“Plis Helpem Hem,” Liahona, Julae 2024.
Ol Voes blong Ol Lata–dei Sent
“Plis Helpem Hem”
Famli histri mo tempol wok tru long ol drim i bin helpem mi blong winim ol filing blong stap miwan mo sot blong mekem samting.
Foto blong Manila Philippines Tempol i kam long Russell Sun De La Cruz
Wan dei long wok, mi bin filim hat blong mi i brok mo mi stap miwan. Mi biliv se mi sot blong mekem ol samting we ol bubu blong mi oli wantem, from plante mistek we mi bin mekem. Mi krae long Papa long Heven from paoa.
Wan o tu wik afta, wan sista i kam luk mi afta jos mo askem sapos mi mi Jenny Casama. Hem i introdiusum hemwan se hem i Michelle (Mich) Bautista, wan long ol tempol mo famli histri konsalten insaed long wod. Hem i eksplenem se hem i bin gat wan drim we hem i luk tri woman oli jenis long waet mo las nem blong olgeta i Casama, mo oli kam luk hem from oli wantem help. Oli krae long Sista Bautista se, “Plis helpem hem.”
Sista Mich i andastanem se ol woman ia oli stap askem hem blong helpem famli blong olgeta—mi—blong lanem moa abaot tempol mo famli histri wok.
Sista Mich i talem long mi se, “Bae yumitu luk sapos yumitu save faenem ol woman ia long famli tri blong yu.”
Long FamilySearch websaet, mifala i faenem ol rekod blong apu woman blong mi Damasa Casama; sista blong hem Emiliana Casama; mo bigfala apu woman blong mi Eugenia Casama. Mitufala i nogat tu tingting se oli ol woman ia long drim. Wan swit filing blong pis i kam long mi, mo mi filim lav blong ol bubu blong mi i kavremap mi long taem ia. Mitufala i krae from hapines we mitufala i filim long hat blong mitufala. Mi filim se oli bin kea fulap long mi, mo mi tu, mi gat wan bigfala lav long olgeta.
Afta mi luksave responsabiliti blong mi blong helpem olgeta mo ol nara bubu blong mi blong kasem ol odinens blong tempol. Ol bubu blong yumi oli bin stap wet—sam oli wet long taem finis—blong yumi long wol ia blong mekem ol tabu odinens ia blong olgeta.
Afta long yia ia, mi bin baptaes long tempol long bihaf blong ol tri bubu ia. Mi testifae abaot famli histri wok se i naes tumas mo long paoa we i karem i kam long laef blong mi.
Olsem we Presiden Russell M. Nelson i bin talem: “Nomata we tempol mo famli histri wok i gat paoa blong blesem olgeta we oli stap narasaed long vel, hem i gat semmak paoa ia tu blong blesem olgeta we oli stap laef. Hem i gat wan paoa we i mekem se olgeta we oli stap mekem wok ia, oli kam gud moa. Oli stap help blong mekem famli blong olgeta oli kam olsem god.”
Mi save se Jos i tru mo we yumi no save kam stret evriwan sapos i nogat ol bubu blong yumi.