Eria Lidasip Mesej
Stap Save Huia Yumi, I Mekem Yumi Strong Truaot Laef
Olsem ol pikinini, mi mo yangfala brata blong mi i stap glad tumas blong luk papa blong mifala i kambak long wok. Bae mitufala i save wet wetem ol klos blong slip mo bae mitufala i ron i go daon long lata blong welkamem hem long garaj taem hem i kasem haos. Oltaem bae papa i letem mitufala i save hamas hem i glad tumas blong luk mitufala. Bae hem i stap singaotem mitufala se “ol mein man” blong hem. Bae hem i askem dei blong mitufala mo sapos mama i oraet.
Samtaem papa blong mitufala bae i no kambak hom kwik mo gudfala mama blong mitufala bae i putum mitufala long bed. Long ol taem olsem, taem bae hem i kambak, bae hem i kam luk mitufala long rum. Bae mitufala i askem hem blong talem wan stori long mitufala bifo slip. Mitufala i laekem ol stori blong hem bifo slip. Oltaem ol stori ia i abaot mitufala, “Jared mo Luk”. Be moa impoten, ol stori bae oli oltaem en semmak nomo. Jared mo Luk bae tufala i kam bigwan mo kam “ol gud man” blong go mekem “misinari wok”.
Ol stori ia oli gat bigfala mining long mifala taem mifala i stap kam bigwan. Tru long ol stori ia, papa blong mitufala i rimaenem mitufala bakegen se gospel blong Jisas Kraes i stamba blong aedentiti blong mitufala, stap kam gudfala man wetem gud fasin, mo blong stap redi blong mekem wanem mifala i agri blong mekem. Taem mifala i travel tugeta olsem wan famli, papa mo mama bae i mekem i klia gud long mifala se mifala i ol pikinini blong God mo we mifala i save gat sakses long eni samting we mifala i lukluk moa long hem long laef ia.
Mi trastem se ol stori ia i bin helpem bildim laef blong mitufalawan mo blong gat paoa blong save stanap strong agensem ol situesen long saed blong filing. Taem tufala i stap tijim mitufala abaot tabu paoa blong mitufala, Papa mo mama i bin rere long mifala blong gat sakses mo blong save winim enemi mo ol jalenj blong laef.
Yumi evriwan i pikinini blong God. Taem yumi andastanem tabu aedentiti blong yumi, hemia i helpem yumi winim ol jalenj mo mekem ol moa gud joes. I helpem yumi blong “tingting selestial” from i no mekem yumi andastanem huia yumi nomo, be tu from wanem yumi stap ia mo stamba tingting blong enemi.
Presiden Russell M. Nelson i bin tijim tri stamba trutok we bae i helpem yumi blong rere from laef we i no save finis:
-
Faswan, save trutok abaot huia yu.
-
Nambatu, save trutok abaot wanem Papa long Heven mo Pikinini Boe blong Hem i bin givim long yu.
-
Mo nambatri, save trutok we i go wetem fasin blong yu blong jenisim laef.
Olsem we Presiden Nelson i talem “. . . wei we yu stap tingting long hem long huia yu stret, i mekem se yu save hao blong mekem wan gud desisen long evri desisen. Presiden Nelson i talemaot tri stamba aedentiti: faswan, yumi ol pikinini blong God, nambatu, olsem ol memba blong Jos, yumi ol kavenan pikinini, mo nambatri, yumi ol disaepol blong Kraes. Ol aedentiti ia i mekem se yumi save gro long saed blong spirit bitim we blong “ded long saed blong spirit”.
Taem mi bin wan yangfala loya, plante taem bae mi luk miwan olsem wan “loya”. Be, loa i wanem we mi mekem, i no huia mi. Mi faenem se taem mi save se mi wan “disaepol blong Kraes”, mi nomo oganaesem laef blong mi long wok blong jos, wok, hom o folem sosol aktiviti be mi mekem evri desisen blong mi folem ples we mi wantem kasem we i no save finis. Mi bilif se mi mi wan moa gud hasban, papa, fren, mo loya long en.
Plante yia i pas, olsem wan yang Stek Presiden, wan long ol bisop blong mifala i bin gat wan hom long Kraesjos we etkwek i bin smasem mo wota i spolem bilding mo oli mas muv plante taem smol. Mi bin askem gud man ia olsem wanem nao hem i save go tru wetem situesen ia. Long taem ia, hem i rimaenem mi se hem mo famli blong hem i bin save huia olgeta olsem ol pikinini blong God, mo oli gat tras se God bae i mekem wei mo bae i lukaotem gud olgeta.
Blong stap tijim ol pikinini abaot huia olgeta, i help blong redi long olgeta blong wan taem we i no save finis. Ol Proveb 22:6: “Sipos yu tijim gud pikinini blong yu long fasin we i stret blong hem i folem, taem hem i kam bigman, bambae i no save gowe long hem.”
Taem yumi tijim plan blong Papa blong yumi long Heven, tugeta wetem aedentiti mo tabu paoa blong olgeta, yumi stap tijim long olgeta se Papa long Heven i lavem olgeta, se oli gat valiu, mo tabu paoa blong olgeta i blong kam olsem Papa blong olgeta long Heven. Taem yumi laef folem ol trutok ia, yumi stap soem long ol pikinini, yut, mo ol yang singgel adalt blong yumi se yumi save winim ol jalenj blong laef mo gat sakses mo glad, taem yumi stap laef folem gospel blong Jisas Kraes.
Momon i talem, “Luk, mi mi wan disaepol blong Jisas Kraes, Pikinini blong God. Hem i bin singaotem mi blong talemaot toktok blong hem long medel blong ol pipol blong hem, blong oli save gat laef we i no gat en.” Long toktok ia, Momon i stap serem aedentiti blong hem wetem paoa, testemoni, mo stamba tingting blong hem. Taem ol yut blong yumi oli yusum ol toktok blong Momon long yia ia, bae oli no joenem Papa long Heven mo Jisas Kraes long ol tabu wok blong olgeta nomo, be bae oli rere gud long ol jalenj mo wanem we enemi i rere long hem long laef blong wol ia.
Nomata se yumi yangfala o olfala, bae yumi oltaem tingbaot gudfala kaonsel blong Elda Dieter F. Uchtdorf:
“. . . namba blong taem we yumi foldaon bae i no talemaot ples we bae yumi stap long hem long en, be hem i namba blong taem we yumi girap, klinimaot das long yumi, mo muv i go fored.”