Kam Folem Mi

Alma 22

?Wanem Nao Yu Save Stopem blong Save God?

wan man we i stap wokbaot long sanbij

Blong stap laef folem gospel plante taem i nidim sakrifaes. Papa long Heven i askem yumi blong stop blong mekem ol samting we oltaem yumi stap mekem blong kasem wan samting we i moa bigwan: wan save abaot God mo ol blesing we yumi no save komperem long ol nara samting, we Hem i givim.

Papa blong king Lamonae i soem hamas hem i wantem blong sakrifaesem taem hem i prea, “Sapos i gat wan God, mo sapos yu yu God, plis soemaot yu long mi, mo bae mi sakem evri sin blong mi blong save yu, mo blong mekem se mi save girap long ded, mo yu sevem mi long las dei” (Alma 22:18; oli ademap long italik).

Presiden Russell M. Nelson i tijim se blong stap winim wol mo stap gro i kam moa kolosap long Papa long Heven mo Jisas Kraes, i tekem tu blong “stap jusum blong stap longwe long eni samting we i ronemaot Spirit” mo “blong wantem blong ‘givimaot’ iven ol fevret sin blong yumi.”

Ol Kwestin blong Tingting long hem

Ol fevret sin oli save had blong luksave from plante taem yumi traem blong faet from rong blong olgeta o letem olgeta i kam wan fasin we yumi mekem oltaem. Tingting blong tekem sam taem blong tingting hevi long ol “fevret” sin we oli stap holemtaet yu blong kam moa kolosap long Papa long Heven mo Jisas Kraes.

• ?Wanem sam long ol fevret sin blong mi?

• ?Wanem nao ol step we mi save tekem blong winim ol sin ia?

• ?Wanem ol samting we bae i stopem mi taem mi stap traehad?

• ?Bae i save helpem mi olsem wanem blong sakrifaesem ol sin ia long ol eria we mi stap faenem i had?

Ol Blesing

Antap long ol blesing we papa blong king Lamonae i wantem, hem i laef bakegen long ded mo fasin blong sevem man, Presiden Nelson i talem sam moa blesing we oli kam taem yumi traehad blong kam moa olsem Jisas Kraes mo stap long kavenan rod. Hemia i tekem tu:

• Wan jenis long hat mo fasin

• Jareti

• Fasin blong Gat Tingting I Stap Daon

• Fasin blong gat bigfala hat

• Fasin blong stap kaen

• Fasin blong kontrolem yuwan

• Pis

• Tras long yuwan

• Glad

• Spel

• Paoa long saed blong Spirit

• Revelesen we I blong Yuwan

• Mekem fet i bigwan moa

• Ministri blong ol enjel

• Merikel

Sapos yu faenem i had blong stap sakrifaesem sam sin, no givap. Presiden Nelson i rimaenem yumi se “blong winim wol i no minim blong kam stret evriwan long laef, o se ol problem blong yu bae oli lus nomo olsem—from se bae oli no save. Mo i no minim se bae yu nomo mekem ol mistek. Be blong winim wol i minim se paoa blong yu blong faet agensem sin bae i kam antap.”

Taem yumi traehad blong stopem ol sin blong yumi olsem papa blong king Lamonae, bae yumi faenem se, ol sakrifaes blong yumi i gat valiu taem yumi kam blong save God. Taem yumi mekem olsem, laef blong yumi wanwan bae i kam wan samting we i moa bigwan bitim wanem we yumi save mekem yumiwan nomo.

Ol Not

1. Russell M. Nelson, “Winim Wol Ia Mo Faenem Pis,” Liahona, Novemba 2022, 96.

2. Luk long Russell M. Nelson, “Winim Wol ia mo Faenem Pis,”97, 98.

3. Russell M. Nelson, “Winim Wol ia mo Faenem Pis,” 96.