“God I Soem long Mi Se Mi Gat Wan Wok long Wol Ia,” Liahona, Julae 2024.
Ol Pikja blong Fet
God I Soem long Mi Se Mi Gat Wan Wok long Wol Ia
MI bin foldaon long wan tri, be Lod i bin sevem mi mekem se mi save jenisim laef blong mi mo helpem ol pipol wetem ol disabiliti olsem blong mi.
Ol foto i kam long Christine Hair
Mi stap go long wan relijin konfrens wetem sista blong mi, taem hem i askem mi blong klaem long wan tri blong karem sam kokonas blong konfrens. Taem mi stap hipmap ol kokonas long top blong tri, ae blong mi i tudak mo mi foldaon. Mi foldaon strong long bak blong mi mo mi nomo harem save ol leg blong mi.
Oli bin tekem mi i go long hospital, mo ol dokta oli putum gud ol bun long bak blong mi. Blong tri manis, mi silip long bak blong mi long hospital mo mi no save sidaon. Hem i bin wan taem we ol filing mo tingting blong mi i foldaon plante. Mi silip nomo i stap mo stap tingting se wanem bae i hapen long mi mo bae mi mekem wanem afta.
Kaonsel Wetem Lod
Afta long tri manis, oli talem long mi blong go long Niu Silan blong kasem wan operesen long bak blong mi. Operesen ia bae i mekem se mi save sidaon be i no silip nomo. Taem mi stap long hospital long Niu Silan, mi mitim wan gel we i stap wok long we. Hem i askem long mi, “?Mi mi save yu? Mi luk olsem bae mi luksave yu.”
Mitufala i stat blong storian. Hem i serem gospel blong Jisas Kraes mo i givim wan Buk blong Momon long mi. Fastaem, mi no bin ridim. Mi lego i stap nomo narasaed long bed blong mi. Be afta wan dei, mi bin stap miwan mo i nogat wan intresting samting blong wajem long TV. Afta mi luk Buk blong Momon long tebol blong mi. Mi openem mo mi stat blong rid mo rid.
Taem mi stap rid, mi gat wan filing se i gat wan samting i defren abaot Buk blong Momon mo we hem i holem tru gospel blong Jisas Kraes insaed long hem. Gel ia long hospital i bin makem sam ves, wan long olgeta hem i long Alma 37:37: “Askem advaes long Lod long evri samting we yufala i mekem, mo bae hem i lidim yu blong mekem gud.”
Ol toktok ia oli tajem mi mo i mekem mi tingting. Blong save sapos Jos Ia blong Jisas Kraes blong Ol Lata-dei Sent i tru Jos ia, mi save se mi nid blong askem advaes long Lod. Mi bin wantem tu blong miwan mi go luk jos ia.
Fasin blong Mi blong Nogat Hop I Lus Evriwan
Taem mi aot long Niu Silan i gobak long hom, mi bin invaetem ol misinari blong tijim mi. Taem mi stap lan, mi kasem wan testemoni se hemia i Jos blong Kraes. Mi talem tangkyu long ol misinari we oli bin save tijim mi. Long baptaes blong mi, oli bin gat paoa ia blong karem mi i go long wota—wan i holem mi long ol han blong hem mo narawan i mekem baptaes blong mi.
Wetem baptaes blong mi, evri filing mo tingting we i foldaon mo evri hop we mi lusum, i nomo gat. Mi save se mi gat wan wok long laef ia mo we God i lavem mi.
Bifo mi kasem baptaes, mi filim sem long miwan from wiljea blong mi. Be, afta we mi baptaes, mi stat blong kam long wod evri Sandei mo stap tekpat long ol aktiviti blong ol yang singgel adalt. Mi iven go long ol danis blong stek, mo stap danis long wiljea blong mi long evri singsing. Mi joenem wan netwok tu blong ol man Samoa we oli kasem ol kil long spaen blong olgeta.
Mi luksave se mi bin kasem hiling long filing ia se mi mi nid blong haed. Tru long Jos, mi bin kasem tras long miwan blong miks wetem ol pipol bakegen.
Lod i bin helpem mi tu blong mi pusum miwan mo gro taem oli leftemap tingting blong mi blong go long wan program blong tri yia long Cambodian School of Prosthetics and Orthotics (CSPO). Mi no sua se mi save program ia from i neva gat wan man long wiljea we i bin aplae bifo. Be, ol situesen oli bin letem mi blong save go long CSPO long Cambodia. Mi bin graduet long we olsem fas studen wetem wan disabiliti long program blong histri.
