“Strong Paoa long Tingting blong Serem Wanem We I Gat Bigfala Valiu long Mi,” Liahona, Julae 2024.
Strong Paoa long Tingting blong Serem Wanem We I Gat Bigfala Valiu long Mi
Mi bin folem eksampol blong bisop blong mi mo waef blong hem, taem mi bin gat wan gol blong serem Buk blong Momon long evri trip we mi go long hem olsem wan tim blong sapot blong spot.
Taem mi stap groap, mi laekem tumas blong lukluk olsem wanem ol mama faol blong bubu woman blong mi, oli karem ol bebi faol blong olgeta i kam tugeta andanit long ol wing blong olgeta long taem blong strong win mo ren, blong protektem olgeta mo kipim olgeta i sef. Pikja ia i kam moa impoten long mi, afta we mi bin stap ridim abaot hemia long Buk blong Momon (luk long 3 Nifae 10:4–6). Olsem wan yang adalt, bisop blong mi mo waef blong hem, we tufala i stap travel fulap from bisnis, tufala i talem long mi se tufala i bin stap serem Buk blong Momon wetem wan long evri trip we tufala i bin go long hem.
Hemia i bin givim insperesen long mi. Mi laekem tufala mo eksampol blong tufala i tajem hat blong mi. Mi disaed se sapos mi gat janis blong travel aotsaed long Yuta, YSA, bae mi folem eksampol blong tufala mo serem wan Buk blong Momon evri taem.
Olsem wan tim blong sapot long spot blong Brigham Yang Yunivesiti, mi bin stap travel wetem tim. Bifo long fas trip blong mi, mi bin pem wan Buk blong Momon mo raetem testemoni blong mi insaed long hem. Mi bin wantem blong developem strong paoa long tingting blong serem wanem we i gat bigfala valiu long mi, wetem ol narawan: testemoni blong mi mo Buk blong Momon. Mi wantem kam olsem bisop blong mi mo waef blong hem. Mi wantem kam olsem Jisas Kraes. Mi wantem blong help blong karem ol narawan i kam tugeta mo helpem olgeta blong kam long Hem.
Mi bin lanem kwik se sapos mi prea bifo evri trip ia blong i lidim mi i go long wan we i nidim, bae wan man o woman bae i kamaot long stret taem mo stret ples blong mi serem Buk blong Momon long wan isi mo nomol fasin. Taem mi stap praktis moa, i stap kam moa isi blong mi serem Buk blong Momon. Ol wokbaot blong mi oli gat moa mining long mi. Oltaem mi stap glad tumas blong faenem hem we Papa long Heven i blesem blong mi serem tabu testeman blong Kraes wetem hem.
Taem mi travel, mi tingting hevi se, “?Bae mi go wea blong faenem wan ia we Papa long Heven i stap sendem i kam long mi long taem ia? ?Wanem nao mi save talem long hem blong soem hamas Buk blong Momon i gat bigfala valiu tumas long mi?” Ol tingting mo aksen blong mi oli kam blong nomo lukluk moa long ol nid mo gud taem blong miwan, mo mi filim moa lav long evriwan we mi mitim. Mi traem blong lukluk olgeta tru long ae blong Sevya. Mi prea from olgeta blong oli akseptem tabu presen ia we Papa long Heven i bin sendem mi blong mi givim long olgeta.
Mi bin harem nogud taem las yia blong skul blong mi i stap finis. Blong stap pat long wan tim blong sapot blong spot blong BYU i bin wan drim blong blong laef blong mi. Bambae mi bin glad tumas long gudfala eksperiens blong sapot no mata long wanem ol samting, be janis ia blong serem wan kopi blong Buk blong Momon long wanwan trip ia i bin mekem laef blong mi i moa rij mo naes long ol wei we mi no bin tingting long hem.
Blong stap serem Buk blong Momon i wan isi wei blong putum moa mining long eksperiens blong mi long yunivesiti. Mi save se ol pipol we mi bin serem Buk blong Momon wetem olgeta, oli bin lidim olgeta blong oli kasem buk ia. Mi save tu se Papa long Heven i bin blesem laef blong mi wetem lav, sore mo gladhat blong Hem: Hem i save letem mi blong filim lav blong Hem long ol pikinini blong Hem long wan spesel wei, long evri trip we mi go long hem.
Afta we mi graduet, mi disaed blong oltaem lukaotem wan we mi save serem testemoni blong mi long hem. Folem taem, mi developem wan paoa we i moa bigwan mo faenem i moa isi blong stap serem testemoni blong mi. Mi lanem blong nomo stap fraet blong stap serem. Mi biliv se evriwan i save filim i moa isi blong serem testemoni blong olgeta taem oli praktisim mo stap askem help we i kam long heven.
Blong jusum blong folem ol eksampol blong gudfala bisop mo waef blong mi, i bin givim moa mining long laef blong mi long fulap wei. I bin tijim mi blong luk se Lod i save wanwan pikinini blong Hem. Hem i lavem yumi, mo Hem i wantem karem yumi i kam tugeta andanit long wing blong Hem. Hem i wan blesing blong andastanem naesfala pikja ia we Hem i yusum taem Hem i stap tokbaot kam tugeta blong Hem. Hem i stap karem yumi i kam tugeta olsem wan mama faol i stap karem ol bebi faol blong hem i kam tugeta mo protektem olgeta.
Hem we i raet i stap long Yuta, YSA.