“Bigfala Wok blong Lod mo Bigfala Janis blong Yumi,” Liahona, Julae 2024.
Bigfala Wok blong Lod mo Bigfala Janis blong Yumi
Taem yumi lavem, serem, mo invaetem man, yumi stap wok tugeta wetem Lod blong helpem evri gudgudfala sol oli kam long Hem.
Evri profet blong lasfala, bigfala dispensesen ia oli bin tijim ol memba blong Jos Ia blong Jisas Kraes blong ol Lata-dei Sent blong serem gospel blong Jisas Kraes we i bin kambak. Long taem blong mi, sam eksampol i kam long tingting blong mi:
Presiden David O. McKay (1873–1970), profet blong taem we mi bin wan yut i talemaot se, “Evri memba oli wan misinari.”
Presiden Spencer W. Kimball (1895–1985) i bin tijim se, “Dei ia blong karem gospel i go long plante moa ples mo pipol oli stap long ples ia mo i stap naoia,” mo “yumi mas mekem wokbaot blong yumi i longfala” blong serem gospel wetem ol narafala man.
Presiden Gordon B. Hinckley (1910–2008) i talem se: “Wok blong yumi i bigwan, responsabiliti blong yumi blong help faenem olgeta blong tijim i bigwan tumas. Lod i bin givim long yumi raet ia blong tijim gospel long evri man. Hemia bae i tekem evri bes efot blong [yumi].”
Mo Presiden Russell M. Nelson i bin tijim se: “Misinari wok hem i wan impoten pat blong bigfala wok ia i blong karem Isrel i kam tugeta. Kam tugeta ia, hem i wan wok we i moa impoten, we i stap tekem ples long wol tedei. I nogat wan narafala samting we i bigwan moa bitim wok ia. I nogat wan narafala samting we i moa impoten semmak olsem wok ia. Ol misinari blong Lod—ol disaepol blong Hem—oli tekempat long bigfala jalenj ia, we i moa bigwan olgeta, i stamba wok we i gud moa olgeta, i wok we i nambawan long wol tedei.”
Mi bin kam blong save hemia miwan olsem wan yang misinari long Britis Misin. Iven tedei, mi save moa gud long hemia. Olsem wan Aposol blong Lod Jisas Kraes, mi testifae se ol janis oli stap evri ples blong helpem ol narafala man oli kam long Kraes, taem yumi serem ol bilif blong yumi, mo invaetem olgeta blong joenem yumi blong eksperiensem glad blong gospel ia blong Jisas Kraes.
Wok Ia I Stap Go Fored
Mi bin gat janis blong kasem wan asaenmen long Misinari Dipatmen blong Jos taem fas edisen blong Prijim Gospel blong Mi oli bin introdiusum long 2004, mo bakegen taem seken edisen i bin rilis long 2023. Mi biliv se Prijim Gospel blong Mi i bin blesem misinari wok long wan naesfala wei.
Niufala Prijim Gospel blong Mi ia i gat insaed evri samting we yumi bin lanem stat long 2004, daereksen we i kam tru long insperesen we i kam long evri memba blong Fas Presidensi mo Kworom blong Olgeta Twelef Aposol, mo ol jenis we oli bin mekem blong serem gospel long wan taem naoia tru long teknoloji. Sam long ol jenis ia, risal blong hem i soem bigfala sakses.
Yumi bin faenemaot se blong stap serem gospel long ol simpol, nomol, mo isi wei tru long ol prinsipol blong “lav, serem, invaetem,” i blesem kingdom bigwan. Jisas Kraes i bin serem gospel long wei ia nao taem Hem i bin laef blong wol. Hem i bin serem laef blong Hem mo Hem i lavem mo invaetem evriwan blong kam long Hem (luk long Matiu 11:28). Blong lavem, serem, mo invaetem olsem we Hem i bin mekem, hem i wan spesel blesing mo responsabiliti blong evri memba blong Jos.
Stat wetem Lav
Long Garen blong Getsemane mo long kros, Jisas Kraes i tekem long Hemwan ol sin blong wol ia mo safa from ol harem nogud mo “ol soa blong bodi mo ol sik blong ol pipol blong hem” (Alma 7:11). Bigfala mo safa ia we i nogat en “we i mekem [Hem], … we i hae long evriwan, blong seksek from soa long bodi, mo blad i ronaot long evri hol blong skin” (Doktrin mo Ol Kavenan 19:18). Tru long Atonmen mo laef bakegen long ded, Jisas Kraes i mekem plan blong sevem man mo fasin blong kam olsem wan god i posibol long evri man.
Tanem i go long Sevya mo tingting hevi long evri samting we Hem i bin mekem blong yumi, i save krietem insaed long yumi wan hat we i fulap wetem lav we yumi gat long Hem. Afta Hem i tanem hat blong yumi i go long ol narawan mo komandem yumi blong lavem olgeta (luk long Jon 13:34–35) mo serem gospel blong Hem wetem olgeta (luk long Matiu 28:19; Mak 16:15). Sapos olgeta raon long yumi ol filim se yumi lavem mo kea long olgeta wetem wan tru hat, i posibol se bae oli save openem ol hat blong olgeta long ol mesej blong yumi, olsem we King Lamonae i bin openem hat blong hem blong risivim gospel from lav mo seves blong Amon (luk long Alma 17–19).
