“?Wanem Nao Yumi Save Prea From?,” Liahona, Julae 2024.
Kam Folem Mi
?Wanem Nao Yumi Save Prea From?
Long Alma 33 mo 34, oli tijim long yumi se yumi save prea eni ples, long eni taem, mo abaot eni samting. Long ples ia i gat eksampol blong wanwan man o woman we oli stap prea long ol defren situesen.
Taem yu stap ridim ol eksperiens ia, tingting long sam long ol wei we yu bin prea “from ol grup blong animol blong ol plantesen blong yufala,” mo “long rum blong yufala, mo insaed long ol sikret ples blong yufala, mo long waelples blong yufala” (Alma 34:25, 26).
Alma Richards we i wan Lata-dei Sent i winim blong stap long tim blong Olympic long 1912.
Stap Prea long Olympic
Alma Richards i jiam long hae jiam mo hem i pat blong 1912 Olympic tim blong atletik we oli kompit long Stockholm, Sweden. Long taem blong kompetisen, oli karkaremaot wan afta wan kasem taem Alma nomo wetem wan nara wan oli stap.
“Taem Alma i redi blong jiam, maen blong hem i stap tingting kwik long ol samting. Hem i stap long taem ia, mo i stap ripresentem kantri blong hem long atletik kompetisen we i bigwan bitim evri narawan long wol. Be hem i filim se hem i no strong yet, i olsem se ful wol i stap dipen long hem. Hem i tingting long Yuta, long famli blong hem, mo long hom taon blong hem. Hem i tingting long BYU mo Ol Sent. Hem i benem hed blong hem, mo hem i askem kwaet long God blong givim paoa long hem. ‘Sapos hem i stret blong bae hem mi mas win,’ hem i talem long prea blong hem, ‘bae mi mekem bes blong mi blong stap wan gud eksampol long evri dei long laef blong mi.’”
Hem i karem paoa blong hem long Lod, mo Alma i jiam mo i ovarem hae stik we i stap antap. Taem hem we i kompit agensem Alma i lus, Alma i winim gol medol.
Afta, wan fren “i jikim hem se hem i prea bifo hem i winim jiam blong hem. ‘Mi wantem tumas se bae yu no laf,’ Alma i ansa kwaet. ‘Mi bin prea long Lod blong i givim mi paoa blong ovarem stik ia, mo mi bin ovarem.’”
Stap prea long wan Kona blong Strit
Long 1898, Inez Knight mo Jennie Brihhall oli ol fas tu singgel woman we oli singaotem tufala olsem ol sista misinari blong Jos Ia blong Jisas Kraes blong Lata-dei Sent. I no longtaem afta we tufala i kasem misin blong tufala long Inglan, tufala woman ia i bin go blong prij long Oldham, wan smol bisnis taon kolosap long Liverpool.
Inez Knight mo Jennie Brimhall i prea from help long misinari seves blong tufala long Inglan.
Raet: Jennifer Whatcott Hooton i givim foto ia
Tufala sista ia, misin presiden blong tufala, mo ol nara misinari oli kam tugeta long wan naet. “Oli mekem wan sekol long wan kona blong strit we i bisi, oli mekem wan prea mo singsing ol hym kasem taem wan bigfala grup blong pipol oli raonem olgeta.” Ol traehad blong olgeta i gat plante sakses mekem se misin presiden “i anaonsem se bae i gat wan spesel miting long nekis dei blong hem, mo hem i invaetem evriwan blong kam mo harem prijing we i kam long ‘ol Momon woman we oli laef.’”
Prea from Transpot
Sahr blong Bo, Sierra Leone, i bin travel long moto taksi i go long wan rurol eria blong karem meresin we tufala olfala blong hem i nidim tumas. Hem i stap long taem moa bitim we hem i plan blong mekem, blong helpem papa mo mama blong hem oli fiksim ruf blong olgeta, we i bin kasem damej long wan strong win. Taem oli finis blong fiksim ruf, hem i tudak finis.
From se hem i let, i had lelebet blong faenem wan taksi. Sahr i stat blong wari. Sapos i nogat taksi, bae hem i mas wokbaot mo bae i no longwan nomo, be i denja tu. Blong stap long haos blong papa mo mama blong hem i no wan gud tingting tu from hem i mas wok eli moning long nekis dei. Antap long hemia, hem i no wantem lego yangfala famli blong hem oli stap olgetawan long naet.
I defren smol blong prea from wan moto taksi, be Sahr i askem God blong helpem hem blong gobak long haos. Sam minit afta, wan taksi i kam, we i jes putum wan man nomo long eria ia we i no bisi tumas. Sahr i talem tangkyu mo jiam long taksi, hem i filim blesing ia se hem i save kasem haos eli mo gat plante taem blong rere from wok mo kipim famli blong hem i sef.
Prea blong oli Jenisim Taemtebol
Brata Miguel Troncoso blong Santa Cruz, Argentina, i stap lukluk fored blong harem Elda Carlos H. Amado blong Olgeta Seventi, we bae i toktok long stek blong hem. Be Elda Amado i sapos blong toktok long wan Tiusdei naet, mo Brata Troncoso, we i wan hae skul tija, i mas tijim wan skul klas long naet ia. Hem mo famli blong hem oli sua se bae oli go long miting ia mo oli prea from help.
Brata Troncoso i talem hemia abaot eksperiens blong hem:
“Long dei bifo konfrens, mi filim blong toktok wetem prinsipol blong save aot 20 minit eli long klas. … Bifo mi talem wan toktok, hem i askem long mi sapos i oraet blong jenisim taem blong statem klas long Tiusdei i go tu aoa moa eli long nomol taem. …
“Hem i bin wan blesing long mifala. Mifala i bin kam eli long miting mo gat plante taem mo filim Spirit long fored blong wan long ol disaepol blong Lod. … Antap long hemia, mifala i bin kasem wan testemoni olsem wan famli se Papa long Heven i save ol hat blong mifala mo i stap lisin long ol prea blong mifala.”