“Wan Naesfala Fasin blong Stap Rere from Laef,” Liahona, Julae 2024.
Wan Naesfala Fasin blong Stap Rere from Laef
Wanem we ol yang man mo woman oli lanem long misin blong olgeta bae i blesem laef blong olgeta blong oltaem.
Taem mi yangfala, oltaem mi laekem tumas glad blong wok ia blong ol misinari. Long taem blong wan sakramen miting long smol branj blong mi long Minas, Urugwe, wan misinari i bin serem testemoni blong hem mo i serem ol filing blong hem abaot misin blong hem. Ol toktok blong hem i stap long maen mo hat blong mi.
“Wan dei,” mi talem long miwan, “bae mi go long wan misin.”
Sam taem afta, olsem wan pris, mi gat janis ia blong folem ol misinari blong stap long ol lesen blong olgeta we oli stap tijim. !Hem i wan eksperiens we mi no save fogetem, blong stap olsem wan misinari taem mi gat 16 yia nomo!
Taem mi kasem 18 yia blong mi, sam yang pipol long branj blong mi oli kambak long misin blong olgeta, mo sista blong mi Ana i wan long olgeta we i kambak long wan misin long Ajentina. Ol eksperiens mo testemoni blong olgeta i tajem hat blong mi.
Taem 19 yia blong mi i stap kam kolosap, mi wantem blong givim nem blong mi blong go fored mo talemaot gospel blong Sevya mo wok long plantesen blong Hem (luk long Doktrin mo Ol Kavenan 75:2). Mi bin rere mo sendem ol pepa blong misin blong mi i go. Taem kol blong mi i kam, mi openem leta we Presiden Spencer W. Kimball i saenem, mo ridim se bae mi givim seves long Yurugwe/Paragwe Misin. !Bae mi givim seves long kantri blong mi bakegen! Mi glad long janis blong talemaot “ol gudfala nius blong bigfala glad, we i gospel we i no gat en.” (Doktrin mo Ol Kavenan 79:1).
Mi kam long misin ofis afta we mi travel tu aoa long bas i go long Montevideo, Yurugwe. Misin presiden i set apat long mi olsem wan misinari blong Jos Ia blong Jisas Kraes Ia blong Ol Lata-dei Sent mo i asaenem wan kompanion long mi. Long aftenun blong hem nomo, mitufala i stat blong noknok long ol doa.
Long stat, i gat ol taem we misin i no bin gud tumas olsem we mi bin stap tingting long hem. Be tangkyu we mi gat wan kompanion we i save obei mo i save wokhad, we i helpem mi blong faenem glad ia blong fogetem miwan insaed long seves blong Lod. Eksampol blong hem i bin blesem mi truaot long ful misin blong mi.
Be fasin blong mi blong rere blong stap olsem wan ripresentativ blong Sevya Jisas Kraes, i bin stat long taem bifo finis.
Evri Samting I bin Stat wetem Wan Klip blong Nek Tae
Long Jenuware 1962, taem mi gat sikis yia, ol misinari oli kam long stoa blong papa blong mi we i stap salem ol ring mo nekles, mo oli stap lukaotem wan klip blong tae we oli bin lusum. Taem oli stap long we, oli harem wan man i stap plei long gita. Taem oli askem, papa blong mi invaetem olgeta blong kam insaed mo mitim fren blong hem.
Long taem blong storian blong olgeta, papa blong mi mo fren blong hem oli askem ol misinari sapos oli save plei gita. Wan elda i talem se hem i save plei smol. Fren blong papa blong mi i givim gita long hem mo askem hem blong plei. Hem i stat blong plei sam singsing mo kompanion blong hem i stap singsing.
Blong lukaotem wan klip blong nek tae, i lidim tufala misinari blong introdiusum gospel blong Jisas Kraes long famli blong mifala. Mifala i kam ol gud fren wetem ol misinari mo stat blong stap lisin long ol lesen. Oli planem sid blong gospel, mo i stat blong gro, faswan long mama blong mi, Elsa, mo ol sista blong mi, Ana mo Stella, mo afta mi.
Stat long dei ia, lav ia blong mekem misinari wok i stat blong gro insaed long famli blong mi. Mi bin go long wan misin, ol boe blong mi oli bin go long ol misin, mo naoia ol apu pikinini blong mifala oli stap stat blong rere blong go long ol misin, we i mekem nambatri jeneresen blong ol misinari.
I no oltaem isi blong stap olsem wan misinari. I nidim fasin blong stap rere, bifo wan yang man o woman i rere blong go long wok blong misin. Long ples ia, ol papa mo mama, famli, mo ol lida blong Jos oli save stap ol gud eksampol mo wok olsem wan tim blong rere long ol yut long taem oli smosmol.
Wan wei blong helpem olgeta blong rere, i blong serem ol skil blong stap laef wetem olgeta. Ol skil olsem stap sevem mane, wasem mo aeanem klos, somap, saenem sus, kuk, toktok long ol narawan, mo givim seves long ol narawan, bae i save helpem olgeta long misin blong olgeta. Blong stap tekpat long seminari mo institiut i save help tu blong rere long olgeta mo i helpem olgeta wetem wanem we oli lanem long hom mo long kworom mo klas blong olgeta.
