Lokol Pej
Wan Lav blong Tempol We i blong Ful Laef
Betty Mcllwaine i stap tingbaot yet glad ia we hem i bin gat taem hem mo hasban blong hem we i ded finis, Bill, tufala i bin kasem tijing se ol famli oli save stap blong taem we i no save finis tru ol odinens we bae oli mekem insaed long ol tempol blong Jos Ia blong Jisas Kraes blong Ol Lata-dei Sent. Afta siksti yia i pas, olsem wan memba blong Jos, Hem i gohed blong stap glad evri wik long taem blong wosip mo seves long Adelaide Ostrelia Tempol.
Evri wik, Betty bae i login long FamilySearch ap blong faenem wan famli we i ded we bae hem i save help blong karem tempol blesing long olgeta. Hem i talem, “I spesel tumas blong stap karem wan famli nem long kad i go long tempol, blong tingbaot man o woman ia mo laef blong hem, mo blong prea mo hop se bae hem i akseptem gospel mo ol odinens.”
Lukluk long laef blong hemwan, Betty i talem, “Papa long Heven i oltaem gud long mi mo famli blong mi.”
Hem i bin bon long 4 Jenuware 1932 long Kadina, long Yorke Peninsula blong South Australia. I bin long taem blong bigfala foldaon blong Ekonomi long wol mo papa blong hem, wan long ol plante man we i stap lukaotem wok long taem ia, i bin muv wetem famli blong hem i go long Whyalla blong wok long niufala ples blong sip.
Oli laef andanit long wan tenet long saed blong solwota kasem we papa blong Betty i save bildim wan smol haos blong olgeta. Hem i tingbaot, “Spos yu save luk longwe, longfala laen blong ol tenet we ol famli oli slip insaed long hem long saed blong solwota.” Ol pikinini oli laekem blong stap ia mo stap go swim enitaem we oli wantem.
Long 1950 Betty i bin mitim hasban blong hem Bill, we i bin muvaot long Belfast, Not blong Ireland blong go faenem wok tu long yad blong sip. Tufala i mared wan yia afta mo gat tri pikinini boe mo wan gel, be sori nao, i bin gat wan rod aksiden mo seken boe blong hem Donal, we i gat 21 yia i bin ded. Naoia, Betty i gat 11 apu pikinini mo 26 bigfala apu pikinini mo talem, “Evriwan long olgeta i fulap long lav.”
Fasbon blong tufala, Maekel, i bin mitim ol misinari blong Jos Ia blong Jisas Kraes blong Ol Lata-dei Sent long praemeri skul blong fas taem. Long taem ia, ol skul oli bin gat ol klas blong relijin abaot ol defren jos mo Maekel bae i kambak long haos mo glad blong talem hamas hem i laekem ol klas ia.
I no longtaem, ol misinari i go stap visitim ol famli Mcllwaines mo tijim olgeta gospel blong Jisas Kraes long ful famli. Betty I tingbaot taem hem i filim paoa blong Tabu Spirit long fas taem we oli go long miting blong Bhyalla Branj, speseli long taem blong sakramen seves.
Famli Mcllwaines i bin kasem baptaes long solwota blong Shyalla long 29 Disemba 1962. Long Krismes Dei 1967, ful famli i bin flae i go long Niu Silan blong sil blong wan taem we i no save finis long Hamilton Niu Silan Tempol. Afta long fas visit, Betty mo Bill “i lavem tumas tempol” mo gobak “plante taem olsem we oli save mekem.”
Sam yia afta, long 2000, oli bin dediketem Adelaide Ostrelia Tempol, mo evri manis, Bill mo Betty bae I travel fo aoa long Whyalla blong go givim seves mo wosip longwe. Afta long 2003, oli “droem wan sekol we i save tekem olgeta go long tempol blong 30 minit, mo oli kasem blesing ia blong faenem wan hom we i olsem 10 minit nomo blong draev. Oli stat blong wokbaot tu(2) dei long wan wik long tempol mo mekem olsem blong 10 yia, kasem we Bill i stap blong sik.
Betty i gobak visitim tempol oltaem afta Bill i ded long 2015 mo naoia we hem i gat 91 yia, hem i talem, “mi hop blong stap mekem hemia kasem we bae mi ded”.
Long Maj blong 2023, oli bin singaotem boe blong hem Maekel blong kam presiden blong Adelaide Australia Tempol, wetem waef blong hem, Caroline, olsem tempol matron. Betty i bin “hapi tumas” taem hem i save long hemia, mo hem i bin sua, “Bill i mas stap smael antap long heven”.
Ded blong boe blong hem Donald mo i no longtaem hemia blong hasban blong hem Bill, i bin mekem Betty i glad mo talem tangkyu wetem blesing ia blong save se Plan blong God blong Fasin blong Stap Glad i tekem ol famli i kam tugeta blong taem we i no save finis.
Hem i lavem gospel trutok ia se ol famli i save stap tugeta blong oltaem. “Hemia i wan gudfala samting we i mekem se yumi save stap long stret mo tintin rod blong yumi save stap yunaet long nekis laef.”