Ngaahi peesi fakalotofonuá
Kasem Blesing Tru Ol Mesej blong Ol Aposol blong Taem Ia
“O, hamas yumi nidim jeneral konfrens!” i bin testemoni blong Elda Robert D. Hales long 2013. “Tru long ol konfrens, fet blong yumi i kam strong mo testemoni blong yumi i gro bigwan.” Long semmak toktok ia, Elda Hales i bin promes:
“. . . spos yu wantem, lisin, bae yu filim se Spirit i wok gud wetem yu. Lod bae i talem long yu wanem Hem i wantem yu blong mekem wetem laef blong yu.
“Long ol konfrens, yumi save kasem toktok blong Lod we i blong yumi nomo.”
Long spesel pikja ia, sam memba blong Rilif Sosaeti presidensi blong yumi raon long Pasifik, oli serem witnes blong ol instraksen we i blong olgetawan we oli kasem long Tabu Spirit tru long ol toktok blong ol Aposol blong taem blong yumi tedei. Wanwan sista i serem wan Jeneral Konfrens mesej we hem i kipim olsem memori blong hem, mo olsem wanem i bin mekem laef blong hem i defren.
Sista Shireen A’Costa
Suva 1st Wod, Suva Fiji Stek
Long Septemba las yia, mi travel i go ovasi long wan misin long saed blong wok mo bin disaed blong tekem spel blong sam wik sapos mi save. Wanwan wik we mi stap aot, mi wokem talem long miwan se bae mi pem taeting taem mi gobak hom. Long taem we mi gobak hom, sam wik afta, mi luksave se i bin tri manis we mi nomo pem taeting blong mi. Fas Sandei blong mi bakegen long jos, mi pem taeting blong fas manis we mi bin aot afta mi traehad nao long maen blong mi. Naoia ol bigfala holidei nao. ?Mi rili nidim blong pem?
Blong no mekem mi wari, mi sendem wan mesej long bisop blong mi mo serem samting we i stap mekem mi wari, wetem hop se bae hem i andastanem mi mo talem long mi wanem mi wantem harem. Hem i askem, “?Yu wantem go long tempol o no?” From sapos mi tingbaot, hemia i wan komanmen we yumi mas kipim blong save go long tempol.
Mi bin save long hat blong mi se oli bin testem fet blong mi mo mi stap stopem mi from blesing ia we Lod i promesem olgeta we oli fetful mo stap pem taeting blong olgeta: “Bae Hem i openem ol windo blong Heven mo kapsaetem blesing long yu, mo bae i no gat inaf rum blong kasem.”
Long toktok blong hem, Taeting: Stap Openem Ol Windo blong Heven, Elda Neil L. Andersen i bin serem:
“Ol windo blong heven oli open long plante wei. Sam oli blong wol ia, be plante oli long saed blong spirit. Sam oli smosmol mo oli isi blong yumi no luksave. Trastem taem blong Lod; oltaem ol blesing oli kam.”
Olsem wan wido, wan mama long wan naesfala yang woman, wan singgel mama nomo, mo fas kaonsela blong Rilif Sosaeti wod blong mifala, mi dipen bigwan long promes blesing ia.
Glad we mi bin filim, pis we i fulumap mi bae i no save kam long mi sapos mi no bin ones mo fetful blong mekem wanem we i stret. Mi save wetem tru tingting se ol promes ia oli tru mo nomata ol jalenj, mi bin stap strong kasem en, blesing i bin kam long laef blong mi bakegen mo bakegen.
Sista Marlène Aroita
Toahotu Wod, Tahiti Taravao Stek
I tru, evri jeneral konfrens mesej i fidim sol blong yumi . . . evri taem.
Long Oktoba 2023 konfrens, from se mi go tru wan bigfala hadtaem long saed blong filing, mesej blong Elda Alan T. Phillips long toktok ia, God I Save mo I Lavem Yu, i mekem mi pulum gud win. Toktok ia i helpem mi tingbaot se mi mi spesel pikinini blong Papa blong Mi We I No Save Finis mo Sevya blong mi Jisas Kraes. Hem i bin pem praes from sol blong mi. Tru long sakrifaes blong Hem, mi save sakem sin evri taem we mi mekem i no stret mo gohed strong blong kam bes pat blong laef blong mi.
