« ភាពក្លាហានដើម្បីចែកចាយអ្វីដែលខ្ញុំឲ្យតម្លៃបំផុត » លីអាហូណា ខែ កក្កដា ឆ្នាំ ២០២៤ ។
ភាពក្លាហានដើម្បីចែកចាយ អ្វីដែលខ្ញុំឲ្យតម្លៃបំផុត
ការធ្វើតាមគំរូរបស់ប៊ីស្សពខ្ញុំ និងភរិយារបស់គាត់ នោះខ្ញុំមានគោលដៅចែកចាយព្រះគម្ពីរមរមនមួយក្បាល រាល់ពេលធ្វើដំណើរទៅធ្វើជាអ្នកលើកទឹកចិត្តដល់កីឡាករម្តងៗ ។
កាលធំឡើង ខ្ញុំចូលចិត្តមើលមេមាន់របស់លោកយាយក្រុងកូនរបស់វានៅក្រោមស្លាបវា អំឡុងពេលមានព្យុះដើម្បីការពារ និងរក្សាសុវត្ថិភាពកូនរបស់វា ។ ទិដ្ឋភាពនេះបានក្លាយជារឿងកាន់តែសំខាន់ចំពោះខ្ញុំ បន្ទាប់ពីបានអានអំពីរឿងនេះនៅក្នុងព្រះគម្ពីរមរមន ( សូមមើល នីហ្វៃទី៣ ១០:៤–៦ ) ។ ពេលនៅជាយុវមជ្ឈិមវ័យ ប៊ីស្សពរបស់ខ្ញុំ និងភរិយាគាត់ដែលបានធ្វើដំណើរជាច្រើនសម្រាប់អាជីវកម្មរបស់ពួកគាត់បានប្រាប់ខ្ញុំថា ពួកគាត់បានជូនព្រះគម្ពីរមរមនមួយក្បាលទៅនរណាម្នាក់នៅគ្រប់ពេលដែលពួកគាត់ធ្វើដំណើរ ។
រឿងនោះបានបំផុសគំនិតដល់ខ្ញុំ ។ ខ្ញុំកោតសរសើរពួកគាត់ ហើយគំរូរបស់ពួកគាត់បានជ្រោតជ្រាបដល់ដួងចិត្តរបស់ខ្ញុំ ។ ខ្ញុំបានសម្រេចចិត្តថា ប្រសិនបើខ្ញុំមានឱកាសធ្វើដំណើរទៅក្រៅពីរដ្ឋយូថាហ៍ សហរដ្ឋអាមេរិក ខ្ញុំនឹងធ្វើតាមគំរូរបស់ពួកគាត់ ហើយចែកចាយព្រះគម្ពីរមរមនគ្រប់ពេល ។
ក្នុងនាមជាអ្នកលើកទឹកចិត្តដល់កីឡាករសម្រាប់សាកលវិទ្យាល័យ ព្រិកហាំ យ៉ង់ ខ្ញុំបានធ្វើដំណើរជាញឹកញាប់ជាមួយក្រុមអ្នកលើកទឹកចិត្តដល់កីឡាករនេះ ។ មុនពេលធ្វើដំណើរលើកដំបូងរបស់ខ្ញុំ នោះខ្ញុំបានទិញព្រះគម្ពីរមរមនមួយក្បាល ហើយសរសេរទីបន្ទាល់របស់ខ្ញុំដាក់នៅក្នុងព្រះគម្ពីរនោះ ។ ខ្ញុំចង់អភិវឌ្ឍភាពក្លាហានដើម្បីចែកចាយនូវអ្វីដែលខ្ញុំឲ្យតម្លៃបំផុតជាមួយអ្នកដទៃ ៖ ទីបន្ទាល់របស់ខ្ញុំ និងព្រះគម្ពីរមរមន ។ ខ្ញុំចង់ធ្វើដូចប៊ីស្សពរបស់ខ្ញុំ និងភរិយារបស់គាត់ ។ ខ្ញុំចង់ក្លាយដូចជាព្រះយេស៊ូវគ្រីស្ទ ។ ខ្ញុំចង់ជួយប្រមូលអ្នកដទៃ ហើយជួយពួកគេឲ្យមករកទ្រង់ ។
ខ្ញុំបានដឹងយ៉ាងឆាប់រហ័សថា ប្រសិនបើខ្ញុំបានអធិស្ឋានមុនពេលធ្វើដំណើរនីមួយៗដើម្បីទទួលការដឹកនាំឲ្យទៅជួបអ្នកដែលត្រូវការព្រះគម្ពីរ បុគ្គលនោះនឹងបង្ហាញខ្លួននៅចំពេល និងចំកន្លែងសម្រាប់ខ្ញុំធ្វើការចែកចាយព្រះគម្ពីរមរមនដោយសាមញ្ញ និងងាយស្រួល ។ កាលណាខ្ញុំធ្វើកាន់តែច្រើន ខ្ញុំកាន់តែងាយស្រួលចែកចាយផងដែរ ។ ការធ្វើដំណើររបស់ខ្ញុំកាន់តែមានអត្ថន័យសម្រាប់ខ្ញុំ ។ ខ្ញុំតែងតែមានចិត្តរំភើបក្នុងការរកឃើញអ្នកដែលបានទទួលពររបស់ព្រះវរបិតាសួគ៌អំពីទីបន្ទាល់ដ៏ពិសិដ្ឋនៃព្រះគ្រីស្ទនេះ ។
