“No Mestem Janis long wan Senia Misin,” Liahona, Julae 2024.
Stap Kam Olfala long Wan Fetful Wei
No Mestem Janis long wan Senia Misin
Ol kavenan blong yumi i invaetem yumi blong givim seves long yumi wanwan, stanap olsem wan witnes blong God, mo givim kamfot long olgeta we oli nidim. Blong stap givim seves olsem wan senia misinari i wan wei blong mekem ol invitesen ia oli kam tru, blong blesem laef blong yumiwan mo olgeta we yumi givim seves long olgeta.
I gat 34,000 senia misinari we oli stap givim seves fultaem o oli stap long ol seves misin naoia we, olsem ol yangfala fren blong olgeta, oli stap faenem plante glad long wokbaot ia. Ol singgel mo ol kapol oli save givim seves olsem ol senia misinari long ol defdefren kaen asaenmen.
Mo ol nid blong ol wok ia i impoten. Long Oktoba 2023 jeneral konfrens, Elda Ronald A. Rasband blong Kworom blong Olgeta Twelef Aposol i leftemap tingting blong ol memba we oli moa olfala blong tingting blong go long wan senia misin. Hem i askem: “?Yu stap mekem wanem long level ia blong laef blong yu?’ I gat plante wei we ol senia misinari oli save mekem wanem we ol narafala man oli no save mekem. Yu yu wan nambawan paoa blong gudfala samting, gat plante eksperiens insaed long Jos, mo stap long wan gudfala ples blong leftemap tingting mo givhan long ol pikinini blong God.”
Presiden Russell M. Nelson i stap eksplenem olsem wanem oli stap singaotem ol senia misinari, mo hem i talem: “Ol janis blong ol senia misinari oli defdefren mo oli bigwan. Oli stap mekem ol koling blong olgeta i kam ofisol, afta long fulap prea mo tingting abaot bakgraon blong wok blong olgeta, eksperiens blong lanwis blong olgeta, mo ol nara paoa we olgeta wanwan oli gat. Aot long evri kwalifikesen blong givim seves, wan tingting blong hat we i wantem blong givim seves i moa impoten evriwan.” Hem i tokbaot tu ol kontribusen blong ol senia misinari se “wan i no save tekem ples blong hem.”
“Sam senia misinari oli wok long misin ofis o wetem BYU–Pathway o ol wok blong yumaniterian we oli planem gud,” wan senia misinari i talem. “Mifalawan mifala i bin wok long ol kaen misin olsem. Mekem se mifala i no sua lelebet taem oli singaotem mifala i go long wan MLS (memba mo lida sapot) misin. Taem mifala i stat, mifala i rili laekem olsem wanem kaen misin ia i save givim mifala janis ia blong visitim ol memba mo mekem ol lokol branj oli kam strong moa.”
Wan senia sista we i stap givim seves long wan senta blong olgeta we oli stap visit, i talem se, “Taem hasban blong mi i ded, mi no sua se bae mi mekem wanem wetem taem blong mi. Naoia mi gat ol samting blong mekem, ol ples blong go long hem, mo ol pipol blong luk olgeta. Mi gat ol pipol we oli stap dipen long mi.”
“I no nid blong yu fraet iven sapos yu no bin go long wan misin taem yu moa yang,” wan sista i talem hemia afta we hem i kambak hom long senia misin blong hem. “Hem i wan niu wok blong evriwan. Yumi evriwan i lanem tugeta blong dipen long Lod semmak long wanwan long yumi, mo faenem se ‘tru long ol smol mo ol samting we i no strong, ol bigfala samting i kam blong hapen’ [Alma 37:6].”
Ol Blesing blong Ol Misinari
Ol senia misin oli defdefren semmak long ol senia misinari. I gat evri kaen—wanwan wetem ol jalenj, glad, mo gud blong olgetawan. Be i gat sam samting we oli semsemmak blong eni kaen senia misin: skripja stadi we i gat mining, ol tru prea we i stap hapen oltaem, seves we oli givim olgeta fulwan long hem, Tabu Spirit we i gogohed blong lidim olgeta, mo wan janis we i no semmak long ol narawan, blong mekem wan samting i defren.
