“Sol blong Mi I Wantem Tumas blong Stap long Ples Ia,” Liahona, Julae 2024.
Ol Voes blong Ol Lata–dei Sent
Sol blong Mi I Wantem Tumas blong Stap long Ples Ia
Wan fevret skripja stori i kam olsem wan ansa long filing blong mi blong wantem tumas blong stap kolosap long Papa blong mi long Heven mo long Pikinini blong Hem.
Seken Kaming, i kam long Harry Anderson
Wan dei mi bin kam long tempol wetem wan kwestin long hat blong mi: “?Papa long Heven, mi stap gud o nogud long saed blong gospel?”
Mi bin sot blong mekem fulap samting lelebet long wik ia. Olsem Nifae, mi filim hevi long ol sin we i stap mekem mi no hapi tumas. Be, olsem Nifae tu, mi save huia blong mi trastem. (Luk long 2 Nifae 4:18–19.) Mi bin hop se blong spendem taem wetem Lod long haos blong Hem long moning ia, bae i help blong mekem mi filim se mi no stap longwe tumas long Hem.
Mi lisingud truaot long endaomen sesen mo mi filim tangkyu from paoa mo save we i bin givim long mi. Be taem mi go insaed long selestial rum, mi filim hat blong mi i hevi yet. ?Olsem wanem bae mi save se Lod i stap lukluk mi olsem wanem naoia?
Mi sidaon mo tingting hevi blong sam minit mo afta, mi filim olsem bae mi no kasem wan ansa mo mi stat blong stanap. Be afta wan samting i pulum mi i gobak daon mo mi sidaon long jea. “Mi no wantem go,” mi tingting olsem.
Mi lukluk raon long rum mo luk wan peinting we mi save blong Jisas Kraes we ol enjel oli raonem Hem, mo ol han blong Hem oli open i kam long mi. Ol toktok blong wan long ol fevret skripja i kam long maen blong mi: “Sol blong mi i wantem tumas blong stap long ples ia” (luk long Alma 36:22).
Plante taem mi stap tingting long hamas ves ia i impoten long stori blong Alma. From ol sin blong hem bifo, tingting ia blong stanap long fored blong God i fulumap Alma wetem “fraet ia we i nogat toktok we i save talem” (Alma 36:14). Be afta we hem i tanem hem i go long Kraes, hem i luk ol enjel oli raonem God, mo “sol blong [hem] i wantem tumas blong stap long ples ia.” Oltaem mi bin luk ol filing we skripja ia i tokbaot olsem wan naes samting. Smol efot ia blong Alma blong lukluk i go long Lod i bin gat wan bigfala jenis long hat blong hem.
Mi luksave se mi no bin wantem aot long selestial rum from se, olsem Alma, sol blong mi i wantem tumas blong stap long ples ia—tugeta insaed long tempol long dei ia mo wetem Papa long Heven mo Jisas Kraes long hom blong mi long heven. Tabu Spirit i bin yusum fevret skripja stori blong mi blong talem se God i save hat blong mi. Mi tingbaot bakegen se nomata long ol samting we mi no mekem mo sot blong mekem, Lod i bin akseptem ol efot blong mi blong stap kolosap long Hem. Hem i save se mi wantem tumas blong stap long ples ia.