“Wan Sakses Stori blong Misinari: I Tekem 60 Yia blong Wok,” Liahona, Julae 2024.
Wan Sakses Stori blong Misinari: I Tekem 60 Yia blong Wok
Hem i bin wan glad eksperiens blong mi blong harem se oli bin planem wan sid blong gospel, plante yia bifo hem i givim frut
Pikja i kam long Carolyn Vibbert
Mi laekem oltaem Doktrin mo Ol Kavenan 18:10: “Praes blong wan sol i bigwan long ae blong God.” Mo samtaem i tekem plante long yumi blong wok tugeta blong serem testemoni blong karem ol sol i kam long Sevya (luk long 2 Korin 13:1).
Mi tingbaot tijing ia bakegen abaot ol wok blong ol misinari we oli putum tugeta, long wan imel we mi bin kasem wan dei. Wan brata we i talem se hem i boe blong misin presiden long Wichita, Kansas, i stap askem hemwan sapos mi mi waef blong Robert Monson. Brata ia i gohed blong talem se hem i stap lukaotem Elda Monson we i bin givim seves long Sentrol Stet Misin long 1959. Hemia hasban blong mi.
Hem i bin talem long mi abaot tu yang elda we tufala i bin kasem insperesen blong go insaed long wan apatmen bilding. Tufala i noknok long fas doa mo faenem wan olfala woman we i invaetem tufala blong kambak long nekis dei blong hem. Oli bin putum wan taem.
Taem tufala i kambak long apoenmen ia, tufala i bin lanem se olfala sista ia i bin gat wan olfala skripja blong Buk blong Momon, Doktrin mo Ol Kavenan, mo Perel blong Bigfala Praes, we ol misinari oli bin givim long hem long 1959. Hem i bin ridim plante taem mo hem i save se ol tijing we oli stap insaed oli tru. Hem i no bin joenem Jos long taem ia from we hasban blong hem i no wantem hem blong go long jos mo blong i kasem baptaes. Hasban blong hem i bin ded i no longtaem, mo hem i prea se bae hem i save faenem ol misinari bakegen. Ol skripja blong hem i gat ol nem blong tufala misinari we i givim skripja long hem long 1959: Robert Monson mo Granade Curran, kompanion blong hasban blong mi.
Long ol nekis wik afta long taem ia, woman ia i lanem abaot plan blong sevem man mo ol blesing blong tempol. Boe blong hem i bin ded taem hem i gat 22 yia, mo hem i glad tumas se hem i save luk boe blong hem bakegen. Taem ol misinari oli invaetem hem blong kasem baptaes, hem i akseptem invitesen ia wetem glad.
Hasban blong mi mo kompanion blong hem Elda Curran, tufala tugeta i bin ded finis, be mi save pikjarem tufala blong kam long naesfala baptaes ia long narasaed blong vel.
Taem boe blong misin presiden i talem stori ia long mi, mi tingbaot bakegen se Sevya i no stap fogetem eniwan long yumi. Oltaem Hem i stap wetem yumi sapos yumi letem Hem i kam long laef blong yumi. Niu Testeman i tokbaot stori blong Sakias, we i klaem long sikamo tri blong luk Sevya (luk long Luk 19:1–10). Nomata we hem i mas klaem long tri, Sevya i faenem Sakias, mo i askem Sevya blong i kam kakae long haos blong Hem. Long semmak fasin, wan olfala sista i bin prea mo i wet long ol misinari blong noknok long doa blong hem, mo i bin hapen. Sevya i save yumi evriwan. “Mo mi mi Pikinini blong Man, mi kam blong sevem olgeta we oli lus” (Luk 19:10).
Fo misinari—tu ova 60 yia i bin pas mo tu i no longtaem i pas—oli bin karem sista ia i kam long Jisas Kraes mo olsem blesing blong tufala, ol testemoni blong tufala i kam moa strong mo oli faenem glad long Lod. Mi gat tingting we i stap daon, blong save stap long saed blong stori ia, blong filim glad blong evriwan we oli bin pat blong karem sista ia i kam long Sevya (luk long Doktrin mo Ol Kavenan 18:15).
Hem we i raet i stap long Yuta, YSA.