“Mi neva filim moa kolosap long Lod bitim taem we mi stap givim seves olsem wan senia misinari,” wan senia misinari i talem. “Mi save se sam samting mi no save kontrolem, speseli long hom wetem ol pikinini mo ol apu pikinini. Mekem se mi putum ol samting long han blong Lod. Mo Hem i bin blesem famli blong mifala. Mifala i moa kolosap long ol apu pikinini blong mifala taem mifala i stap Zoom evri wik, bitim we mifala i stap go visitim olgeta. Mifala i tokbaot ol samting we bae oli neva intres long hem bifo. I no stap hapen long evriwan, be long mifala, wan long ol boe blong mifala i kambak long jos taem mitufala i stap long misin, mo wan nara boe blong mifala i mared bakegen mo afta i sil long tempol.”
Wan nara senia misinari i talem se, “Evri dei skripja stadi blong miwan mo kompanion blong mi i gat moa mining from mitufala i stap lukaotem ol wei blong yusum ol skripja, be i no blong stap ridim nomo. Mi no stap wantem blong rid ‘i go long we nomo,’ olsem we mi bin stap mekem samtaem long pas. Long seves blong mitufala, i luk olsem plante taem mi stap tokbaot mo tingting bak long wan skripja we mitufala i bin ridim long dei ia o wik ia, mekem se mi stat blong yusum ol skripja we mi jes ridim nomo long dei ia. Mi nomo stap tokbaot o tingting long ol skripja we mi ridim longtaem finis, blong mekem se bae mi save tokbaot o tingting long wan samting we mi jes ridim long dei ia.”
“Blong givim seves long wan misin i givim mi wan niufala mining long laef,” wan senia sista i talem. “Hem i givim mi wan stamba tingting we i gat moa mining, wan niufala paoa blong stap laef, mo wan samting blong mekem we i bitim blong stap plei golf mo lukaotem ol apu pikinini blong mi.”
“Seves hem i wan tu wei strit,” wan nara senia misinari i talem. “Taem mifala i gat tingting ia blong—mekem samting we mifala i ting se i stret blong mekem—abaot hamas mifala i stap mekem blong ol narawan, bae mifala i nogat tumas sakses. Be taem mifala i luksave hamas mifala i stap lanem samting mo stap gro mifalawan, mifala i no jenis nomo be ol narawan oli intres moa long wanem mifala i stap talem mo mekem. Mifala i sakem bred long wota nomo, be taem i kambak, i luk olsem oli batarem bred.”
Ol Rilesensip We Oli Moa Strong
Taem ol pipol oli wok olsem ol senia misinari, oli developem ol rilesensip we oli stap blong wan laef taem. Plante oli gro i kolosap long ol pipol we oli givim seves long olgeta. Oli bildim tu ol strong rilesensip wetem ol nara misinari mool lokol lida. “Mifala i bin krietem ol frensip wetem ol yangfala misinari, ol nara kapol, mo ol pipol we bae mifala i neva save mitim sapos mifala i stap long haos nomo,” wan senia misinari i talem. “Mifala i stap toktok yet wetem mifala. Long wan taem, mi ting se bae evri dei i semmak, blong go long wan misin i bin givim wan fres stat mo ol niu fren blong serem wokbaot ia wetem mifala.”
Ol senia misin oli save helpem ol kapol blong mekem ol mared blong olgeta i kam moa strong tu. Taem ol pipol oli spel blong wok o daonem taem blong stap wok, ol kapol oli faenem se oli nidim blong tingting long wan nara stamba tingting blong stap tugeta from se oli nomo nidim blong stap lukaotem ol pikinini long hom blong olgeta. Maet oli save nomo blong stap mekem samting olgetawan long ol taemtebol blong olgetawan. Blong stap kam olfala mo finis long spel blong wok i save jenisim hemia tu. Blong statem wan niu eksperiens we tufala i serem tugeta, sapos i blong givim seves long hom o fultaem long wan senia misin, i save help blong givim wan niu stamba tingting blong wan kapol mo mekem tufala i dipen moa long wanwan long tufala.