Sapot blong yumi i mas gohed taem oli stap long misin blong olgeta. Hem i naes tumas blong harem ol naesfala eksperiens we ol misinari oli stap gat kolosap evri dei. Yumi save stap pat tu long ol eksperiens ia taem yumi go aot mo helpem olgeta we oli stap tijim. Eksampol, mama blong wan long ol misinari we i bin tijim famli blong mifala i bin kontaktem mama blong mi mo i stap raet i go long hem blong plante yia, mo i stap helpem mama blong mi blong stap long kavenan rod.
Taem yumi stap helpem ol fiuja misinari blong rere, yumi mas tingbaot se misinari wok i moa bitim wan kastom nomo insaed long Jos—hem i wan invitesen mo komanmen we i kam long Lod (luk long Matiu 28:19). Long stat, oli tijim gospel long Adam mo Iv. Afta, tufala i tijim gospel long ol pikinini blong tufala (luk long Moses 5:6–12). “Mo olsem ia nao oli stat blong prijim Gospel, stat long stat, mo ol tabu enjel we tabu ples blong God i bin sendem olgeta” (Moses 5:58).
Prijing ia i stap gohed naoia wetem wan ami blong moa long 71,000 misinari. Be yumi nidim, moa, plante moa, long ol laen long fored—wan ami blong ol misinari mo ol memba.
Wanem Nao Yumi Save Lanem long Ol Misin blong Yumi
Taem mi stap long misin blong mi, mi lan long misinari wok mo stat blong tingting moa dip abaot mesej blong mifala. Oltaem mi bin filim se gospel hem i tru, be mi gat wan strong tingting blong save se i tru. Mi bin prea, lego kaekae, wok, mo afta wet blong kasem wan ansa.
Long taem blong wan lesen wan dei, mi bin serem storian blong Josef Smit abaot Fas Visen:
“Mi bin luk wan laet, i saen antap i kamdaon, stret antap long hed blong mi, mo laet blong hem i saen bitim laet blong san, mo hem i saen i kamdaon gogo, i kasem mi.
“Taem laet i bin stap antap long mi, mi bin luk tu Man, we i no gat wan toktok we i save tokbaot laet mo glori blong Tufala, mo Tufala i stap flot nomo long ea antap long mi. Wan long Tufala i toktok long mi, i singaotem nem blong mi, mo talem wetem fingga blong Hem i poenem narawan—Hem, Hem i Pikinini blong Mi we Mi Lavem Tumas. !Lisin gud long hem!” (Josef Smit—Histri 1:16–17).
Long taem ia, mi save filim Tabu Spirit i konfemem long mi se wanem mi stap tijim hem i tru. Profet Josef Smit i tru se hem i bin luk Papa mo Pikinini, mo Buk blong Momon hem i tok blong God mo, wetem Baebol, tufala i testifae abaot Sevya blong yumi. Hemia i karem pis i kam long sol blong mi. Iven afta plante yia, eksperiens ia i stil tajem hat blong mi.
Misin blong mi i olsem blong kasem wan masta digri long saed blong spirit. Wanem we ol yang man mo woman oli lanem long misin blong olgeta bae i blesem laef blong olgeta blong oltaem. Long medel blong plante samting, oli lanem:
-
Olsem wanem blong stadi, prea, tij, mo yusum ol gospel prinsipol evri dei.
-
Olsem wanem blong laef wetem wan kompanion blong 24 aoa long wan dei.
-
Olsem wanem blong lukaot gud long helt blong olgeta.
-
Olsem wanem blong mekem plan.
-
Olsem wanem blong mekem ol lidasip skil oli kam moa gud.
-
Olsem wanem blong andastanem ol nara pipol long stret fasin.
-
Olsem wanem blong lukaotem, lisin long, mo letem Tabu Spirit i lidim yu.
Ol yang man mo woman we oli go long misin bae oli kam strong moa mo rere blong go tru ol jalenj blong laef, taem oli gohed blong yusum wanem we oli lanem long misin blong olgeta.
Tedei Hem I Dei Ia
Profet blong yumi we yumi lavem, Presiden Russell M. Nelson i tijim:
“I neva bin gat wan taem long histri blong wol we i save abaot Sevya blong yumi i moa impoten long wanwan man o woman, mo i moa tru long evri sol blong man Traem tingting. Ol nogud raorao oli go kwik raon long wol—mo olgeta long wanwan laef blong yumi—bae oli stretem olgeta sapos yumi evriwan i jusum blong folem Jisas Kraes mo mekem folem ol tijing blong Hem.”
Tedei hem i dei blong yumi soem fasin mo strong paoa long tingting mo blong serem gospel blong Jisas Kraes. Tedei hem i dei blong ol yang pipol blong rere blong givim seves long fil blong Lod blong faet, long wan misin blong stap tij o givim seves. !Wol i nidim yufala! I gat ol ni we oli nidim moa paoa, ol han blong leftemap, mo trutok blong prijim (luk long Doktrin mo Ol Kavenan 81: 5).
Letem invitesen ia blong Lod i tajem hat blong yumi blong mekem mo leftemap flag blong trutok wetem paoa:
“Luk, mi talem long yufala, se hem i tingting blong mi blong yufala i go …
“Leftemap voes blong yufala semmak olsem saon blong wan pupu, mo stap talemaot trutok folem ol revelesen mo ol komanmen we mi bin givim long yufala.
“Mo olsem ia nao, sapos yufala i stap fetful, bambae yufala i kasem antap long hed blong yufala, ona, mo glori, mo fasin blong nomo save ded, mo laef we i no save finis.” (Doktrin mo Ol Kavenan 75:3–5).