Taem yumi serem gospel, statem wetem lav. Taem yumi givhan long ol narawan wetem lav—stap tingbaot se olgeta oli ol brata, mo ol sista blong yumi, mo oli ol pikinini blong Papa blong yumi long Heven we Hem i lavem olgeta tumas—ol janis bae oli open blong yumi serem wanem we yumi save se hem oli tru.
Wok wetem Strong Tingting mo Serem
I no gat wan we i givim hem fulwan blong serem gospel bitim Presiden M. Russell Ballard (1928–2023). Long las jeneral konfrens toktok, hem i testifae se, “Wan long ol samting we i naes tumas mo gat glori, we eniwan long wol i save [hem i] we Papa blong yumi long Heven mo Lod Jisas Kraes i bin soemaot Tufala long ol las dei ia, mo we Josef [Smit] oli jusum hem blong putumbak gospel ia blong Jisas Kraes we i fulwan mo no gat en.”
Truaot long laef blong hem, mo truaot long plante pat blong wol ia, Presiden Ballard i bin wantem tumas blong stap serem naesfala mesej ia wetem evriwan. Hem i leftemap tingting blong yumi blong mekem semmak. Hem i bin tijim se, yumi serem gospel “taem yumi stap wan gud neba mo stap kea mo soem lav.” Taem yumi mekem olsem, yumi save “saenem laet blong gospel long laef blong yumiwan, mo … saenem laet ia long [ol narawan] tru long ol blesing we gospel i save givim.” Mo tu, yumi save “serem testemoni long wanem we [yumi] save mo bilivim mo wanem we [yumi] filim.” Presiden Ballard i bin tijim se, “Wan klin testemoni … i save kam tru long paoa blong Tabu Spirit i go long hat blong olgeta we oli open blong kasem.”
Serem gospel blong Jisas Kraes we i bin kambak hem i bigfala tingting long hat blong Presiden Ballard. Yumi save wok wetem strong tingting—olsem we hem i bin mekem—blong serem gospel tugeta long toktok mo aksen. Yumi neva save huia long medel blong yumi we i stap lukaotem laet blong gospel be hem i no save weaples blong faenem (luk long Doktrin mo Ol Kavenan 123:12).
Givimaot Ol Invitesen we i fulap wetem Lav
Blong stap helpem narafala man blong kam long Kraes, yumi invaetem olgeta blong eksperiensem glad we Sevya mo gospel blong Hem i givim. Yumi save mekem olsem taem yumi invaetem olgeta blong kam long wan aktiviti, blong ridim Buk blong Momon, o blong mit wetem ol misinari. Mo tu, yumi save givimaot wan invitesen we i fulap long lav long olgeta blong kam long sakramen miting wetem yumi.
Yumi kam long sakramen miting evri wik blong “wosipim God mo kakae sakramen blong tingbaot Jisas Kraes mo Atonmen blong Hem” Hemia i wan spesel taem blong ol pipol oli filim Spirit, kam kolosap long Sevya, mo mekem fet blong olgeta i kam strong moa long Hem.
Taem yumi lukaotem ol wei blong lavem, serem, mo invaetem man, plan blong yumi mo ol efot oli mas tekem tu, ol wei blong stap helpem ol pipol blong kam long sakramen miting. Sapos olgeta oli akseptem invitesen mo kam long sakramen miting, i posibol se bae oli gohed long rod ia blong kasem baptaes, mo fasin blong jenisim laef. Mi biliv wetem ful hat blong mi se bigfala sakses bae i kam taem yumi invaetem ol narawan blong kam long sakramen miting mo helpem olgeta blong luksave ol blesing we olgeta oli save kasem taem oli mekem olsem.
Lod Bae I Soem Rod long Yumi
Yumi neva save wanem ol sakses mo ol jalenj we yumi bae gat taem yu lavem, serem, mo invaetem. Ol boe blong Mosaea “oli go aot long wan bigtaon i go long narafala bigtaon, mo long wan haos blong wosip i go long narafalawan, … long medel blong Ol Man blong Leman, blong prijim mo blong tijim toktok blong God long medel blong olgeta; mo olsem ia nao oli bin stat blong gat bigfala sakses.” Tru long ol efot blong olgeta, “taosen long olgeta oli tekem oli kam long save long saed blong Lod” mo plante “oli jenisim laef … [mo] neva foldaon i go lus” (Alma 23:4–6).
Maet hemia bae i no oltaem wan eksperiens blong yu, Lod i bin promesem se Hem bae wok kolosap wetem yumi from evri sol oli impoten long Hem. Taem yumi putum tras blong yumi long Lod mo mekem wok blong Hem, Hem bae i lidim yumi long olsem wanem blong serem gospel blong Hem wetem ol narawan, taem yu lavem olgeta, serem laef blong yumi mo ol testemoni wetem olgeta, mo invaetem olgeta blong joenem yumi blong stap folem Hem.
“Bambae glad blong [yumi] bae bigwan” (Doktrin mo Ol Kavenan18:15) taem yumi tekem ol janis raon long yumi blong helpem Lod, Jisas Kraes long bigfala wok ia blong tekem ol sol i kam long Hem.