«Համարձակություն՝ կիսվելու նրանով, ինչն ամենից շատ եմ գնահատում», Լիահոնա, հուլիս 2024։
Համարձակություն՝ կիսվելու նրանով, ինչն ամենից շատ եմ գնահատում
Հետևելով իմ եպիսկոպոսի և նրա կնոջ օրինակին՝ ես նպատակ ունեի կիսվել Մորմոնի Գրքով յուրաքանչյուր ճամփորդության ընթացքում՝ որպես ոգևորողների թիմի անդամ:
Մեծանալիս սիրում էի հետևել, թե ինչպես են տատիկիս հավերը փոթորիկների ժամանակ իրենց ձագերին թևերի տակ հավաքում՝ նրանց անվտանգ և պաշտպանված պահելու համար: Այդ պատկերն ինձ համար ավելի կարևոր դարձավ Մորմոնի Գրքում դրա մասին կարդալուց հետո (տես 3 Նեփի 10.4–6): Իմ եպիսկոպոսը և նրա կինը, որոնք շատ էին ճամփորդում իրենց աշխատանքի բերումով, ինձ ասացին, որ յուրաքանչյուր ճամփորդության ժամանակ Մորմոնի Գրքով կիսվում էին ինչ-որ մեկի հետ:
Դա ինձ ոգեշնչեց: Ես հիանում էի նրանցով, և նրանց օրինակները հուզեցին իմ սիրտը: Ես որոշեցի, որ եթե երբևէ հնարավորություն ունենամ ճամփորդել Յուտայից (ԱՄՆ) դուրս, ես կհետևեմ նրանց օրինակին և ամեն անգամ կկիսվեմ Մորմոնի Գրքով:
Ես՝ որպես Բրիգամ Յանգ Համալսարանի ոգևորողների թիմի անդամ, հաճախակի ճամփորդում էի թիմի հետ: Իմ առաջին ճամփորդությունից առաջ ես գնեցի Մորմոնի Գիրքը և իմ վկայությունը գրեցի դրանում: Ես ցանկանում էի քաջություն զարգացնել՝ ուրիշների հետ կիսվելու նրանով, ինչն ամենից շատ էի գնահատում. իմ վկայությունը և Մորմոնի Գիրքը: Ես ցանկանում էի նմանվել իմ եպիսկոպոսին և նրա կնոջը: Ես ուզում էի նմանվել Հիսուս Քրիստոսին: Ես ուզում էի օգնել հավաքել ուրիշներին և օգնել նրանց գալ Նրա մոտ:
Ես արագ հասկացա, որ եթե ամեն ճամփորդությունից առաջ աղոթեի, որ ուղղորդվեմ դեպի այն մարդը, որը դրա կարիքն ունի, ապա նա կհայտնվի ճիշտ ժամանակին և ճիշտ վայրում, որպեսզի ես նրա հետ կիսվեմ Մորմոնի Գրքով՝ բնական ու հեշտ եղանակով: Որքան շատ էի կիրառում այդ եղանակը, այնքան ավելի հեշտ էի կիսվում: Իմ ճամփորդություններն ինձ համար ավելի իմաստալից դարձան։ Ես միշտ ոգևորվում էի, երբ գտնում էի Քրիստոսի այս սուրբ կտակարանը ստացող Երկնային Հոր օրհնյալ զավակին:
Ճամփորդելիս ես մտորում էի. «Ո՞ւր պետք է գնամ, որպեսզի գտնեմ նրան, ում Երկնային Հայրն ուղարկում է ինձ այս անգամ: Ի՞նչ կարող եմ ասել նրան, որպեսզի փոխանցեմ, թե որքան թանկ է ինձ համար Մորմոնի Գիրքը»: Իմ մտքերն ու գործողությունները կենտրոնացած էին իմ սեփական կարիքներից ու զվարճանքներից դուրս, և ես ավելի մեծ սեր էի զգում բոլորի հանդեպ, ում հանդիպում էի: Ես փորձում էի նայել նրանց Փրկչի աչքերով: Ես աղոթում էի, որ նրանք ընդունեն աստվածային պարգևը, որն ինձ ուղարկել էր Երկնային Հայրը՝ նրանց առաջարկելու համար:
Ես տխրեցի, երբ ավարտվեց իմ ուսումնառության վերջին տարին: ԲՅՀ-ի ոգևորողների թիմի անդամ լինելն ինձ համար ողջ կյանքի երազանք էր: Ես վայելում էի ոգևորելու իմ անհավանական փորձառությունը՝ անկախ ամեն ինչից, բայց Մորմոնի Գրքի մեկ օրինակով կիսվելու հնարավորությունը յուրաքանչյուր ուրախ ճամփորդության ընթացքում իմ կյանքը հարստացրեց գեղեցիկ, անսպասելի ձևերով:
Մորմոնի Գրքով կիսվելը արժեքավոր և հեշտ միջոց էր իմ համալսարանական փորձառությանը լրացուցիչ իմաստ ավելացնելու համար: Ես գիտեմ, որ մարդիկ, ում հետ ես կիսվել եմ Մորմոնի Գրքով, հատուկ առաջնորդվել են այն ստանալու համար: Ես նաև գիտեմ, որ իմ կյանքի անհավատալի գոբելենի մեջ Երկնային Հայրը հյուսել է մի սիրառատ ու քաղցր գթառատ ողորմածություն. Նա թույլ տվեց ինձ զգալ Իր սերը Իր զավակների հանդեպ հատուկ ձևով՝ իմ յուրաքանչյուր ճամփորդության ընթացքում:
Ավարտելուց հետո ես որոշեցի միշտ շարունակել փնտրել մեկին, ում հետ կարող եմ կիսվել իմ վկայությամբ: Ժամանակի ընթացքում ես զարգացրի ավելի մեծ կարողություն և մխիթարություն՝ կիսվելով իմ վկայությամբ: Ես սովորեցի այլևս չվախենալ դրանով կիսվելուց: Ես հավատում եմ, որ բոլորը կարող են ավելի հեշտությամբ կիսվել իրենց վկայությամբ՝ հաճախ կիրառելով այդ գործընթացը և խնդրելով աստվածային օգնություն:
Իմ լավ եպիսկոպոսի և նրա կնոջ օրինակներին հետևելու ընտրությունը իմ կյանքն առավել իմաստալից դարձրեց շատ առումներով: Դա ինձ սովորեցրեց տեսնել, որ Տերը ճանաչում է Իր զավակներից յուրաքանչյուրին: Նա սիրում է մեզ և ցանկանում է մեզ բոլորիս հավաքել Իր թևի տակ: Մեծ օրհնություն է հասկանալ գեղեցիկ պատկերները, որոնք Նա օգտագործում է, երբ նկարագրում է Իր հավաքումը: Նա հավաքում է մեզ, ինչպես հավն է հավաքում և քնքշորեն պաշտպանում է իր ձագերին։
Հեղինակն ապրում է Յուտայում (ԱՄՆ):