Եկ, հետևիր ինձ

Ալմա 22

Ինչի՞ց կհրաժարվեիք Աստծուն ճանաչելու համար

Երիտասարդը քայլում է ծովափով

Ավետարանով ապրելը հաճախ պահանջում է զոհաբերություն: Երկնային Հայրը խնդրում է մեզ հրաժարվել մեր բնական հակումներից՝ ստանալու շատ ավելի մեծ բան՝ Աստծո գիտելիքը և Նրա առաջարկած անզուգական օրհնությունները:

Թագավոր Լամոնիի հայրը ցույց տվեց զոհաբերության այս պատրաստակամությունը, երբ նա աղոթեց. «Եթե կա Աստված, և եթե դու Աստված ես, դու քեզ հայտնի չէի՞ր դարձնի ինձ, և ես կհրաժարվեմ իմ բոլոր մեղքերից՝ քեզ գիտենալու համար, և որպեսզի ես կարողանամ բարձրանալ մեռելներից և փրկվել վերջին օրը» (Ալմա 22.18, շեշտադրումն ավելացված է):

Նախագահ Ռասսել Մ. Նելսոնն ուսուցանել է, որ աշխարհին հաղթահարելը և Երկնային Հորն ու Հիսուս Քրիստոսին մոտենալը ներառում է «ընտրել ձեռնպահ մնալ այն ամենից, ինչը վանում է Հոգուն» և «պատրաստ լինել «հրաժարվելու» նույնիսկ մեր սիրելի մեղքերից»:

Հարցեր, որոնք պետք է հաշվի առնել

Սիրելի մեղքերը դժվար է ճանաչել, քանի որ մենք հաճախ արդարացնում ենք դրանք կամ թույլ ենք տալիս, որ դրանք դառնան սովորական: Որոշ ժամանակ հատկացրեք մտածելու «սիրելի» մեղքերի մասին, որոնք խանգարում են ձեզ ավելի մոտ լինել Երկնային Հորը և Հիսուս Քրիստոսին:

• Որո՞նք են իմ սիրելի մեղքերից մի քանիսը:

• Ի՞նչ քայլեր կարող եմ ձեռնարկել այդ մեղքերը հաղթահարելու համար:

• Ի՞նչ խոչընդոտների կհանդիպեմ իմ ջանքերում:

• Այս մեղքերի զոհաբերումն ինչպե՞ս կարող է օգնել ինձ այն ոլորտներում, որտեղ ես մաքառումների մեջ եմ:

Օրհնություններ

Ի հավելումն այն օրհնությունների, որ փնտրում էր թագավոր Լամոնիի հայրը, այն է՝ հարություն և փրկություն, նախագահ Նելսոնը թվարկել է ավելի շատ օրհնություններ, որոնք գալիս են Հիսուս Քրիստոսին ավելի նմանվելու և ուխտի ուղու վրա մնալու մեր ջանքերից: Դրանք ներառում են.

• Սրտի և էության փոփոխություն

• Գթություն

• Խոնարհություն

• Առատաձեռնություն

• Բարություն

• Ինքնակարգապահություն

• Խաղաղություն

• Վստահություն

• Ուրախություն

• Հանգիստ

• Հոգևոր ուժ

• Անձնական հայտնություն

• Հավատքի ավելացում

• Հրեշտակների սպասավորություն

• Հրաշքներ

Եթե դժվարանում եք որոշակի մեղքեր զոհաբերել, մի հանձնվեք: Նախագահ Նելսոնը հիշեցնում է մեզ. «Իհարկե, «հաղթել աշխարհին» չի նշանակում դառնալ կատարյալ այս կյանքում, ոչ էլ նշանակում է, որ ձեր խնդիրները հրաշքով կվերանան, քանի որ դրանք չեն վերանա: Եվ դա չի նշանակում, որ դուք այլևս չեք սխալվի։ Բայց «հաղթել աշխարհին» նշանակում է, որ մեղքի նկատմամբ ձեր դիմադրողականությունը կավելանա»:

Երբ մենք ջանքեր գործադրենք՝ թողնելու մեր մեղքերը, ինչպես թագավոր Լամոնիի հայրը, մենք կտեսնենք, որ Աստծուն ճանաչելը միշտ էլ արժե այդ զոհաբերությունը: Դրանով մեզանից յուրաքանչյուրի կյանքը կդառնա շատ ավելի հրաշալի, քան մենք ինքներս կարող էինք դարձնել այն:

Հղումներ

1. Ռասսել Մ․ Նելսոն, «Հաղթել աշխարհին և գտնել հանգստություն», Լիահոնա, նոյ. 2022, 96:

2. Տես Ռասսել Մ․ Նելսոն, «Հաղթել աշխարհին և գտնել հանգստություն», 97, 98:

3. Ռասսել Մ․ Նելսոն, «Հաղթել աշխարհին և գտնել հանգստություն», 96: