“?Olsem Wanem Mi Save Trastem Papa long Heven Taem Mi Filim Se Mi Stap Stanap Miwan?,” Liahona, Julae 2024.
Ol Yang Adalt
?Olsem Wanem Mi Save Trastem Papa long Heven Taem Mi Filim Se Mi Stap Stanap Miwan?
Mi stap traem blong gat fet be mi stap wokem go tru long plante jalenj. ?Olsem wanem mi save gohed blong trastem Lod?
Pikja droing i kam long Kathleen Peterson
Ol kasen blong mi oli introdiusum mi long ol misinari taem mi gat naen yia. Mi joenem Jos Ia blong Jisas Kraes blong Ol Lata-dei Sent be mi wan nomo insaed long famli blong mi, i joenem jos. Stat long taem ia, mi lanem blong lavem gospel blong Jisas Kraes moa mo moa. Be, long wan taem, mi bin faenem i had tumas long mi blong stap trastem Papa long Heven mo ol trutok blong Hem, mo mi traehad tumas blong gohed blong go fored wetem fet.
Blong stap laef defren olsem wan disaepol blong Jisas Kraes i save kam had long eni ples, be blong groap long Hong Kong olsem wan memba blong Jos i moa bitim we sam bae oli tingting long hem.
Olsem, plante pipol long eria ia oli no laekem Jos mo oli ting se hem i miks wetem ol nogud samting. Bifo, wan Jaenis toktok we i minim “Momon,” mo hemia oli yusum taem oli tokbaot Jos, oli stap talem wetem saon we i go wetem wan Jaenis toktok we i minim “devel.” Long sam, hemia i mekem se oli andastanem rong ol valiu blong Jos.
Mo tu, from se i gat plante nara relijin we i folem kastom we oli stanemap finis mo from i gat smol namba blong ol memba nomo long Hong Kong, hem i isi blong filim se yu stap yuwan. Plante pipol oli stap kwestinim Jos, be oli no andastanem fulwan ol tijing blong hem mo oli no wantem lisin long wanem ol memba oli wantem serem.
Mi bin filim ol samting ia we i blokem mi plante taem mi bin wan yangfala, be tru long ol eksperiens ia, mi bin lanem plante samting abaot wanem i minim blong trastem Papa long Heven mo Jisas Kraes.
?I Gat Mining blong Stap Laef Folem Gospel?
Long hae skul, papa mo mama blong mi oli fren wetem wan long ol tija blong mi. Tija ia hem i wan Kristin man be long wan nara jos. Long taem ia, mi wan nomo mi memba blong Jos long klas blong mi, mo ol fren long klas blong mi mo ol tija oli bin stap gat ol tingting abaot Jos blong Jisas Kraes mo ol memba blong hem.
Be tija ia hem i bin gat ol strong nogud tingting abaot bilif blong mi, we i mekem ol samting i had lelebet from se hem i wan fren blong famli.
Wan samting hem i we, plante taem mi stap wantem slip long klas blong hem from se mi stap wekap long eli moning blong go long seminari, we i mekem se hem i stap wari se bae mi nomo mekem gud ol skul wok blong mi. Mo tu, hem i stap jalenjem mi wetem plante had kwestin long saed blong doktrin we mi no save olsem wanem blong ansarem. !Hem i iven givim ol skul asaenmen long mi blong ridim ol samting we i stap tokbaot nogud Jos! Hem i traem bes blong hem blong winim mi blong kamaot long bilif blong mi.
Hemia i bin wan taem we oli testem fet blong mi fulap. ?From wanem, taem mi stap traem blong stap kolosap long Papa long Heven mo Jisas Kraes, mo blong stap fetful, i stap mekem se mi stap gat ol jalenj mo had taem long laef blong mi? ?Mi no sapos blong kasem ol blesing from mi stap kipim ol komanmen mo stap sakrifaes blong no slip mo go long seminari?
Be, ol mak blong skul blong mi i stap go daon, fet blong mi i stap go daon, mo ol rilesensip blong mi wetem ol tija blong mi, famli blong mi, mo Papa long Heven, oli stap safa.
Blong wan smol taem, mi stat blong stap tingting sapos i gat praes blong stap laef folem gospel. Mi stat blong no stap go gud long seminari mo i no long taem, fet blong mi stap lus sloslo. Mi filim moa isi blong go wetem wanem we wol raon long mi i stap pusum mi blong mekem.
Stap Jusum blong Trastem
Mi gohed blong prea long Papa long Heven blong kasem gaed mo andastaning. Nomata long konfius mo kros we mi filim abaot situesen blong mi, wan samting long hat blong mi i gohed blong hang long fet. Mi toktok long ol fetful fren mo serem hat blong mi long ol fren long jos abaot wanem mi stap eksperiensem, mo oli leftemap tingting blong mi blong toktok long seminari tija blong mi abaot ol hadtaem blong mi.
Hem i toktok long mi wetem lav mo sore mo i leftemap tingting blong mi blong gohed blong stap go long seminari wetem wan hat we i gat hop. Hem i promesem mi se bae mi luk ol blesing oli hapen sapos mi gohed blong hang strong long fet mo stap trastem Lod se Hem i gat fulap samting i stap blong mi mo bae Hem i konsekretem ol jalenj blong mi (luk long 2 Nifae 2:1–2).
