“Mesej blong Mi we i kam long God,” Liahona, Julae 2024.
Ol Voes blong Ol Lata–dei Sent
Mesej blong Mi we i kam long God
Mi no bin gat wan testemoni abaot Buk blong Momon kasem taem Lod i bin toktok long mi tru long buk blong Hileman.
Hem we i raet i glad blong givim pikja ia
Taem wan fren i bin invaetem mi i kam long Jos Ia blong Jisas Kraes Ia blong Ol Lata-dei Sent long 2020, mi agri kwiktaem. Fastaem, mi no bin filim se mi sapos blong stap long ples ia, be mi gohed blong go long sakramen miting. Long en, mi kasem baptaes.
Be, mi no bin andastanem aedia ia blong gat wan testemoni we ol nara memba blong Jos oli stap tokbaot se oli gat. Ol sista misinari mo mi i bin ridim sam ves long skripja tugeta, be mi neva openem Buk blong Momon miwan. Nomata long ol bigfala efot blong ol memba blong Jos blong welkamem mi mo mekem mi stap aktiv, mi stat blong stap kam let long jos, no stap go long ol klas, mo stap gobak long laef blong wol ia.
Be afta wan dei, mi bin filim wan defren filing mo hat blong mi i trabol. Mi filim se mi no stanap strong, mi laekem ol samting blong wol, mo mi no stap agri long ol samting blong God. Mi luksave se mi no stap long stret rod. Taem mi stap filim filing ia, mi lukluk i go long ol skripja long bed blong mi.
Mi singaot long God blong i talem wan samting long mi. Mi mekem wan smol prea mo wet se bae mi harem wan samting. Mi nidim sam kamfot mo blong lukluk klia.
Afta mi harem wan samting. Mi no save sapos saon ia i kam insaed long maen blong mi o insaed long sora blong mi, be mi harem ol toktok ia “Hileman 3:27.” Mi save se buk blong Hileman i stap insaed long Buk blong Momon, mekem se mi tekem ol skripja mo go long ol samting we i stap insaed long buk, blong faenem buk blong Hileman.
Wanem we mi bin ridim hem i wan mesej we i kam long God long mi blong taem ia long laef blong mi: “Olsem ia nao yumi save luk se Lod i gat sore long olgeta evriwan we bae oli singaotem tabu nem blong hem wetem ol tru hat blong olgeta.”
Ves ia i bin jenisim lukluk blong mi abaot ol aksen blong mi mo abaot Buk blong Momon. Mi luksave se ol aksen blong mi fasin blong giaman hat blong mi long God, i bin rong mo mi nidim blong singaotem Hem mo sakem sin. Mi save God bae i no blokem ol sore mo blesing blong Hem long mi, sapos mi singaotem Hem wetem wan truhat mo stap folem Hem.
Hemia i olsem wanem mi kasem testemoni blong mi abaot Buk blong Momon—wan buk we mi no bin intres blong ridim. Mi save se God i stap laef, se Hem i stap toktok long yumi tedei, mo we Buk blong Momon i tru.