Bifo hem i kasem baptaes, Posenai i filim sem blong stap long wan wiljea. Be afta long baptaes blong hem, hem i talem se, “mi bin kasem tras long miwan blong miks wetem ol pipol bakegen.”
Afta we mi bin gobak long Samoa, mi bin toktok long wan YSA divosen abaot helt. Afta long konfrens, wan woman i wokbaot i kam luk mi mo sekhan long mi mo talem long mi se hem i laekem toktok blong mi. Lagimanofia i jes kambak nomo long misin blong hem. Long stret taem ia we mi bin mitim hem, mi bin filim se hem i mekem mi mi filim se mi fulwan. Mi bin stap prea blong faenem wan we bae i kompanion long mi mo bae i lavem mo akseptem mi.
Taem mi mo Lagimanofia i stat blong deit, hem i lukaotem gud mi mo akseptem mi, mo famli blong hem i sapotem gud mitufala. Mitufala i mared, mo laef blong mitufala i bin jenis blong taem we i no save finis, taem mitufala i adoptem Posenai Jr. God i bin rere long mitufala blong adoptem hem. Blong gat hem long laef blong mitufala i bin mekem mitufala i hapi tumas.
?Mi Mi Save Givim Seves?
Long jos, oli bin singaotem mi olsem wan wod klak mo afta, olsem wan kaonsela long bisoprik. Mi no save bilivim se wan man long wan wiljea i save givim seves. Aksiden blong mi i bin mekem mi filim se mi nogat yus, be taem mi stap wok long Jos, hem i mekem mi filim se mi gat yus mo i helpem mi blong luksave se mi save kontribiut. Mi lavem janis ia blong kam moa kolosap long Jisas Kraes taem mi givim seves.
Olsem wan kaonsela long bisoprik, mi bin wantem blong oli lidim mi blong mekem se mi save mekem moa gud long koling blong mi. Hemia i mekem se mi wantem blong rere moa evri Sandei. Mi stat blong stap ridim ol skripja blong mi, mo mi gat ol janis blong serem testemoni blong mi. Blong stap wan lida long jos i bin helpem mi tu blong kam wan lida long wok. Mi bin bildimap filing ia se mi save lid mo toktok, we i mekem mi save lid long ol narafala eria.
Naoia mi wok olsem prinsipol blong Prosthetics and Orthotics Dipatmen long Tupua Tamasese Meaole Hospital, hemia mein hospital long Samoa. Dipatmen blong mi i mekem se samples 500 pipol oli gat ol tul blong helpem olgeta oli wokbaot long ol wiljea, long wan yia. Jos, tru long Ministri blong Helt long Samoa, i help blong givim ol wiljea we oli nidim mo ol materiol blong mekem ol giaman pat blong bodi (luk long philanthropies.ChurchofJesusChrist.org/humanitarian-services). Ol help ia oli helpem ol pipol blong gobak long wok mo kam blong save dipen long olgetawan. Oli givim tu hop long ol pipol mo wan rod i gobak long laef we oli ting se oli bin lusum.
“Blong stap wok long Jos i bin mekem mi filim se mi gat yus mo mi luksave se mi save kontribiut,” Posenai i talem. “Mi lavem janis ia blong kam moa kolosap long Jisas Kraes taem mi givim seves.”
Dipen long Lod
Sapos mi save givim advaes long ol narawan we oli gat ol disabiliti, bae mi talem se, “No letem ol disabiliti blong yu oli stopem yu long wanem we biliv long hem. Givim hat blong yu long wanem we yu wantem blong winim mo wok had from. Taem yu lukaotem help blong Lod, bae Hem i blesem yu [luk long 2 Nifae 32:9].”
Wetem bilif ia, mi stap gogohed, mo hemia i mekem i huia mi tedei. Mi biliv se oli putum mi long ples ia mo oli sevem mi from wan wok. Mi bin foldaon long tri ia, be Lod i bin sevem mi mekem se mi save jenisim laef blong mi mo mekem wok ia we i helpem evri pipol ia. Nomata long disabiliti blong mi, mi bin save helpem plante pipol—be Lod i bin tijim mi se from disabiliti, mi bin save helpem plante pipol.