“Bodi blong Yu: Stap Lukaot Gud long Tabu Presen Ia,” Liahona, Julae 2024.
Bodi blong Yu: Stap Lukaot Gud long Tabu Presen Ia
Ol bodi blong yumi oli ol presen we i kam long God mo oli ol tempol blong spirit blong yumi, be i nidim blong yumi mas lanem gud mo kontrolem yumiwan blong fidim mo lukaot gud long olgeta.
Hem i isi blong yumi profite long helt blong yumi—yumi stap drink 10 soda long wan dei, wan stael blong laef we yumi sidaon fulap mo no silip gud; yumi mekem ol fasin ia kasem taem ol samting ia i spolem helt blong yumi. O maet nomata long ol helti joes yumi stap mekem, wan sik we i folem laen blong famli i kasem yumi mo yumi sik.
Yumi evriwan i gat ol defdefren level blong helt long bodi we yumi no save kontrolem oltaem. Be wan samting we i sua mo tru: Plan blong God i wantem blong yumi mekem wanem we oli givim long yumi i kam moa gud. Blong mekem hemia i nidim semmak fasin blong save kontrolem yumiwan mo dedikesen we yumi nidim blong fidim helt blong spirit blong yumi. Hemia i minim blong kontrolem nomol fasin blong yumi sidaon be i no ron, blong kakae swits be i no ol vejetebol, mo blong wekap let be i no blong silip.
Taem yumi lukaotem insperesen blong mekem helt blong bodi blong yumi i kam moa gud mo developem fasin blong yumi blong kontrolem yumiwan blong yumi save lukaot gud long helt blong yumi, bae yumi faenem wan paoa we i moa bigwan blong givim seves long God mo faenem glad.
Bodi blong Yu I wan Tempol
Ol sol oli gro gud taem oli lukaotgud long spirit mo bodi. “Mo spirit mo bodi oli sol blong man” (Doktrin mo Ol Kavenan 88:15). Presiden Russell M. Nelson i serem ves ia mo i tijim se bodi mo spirit “oli impoten tumas. Bodi blong yu i wan naesfala kriesen blong God. Hem i tempol blong Hem mo blong yu tu, mo yumi mas tritim wetem fasin blong reveren.”
Presiden Nelson we i gat 99 yia, i gohed blong mekem ol wok blong hem olsem Presiden blong Jos, nomata we samtaem hem i yusum wan stik blong wokbaot blong balensem hem, mo i laekem moa blong sidaon mo givim ol toktok blong hem blong konfrens. “Wan wan taem, mi stap gat wan smol jalenj wetem balens blong mi,” hem i bin raetem long wan sosol media pej blong hem long Mei 2023. “Mi ting se mi no nid blong sapraes taem ol smosmol problem olsem i stap hapen taem mi stap kam kolosap long 100 yia blong mi. Mi tangkyu se hat blong mi i gud, mo spirit blong mi i strong semmak long ol leg blong mi, mo bren blong mi i wok yet.”
Plante oli save gud Presiden Nelson from ol gudgudfala fasin we hem i stap mekem blong lukaot gud long helt blong hem mo stael blong laef blong hem we i aktiv. Oltaem hem i gat wan gudfala bodi mo hem i wok had blong stap olsem. Hem i stap eksasaes oltaem mo i laekem blong stap aotsaed. Taem hem i stap long ol 90 yia blong hem, hem i stap savelem sno long rod blong wokbaot long haos blong hem mo neba blong hem, pusum bak tin blong toti i gobak long garaj, mo i wok long yad blong hem. Hem i stap go ski plante taem olsem we taemtebol blong hem i save letem hem blong mekem, kasem taem hem i kam Presiden blong Jos.
Stap Developem Fasin blong Kontrolem Yuwan
Yumi save ol stamba samting blong gat gud helt blong bodi:
-
Eksasaes oltaem.
-
Slip inaf.
-
Kaekae ol kakae blong evri tri grup blong kaekae.
-
Kipim wan helti wet.
-
Manejem wari.
Trik hem i blong mekem bodi blong yumi blong i mekem wanem we spirit blong yumi i save se hem i mas mekem. Folem ol toktok blong Presiden Nelson, wan long ol tes blong laef long wol ia i blong lanem gud ol kaekae blong bodi blong yumi we spirit blong yumi i stap laef long hem:
“Setan i save paoa blong ol kaekae blong yumi. Mekem se hem i stap temtem yumi blong kakae ol samting we yumi no sapos blong kakae, blong drink ol samting we yumi no sapos blong dring. …
“Taem yumi save gud abaot tabu fasin blong yumi, bae yumi wantem blong kontrolem ol kaen kaekae olsem. … Long ol evri dei prea blong yumi, letem yumi talem tangkyu [long God] olsem Krieta blong yumi mo talem tangkyu long Hem from naesfala bodi blong yumi we i tempol blong yumiwan. Bae yumi lukaotgud long hem olsem wan presen blong yumiwan we i kam long God.”
Stap Fidim Fasin blong Stap Talem Tangkyu mo Stap Faenem Glad long Bodi We God I Givim long Yumi
Taem mi gat 27 yia, mi wan mama blong tri pikinini, mo mi kasem wan sik we hem i rumatoid atraetis, wan sik we sistem blong bodi we i stap faetem sik, i stap spolem ol joen blong bodi ova long taem. Mi nomo gat kontrol long laef blong mi long saed blong bodi mo tingting. Hemia i mekem mi tanem mi i go long God from help blong save karem bak kontrol long tingting blong mi mo karembak gudfala helt we mi bin gat bifo we mi no bin luksave.
Mi askem help long wan saekatris from wari blong mi. Mi wok wetem wan dokta blong rumatoid atraetis blong save wanem meresin mi sapos blong tekem mo mi yusum ol meresin blong graon tu. Mi neva givap. Afta plante yia mo harem nogud, helt blong mi i stat blong kam moa gud long saed blong bodi mo tingting.
Mi tingbaot wan aftenun we mi bin wokbaot pasem wan ples we i fulap long ol wael flaoa mo wan lek long maonten. Wota blong ae blong mi i stap ron taem mi talem tangkyu long God blong save blesem mi wetem wan bodi mo paoa blong mi blong save mekem wan samting we mi ting se bae mi nomo save mekem. I nogat wan tritmen we i save hilim sik blong mi, mo oli save luksave we sik ia i spolem bodi blong mi. Be mi kam blong laekem tumas blong stap wokbaot longfala ples mo blong stap eksasaes, mo nomo profite long helt blong mi.
Nomata long ol samting we bodi blong mi i nomo save mekem, mi bin save givim seves olsem wan senia misinari wetem hasban blong mi long Wasington, YSA (!we i wan ples we plante oli stap go wokbaot long hem!) i no long taem i pas. Mi talem tangkyu we mi save givim seves truaot long laef blong mi long kolosap evri Jos koling we i stap blong mi mekem.
Olsem we Presiden Nelson i talem: “Letem yumi oltaem talem tangkyu from naesfala blesing ia blong gat wan naesfala bodi, we i kriesen blong Papa long Heven we i moa hae bitim evri nara samting we Hem i krietem. Bodi blong yumi i gud tumas, be hem i no en long hemwan. Hem i wan impoten pat long bigfala plan blong God blong stap glad mo blong fasin blong yumi blong gro, we i no save finis.”