem mi filim sem long ol hadwok blong mi we oli no stret evriwan, mi tingbaot wanem we Presiden Jeffrey R. Holland, Akting Presiden blong Kworom blong Ol Twelef Aposol, i bin tijim: “Atonmen [blong Kraes] bae i karem ol misinari, mo maet impoten moa, bae i karem ol investigeta. Taem yu traehad, taem oli no akseptem yu, … yu stap stanap long wan bes laef we wol i neva save, laef ia nomo we i klin evriwan mo stret evriwan, we i eva laef long wol ia.”
Mi stap luklukbak long eksperiens ia yet taem mi nidim blong tingbaot blong putum tingting i stap daon mo trastem Lod.
Wan Lesen abaot Fasin blong Gat Tingting We I Stap Daon
Mi bin lanem fulap abaot aedentiti blong mi olsem wan pikinini blong God taem mi stap long misin blong mi. Be afta we mi kambak long haos, mi kam blong luksave se mi gat fulap samting yet blong lanem abaot hamas i impoten blong stap tingbaot se ol nara pipol oli ol pikinini blong God tu.
I no long taem afta we mi kambak long misin, oli bin putum mi long wan had koling mo blong lukluk long wan impoten taem. Mi filim se i tumas, mo mi no save kasem ol pipol we oli sapos blong stap helpem mi. Mi bin sendem wan imel we i talem tru samting be wetem ol strong toktok lelebet.
Mi mi raet se koling ia i impoten, mo we mi nidim moa sapot, be kwiktaem, mi luksave se maet hemia i no bes wei blong pusum tingting blong pipol. Mi nidim tingting we i stap daon; mi nidim blong tingbaot se maet ol nara pipol ia oli gat ol samting blong olgetawan we oli wari fulap long hem.
Olsem we Elda Steven E. Snow i bin tijim taem hem i wan memba blong Ol Seventi, “Sapos yumi gat tingting we i stap daon, bae yumi kasem ansa long ol prea blong yumi; bae tingting blong yumi i no trabol; bae yumi mekem gud moa long ol koling blong yumi; mo sapos yumi gohed wetem fet, bambae long las dei bambae yumi save kam bak long fored blong Papa blong yumi long Heven.”
I tru, mi bin filim moa glad long koling blong mi mo long laef blong mi taem mi lanem blong save stap putum tingting blong i stap daon.
Stap Balensem Tufala Trutok Ia
Long mi, blong stap lanem tru fasin blong gat tingting we i stap daon, hem i blong save stap balensem tufala trutok ia:
Mi mi Pikinini blong God. Mo ol nara pikinini blong God oli stap raon long mi.
Taem mi bin lanem moa abaot fasin blong gat tingting we i stap daon, mi kam blong luksave wanem we Elda Quentin L. Cook blong Kworom blong Olgeta Twelef Aposol i bin tijim we i tru: “Fasin blong gat tingting we i stap daon i no wan bigfala samting we yu winim we ol man bae oli luksave o blong stap winim wan bigfala jalenj. … Hem i blong gat kwaet tras long yuwan se, dei afta dei, aoa afta aoa, yumi save dipen long Lod, wok blong Hem, mo mekem ol tingting blong Hem oli kamtru.” Mi bin lanem se mi rili save winim ol stamba tingting blong Lod—be mi save mekem nomo taem mi givim wanem we mi wantem i go long Lod mo trastem se Hem i save wanem we i bes.
Mi save se taem yumi traehad blong gat tingting we i stap daon moa mo kam olsem Kraes, Papa long Heven bae i blesem ol hadwok blong yumi.
Hem we i raet i stap long Frankfurt, Germany.