“Aot long Tudak i go long Hapines,” Liahona, Julae 2024.
Ol Voes blong Ol Lata–dei Sent
Aot long Tudak i go long Hapines
Taem mi stap ripitim ol toktok blong ol tempol odinens long maen blong mi, wan naesfala samting i hapen.
Long 1988, mi bin go wetem ol nara Inglis tija blong tij long wan skul long Sudan. Ol pikinini oli hapi tumas, mo mifala i bin jenisim fasin blong mifala blong laef kwik long wan kantri we i stap develop yet. Be hem we i tekem mifala blong wok, hem i wan lida we i save tok agensem eniwan we hem i luk se i stap agensem hem long eni wei. Hem i no laekem mi nating stat long dei we mi bin stanap from wan we hem i bin abiusum.
Wan dei hem i singaotem mi i go long ofis blong hem. Blong ova long haf blong wan aoa, hem i mekem mi sidaon mo harem eni kaen abius blong toktok mo strong toktok. Mi aot long rum we mi sek bigwan i stap. Mi nomo save tingbaot olsem wanem mi bin go tru dei blong skul ia kasem en blong hem. Ful naet, mi no save karemaot ol nogud toktok blong hem aot long maen blong mi.
Long taem blong silip, mi sidaon long bed blong mi mo ridim ol skripja. Afta mi nildaon mo prea from kamfot mo rilif, be mi no filim nomo. Mi lei daon long bed be mi no save silip. Mi girap, rid, nildaon, mo prea tu taem moa, be nogat nomo.
“Okei,” mi tingting, “Papa long Heven i no stap ansarem ol prea blong yumi oltaem long wei mo taem we yumi wantem.” Mi akseptem nomo blong mi traehad blong silip long naet ia.
Be taem mi lei daon bakegen, mi tingting se, “I gat wan moa samting we mi save mekem.” Mi stat blong ripitim ol toktok blong ol tempol odinens long miwan long maen blong mi. Taem mi mekem hemia, wan naesfala merikel i hapen. Evri harem nogud mo tudak i kamaot long mi, mo pis mo glad we i naes tumas i kam insaed mo fulumap gud mi.
Mi girap bakegen mo prea, mo talem ol tangkyu wetem krae long Papa long Heven. Afta mi gobak long bed mo silip. Long nekis dei, we i sapos blong fulap long fraet mo harem nogud, i bin dei we i moa hapi bitim evri narawan, we mi bin spendem wetem wan klas blong ol pikinini.
Mi luksave se Lod i bin wantem mi blong tingting hevi long ol odinens blong tempol. Long Ol Sent we oli stap krosem ol bigfala flat graon afta we oli kasem ol blesing blong olgeta long Navu Tempol, Presiden Brigham Young (1801–1877) i talem long olgeta, “Letem faea blong kavenan ia we yu bin mekem long Haos blong Lod, i bon insaed long ol hat blong yufala, olsem wan faea we oli no save kilim i ded.” Taem ol tempol kavenan blong yumi i bon insaed long ol hat mo maen blong yumi, bae yumi faenem tu paoa, pis mo kamfot.