Iven sapos mi no trastem miwan tumas, wetem Lod long saed blong mi, mi gat paoa blong stanap strong tru ol hadtaem kasem en. Hem i oraet blong krae, blong stop, blong foldaon . . . from bae i gat wan moa gud dei tumoro wetem glad, lav mo fet. Mi glad mo talem tangkyu blong save se God i lavem tumas wanwan long yumi we i mekem se Hem i rere long evri samting blong yumi stap hapi. Presiden Russell M. Nelson mo evri lida blong Jos oli ol tul long ol han blong Papa blong yumi long Heven blong lidim yumi tru long ol hadtaem blong yumi.
Long tu yia ia we i pas, ol jeneral konfrens mesej i bin olsem wan sef ples long wol ia . . . ol ansa long ol prea blong mi. Oli bin helpem mi go tru ol harem nogud blong mi wetem fasin blong save wet longtaem moa taem mi gohed long rod ia blong kavenan. Mi traehad bigwan blong folem advaes blong Presiden Nelson blong stap moa kaen mo tingting selestial. Ol samting oli stap kam gud; hevi samting i kam isi blong karem. Sapos i no lav blong olgeta, bae mi no save gohed long rod ia. Mi save se God i lavem yumi, mo i wan meresin blong hat mo sol blong mi.
Sista Emma Alofipo Tanuvasa
Massey Park Wod, Auckland Papatoetoe Stek
Toktok blong Presiden Russell M. Nelson long jeneral konfrens we i Glad mo Traehad blong Laef long Saed blong Spirit (Oktoba 2016) i bin tajem bigwan laef blong mi. Hem i bin tijim se wan ki prinsipol blong traehad blong laef long saed blong spirit, speseli long ol hadtaem, hem i we “Ol man oli stap, blong oli save gat glad.”
Long Ogis 2014, ol naesfala paren blong mi, Kalisi mo Fa’amanatu Alofipo i bin ded long sem wik nomo from tufala i bin sik. Tufala tugeta i bin ol konvet blong Jos Ia blong Jisas Kraes blong Ol Lata-dei Sent, be taem tufala i bin konvet, tufala i bin stanap strong kasem en olsem ol tru disaepol blong Jisas Kraes. So ?olsem wanem nao mi save faenem glad taem mi lusum tugeta papa mo mama blong mi nomata samtaem harem nogud blong mi i bigwan?
Presiden Nelson i rimaenem mi se:
“Yumi save stat taem yumi ‘luk long Jisas se Hem i stap long stat i go kasem en blong stamba blong bilif blong yumi,’ mo, ‘ long saed blong evri tingting blong yumi. Yumi save talem tangkyu long Hem oltaem long ol prea blong yumi mo taem yumi kipim ol kavenan we yumi bin mekem wetem Hem mo Papa blong yumi long Heven. Taem se Sevya i kam moa ril long yumi mo taem yumi stap askem glad blong Hem, bae glad blong yumi i kam antap.”
Mi save hemia i tru mo mi testifae se tru glad i kam tru long Jisas Kraes mo Atonmen blong Hem we i nogat en. Hem i kam taem mi stap kipim ol kavenan blong mi, we i olsem yok we i fasem mi i go long Sevya mo givim mi akses long paoa blong Hem we i hae mo blong fesem ol tes mo ol hadtaem. Glad i kam taem wan famli I sil blong taem we i no save finis insaed long tempol—i go long papa mo mama blong mi, long hasban blong mi Alofa, mo gel blong mitufala Ane.
Glad i kam tu tru long fetful givhan brata mo sista we oli givhan long ol taem blong nid.
Presiden Nelson i testifae se: “Glad i wan presen we i blong olgeta we oli fetful. Hem i presen we i kam taem wan i wantem mo minim blong traem blong laef long wan stret mo gud laef, olsem we Jisas Kraes i tijim.”