Mekem se, nomata ol hadtaem mi stap go tru long hem, mi bin jusum blong gat tras.
Afta long sam taem, fasin blong mi i stat blong jenis. Mi nomo lukluk nomo long ol had taem we mi stap go tru long hem, be mi lukluk moa long fasin blong talem tangkyu we mi filim abaot gospel. Mi stat blong lukluk moa long ol blesing blong famli blong mi, tabu aedentiti blong mi, mo ol trutok blong gospel we i no save finis. Mo long en, mi kam blong luksave se Papa long Heven mo Jisas Kraes, Tufala i save gud ol situesen blong mi mo oltaem Tufala i bin stap stanap wetem mi long ol taem ia we mi filim se mi stap stanap miwan.
Hemia i bin jenisim evri samting.
Taem mi stap gohed blong putum tras blong mi long Tufala, stap obei long ol komanmen, stap sakem sin evri dei, mo stap mekem ol smol samting evri dei blong joen wetem Tufala, mi filim se fandesen blong fet blong mi i stap kam moa dip mo moa strong.
Presiden Russell M. Nelson i bin talem i no long taem i pas se: “Tekem responsabiliti long testemoni blong yufalawan long Jisas Kraes mo gospel blong Hem. Wok from. Fidim blong bae i gro. Fidim wetem trutok. Yu no mekem i toti wetem ol tijing blong man mo woman we oli no gat biliv. Taem yu stap gohed blong mekem testemoni blong yu i kam strong long Jisas Kraes i nambawan samting, lukluk long ol merikel we bae i hapen long laef blong yu.”
Mo taem mi mekem olsem, wan merikel i bin hapen.
Wanem I Minim blong Trastem Lod
Afta we mi stap traem blong stap long we long eni storian abaot fet wetem tija blong mi blong wan taem, wan dei, taem hem i bin kam luk mi wetem sam kwestin, mi filim se mi rere blong ansarem hem wetem fet blong mi we i kam strong bakegen. Mi askem hem wetem kaen fasin sapos hem i go long wan long ol jos miting blong mifala o i ridim eni Buk blong Momon. Taem hem i ansa se no, mi filim insperesen blong serem testemoni blong mi abaot ol simpol trutok.
Mi talem long hem se bae hem i neva save sapos wan samting i tru o no, sapos hem i no eksperiensem o lukaotem ol ansa hemwan. Mi eksplenem se mi save se gospel i tru from mi bin wok from ol ansa ia mo mi filim long hat blong mi se oli tru. Mi bin invaetem hem blong mekem semmak, mo stat long taem ia i go, rilesensip blong mitufala i gat moa pis.
Jalenj ia blong fet we mi gat olsem wan yangfala i bin rere long fiuja blong mi olsem wan disaepol blong Kraes. Mi bin luk plante blesing mo promes i kam tru taem mi bin gohed blong trastem Lod bitim tingting blong evri nara wan. Olsem we Nifae i talem, “O Lod, mi bin trastem yu, mo bae mi trastem yu blong oltaem. Bae mi no putum tras blong mi long han blong bodi blong mit mo bun” (2 Nifae 4:34).
Taem ol samting oli no stap go olsem we yu plan from o taem yumi stap go tru ol hadtaem we yumi no ting se bae i kam, hem i isi blong filim se Papa long Heven i bin lidim yumi go rong, i lego yumi, o i no kea nomo.
Be hemia i no tru.
Be, oltaem hem i ol taem ia nao we yumi konfius mo hat i brok, we oli rimaenem yumi wanem i minim blong putum tras blong yu fulwan long Lod. Mi mas letem fasin blong mi blong stap olsem wan disaepol mo fet blong mi i gat moa mining mo i jenisim laef be i no blong yumi olsem blong ol robot o kam wan evri dei praktis. Presiden Nelson i bin tijim tu se, “Fet blong yu, we i stap karem flaoa, bae i help blong tanem ol jalenj blong yu blong kam ol taem blong groap mo ol taem blong janis.”
Mi save luk olsem wanem blong stap jusum blong gat fet long Jisas Kraes, i bin blesem mi long plante moa wei bitim we mi ting se i posibol. Hemia i no minim se oltaem bae mi ronwe long harem nogud, hadtaem, o stap konfius, be hem i minim se mi save weaples blong go long hem blong gat pis mo blong stap strong.
Presiden Nelson i rimaenem yumi wetem lav se, “Plis save hemia: sapos evri samting mo evri narawan long wol we yu trastem i mas foldaon, Jisas Kraes mo Jos blong Hem bambae oli neva letem yu stap daon.”
Nomata wanem yu stap go tru long hem long laef blong yu, sapos hem i ol samting we yu no tingting blong i hapen olsem, sapos hem i ol wari blong ol voes blong wol, ol problem long famli, ol hadtaem blong helt long saed blong tingting, ol problem blong mane, hat we i soa, ol samting i no fea, o eni nara jalenj, mi invaetem yu blong gohed blong putum tras blong yu long Lod. Hem i save gud ol situesen blong yu. Hem i save yu. Hem i gat ol bigfala blesing blong yu i stap. Iven long ol taem ia we yu no wantem trastem Hem, jusum nomo blong mekem. Ol promes blong Hem oli sua. Bae hem i lidim yu i go long glad, hop, mo ol merikel long stret taem blong Hem.
Hem i stap mekem blong mi taem mi stap gohed blong trastem Hem.