“I gat wan olfala toktok se taem yu spel blong wok ‘yu winimbak haf mane be yu winim hasban blong yu tu taem moa,’” wan sista i laef mo talem hemia. “Blong givim seves long wan misin long wan ples long we long hom i save letem mitufala blong tokbaot ol jenis ia long ol wei we bae mitufala i no save tokbaot olsem bifo mitufala i kam long misin. Afta we hasban blong mi i spel blong wok, taem mitufala i stap rao, mitufala i no stap tokbaot ol samting. Naoia, mitufala i nomo wanwan mo no toktok long mitufala, mitufala i no wantem gat wan nogud spirit taem mitufala i stap mekem wok blong Lod, mekem se mitufala i tokbaot ol samting we i trabolem mitufala.”
“Waef blong mi mo mi i stat blong toktok evri naet abaot gladhat mo sore blong Lod we mitufala i stap gat evri dei taem mitufala i stap givim seves,” wan senia misinari i talem. “I no helpem mitufala nomo blong lukluk moa long wanem i hapen mo no lukluk tumas long mitufala, be i givim wan janis tu long mitufala blong luk gud fasin raon long mitufala taem ol pat blong dei ia i no bin go gud.”
“Mo from se hem i las samting we mitufala stap mekem evri naet,” waef blong hem i ademap, “mitufala i no wari tumas taem mitufala i go silip mo mitufala i stap silip moa gud bitim plante yia we i pas. !I helpem mi blong slip moa gud tu!”
Ol Blesing blong Olgeta we Oli Stap Givim Seves
Laef i gat ol gud taem mo nogud taem—ol gud dei blong hem mo ol nogud dei blong hem. Ol misin oli semmak. Be blong stap givim seves long Lod i gat plante blesing blong hem, i no afta we misin i finis nomo, be tu long taem blong misin. Olsem we kasen blong Esta, Modekae i talem “?Be naoia, hu i save? Maet yu yu kam kwin long taem ya, blong bambae yu save givhan long yumi long hadtaem ya” (Esta 4:14; oli ademap long italik). Taem yumi lukluk bak long seves blong olgeta, plante senia misinari oli filim se oli asaenem olgeta long wan wok o eria we oli kwalifaem olgeta blong ansarem spesel nid ia.
Mi bin eksperiensem gudfala paoa abaot wanem wan senia kapol misinari i save mekem, taem mi stap long Louisiana, YSA. I no long taem afta we oli singaotem mi blong givim seves long hae kaonsel blong New Orleans Louisiana Stek, oli asaenem mi blong sapotem Port Sulphur Branj. I gat sam aktiv prishud brata nomo long branj ia. Plante long ol woman we ol hasban blong olgeta oli no memba, olgeta nao oli holem ol posisen ia blong tij mo lidasip. Wanwan taem bae oli asaenem ol senia misinari o ol stek lida long branj ia, be akses blong olgeta i limit blong kasem ol famli ia we sam nomo oli memba.
Afta i gat wan senia kapol blong Wyoming, YSA, we oli asaenem blong oli sapotem branj ia. I bin gat plante fama blong plante yia we oli bin wok long wan lokol jis faktri kolosap long hom blong olgeta. From bakgraon mo laef eksperiens blong tufala, i isi blong tufala i andastanem plante pipol long Port Sulphur we oli wok long oel indastri. Senia kapol ia i spendem plante taem blong bildim ol rilesensip wetem olgeta mo stap givhan long ol famli blong branj we sam nomo oli memba. From seves mo lav blong tufala, long taem blong tufala long Port Sulphur, branj i bin kam strong moa mo gat blesing truaot long fetful seves blong tufala. Sam man long ol famli ia we sam nomo i memba, oli joenem Jos, we i mekem kworom blong ol elda i kam moa strong long branj.
Ol senia misinari oli blesem ol laef—laef blong olgetawan mo ol narawan tu’. !No mestem janis blong yu long ol gudfala janis blong givim seves mo gro!