ពេលខ្ញុំធ្វើដំណើរ ខ្ញុំបានជញ្ជឹងគិតថា « តើខ្ញុំគួរទៅកន្លែងណា ដើម្បីស្វែងរកអ្នកដែលព្រះវរបិតាសួគ៌កំពុងបញ្ជូនខ្ញុំទៅនៅពេលនេះ ? តើខ្ញុំអាចនិយាយអ្វីខ្លះទៅគាត់ ដើម្បីបង្ហាញថាព្រះគម្ពីរមរមនមានតម្លៃប៉ុណ្ណាចំពោះខ្ញុំ ? » គំនិត និងសកម្មភាពទាំងឡាយរបស់ខ្ញុំបានក្លាយជាការផ្តោតអារម្មណ៍ខាងក្រៅពីតម្រូវការ និងការកម្សាន្តរបស់ខ្ញុំផ្ទាល់ ហើយខ្ញុំមានអារម្មណ៍ថាមានសេចក្ដីស្រឡាញ់កាន់តែខ្លាំងចំពោះមនុស្សគ្រប់គ្នាដែលខ្ញុំបានជួប ។ ខ្ញុំបានព្យាយាមមើលទៅពួកគេតាមរយៈព្រះនេត្ររបស់ព្រះអង្គសង្គ្រោះ ។ ខ្ញុំបានអធិស្ឋានឲ្យពួកគេទទួលយកអំណោយទានដ៏ទេវភាពដែលព្រះវរបិតាសួគ៌បានបញ្ជូនខ្ញុំទៅផ្តល់ដល់ពួកគេ ។
ខ្ញុំសោកសៅនៅពេលឆ្នាំចុងក្រោយរបស់ខ្ញុំបានចូលដល់ទីបញ្ចប់ ។ ការធ្វើជាអ្នកលើកទឹកចិត្តដល់កីឡាករសម្រាប់សាកលវិទ្យាល័យប៊ី. វាយ. យូរ គឺជាសុបិនយូរមកហើយរបស់ខ្ញុំ ។ ខ្ញុំពិតជារីករាយនឹងបទពិសោធន៍ដ៏អស្ចារ្យនេះដើម្បីអបអរមិនថាមានអ្វីកើតឡើងនោះទេ ប៉ុន្តែឱកាសដើម្បីចែកចាយព្រះគម្ពីរមរមនមួយច្បាប់នៅក្នុងដំណើរទៅអបអរម្តងៗបានធ្វើឲ្យជីវិតខ្ញុំមានភាពស្រស់បំព្រង និងនឹកស្មានមិនដល់ ។
ការចែកចាយព្រះគម្ពីរមរមនគឺជាវិធីដ៏មានតម្លៃ និងងាយស្រួលមួយ ដើម្បីបន្ថែមអត្ថន័យទៅលើបទពិសោធន៍នៅសាកលវិទ្យាល័យរបស់ខ្ញុំ ។ ខ្ញុំដឹងថាមនុស្សដែលខ្ញុំបានចែកចាយព្រះគម្ពីរមរមនត្រូវបានណែនាំជាពិសេសដើម្បីទទួលវា ។ ខ្ញុំក៏ដឹងផងដែរថា នៅក្នុងខ្សែជីវិតដ៏អស្ចារ្យនៃជីវិតរបស់ខ្ញុំ ព្រះវរបិតាសួគ៌បានប្រទានសេចក្ដីមេត្តាករុណាដ៏ជាទីស្រឡាញ់ និងផ្អែមល្ហែមមួយ ៖ ទ្រង់បានអនុញ្ញាតឲ្យខ្ញុំមានអារម្មណ៍នូវសេចក្ដីស្រឡាញ់របស់ទ្រង់ចំពោះបុត្រាបុត្រីរបស់ទ្រង់តាមរបៀបពិសេសរាល់ពេលធ្វើដំណើររបស់ខ្ញុំម្តងៗ ។
បន្ទាប់ពីខ្ញុំបានបញ្ចប់ការសិក្សា ខ្ញុំបានសម្រេចចិត្តបន្តស្វែងរកនរណាម្នាក់ដែលខ្ញុំអាចចែកចាយទីបន្ទាល់របស់ខ្ញុំជាមួយ ។ យូរៗទៅខ្ញុំបានអភិវឌ្ឍសមត្ថភាព និងមានទំនុកចិត្តកាន់តែខ្លាំងពីការចែកចាយទីបន្ទាល់របស់ខ្ញុំ ។ ខ្ញុំឈប់ភ័យខ្លាចក្នុងការចែកចាយវាទៀតហើយ ។ ខ្ញុំជឿថាមនុស្សគ្រប់គ្នាអាចកាន់តែងាយស្រួលក្នុងការចែកចាយទីបន្ទាល់របស់ខ្លួនជាមួយនឹងការអនុវត្ត និងដោយសុំជំនួយពីព្រះ ។
ការជ្រើសរើសធ្វើតាមគំរូរបស់ប៊ីស្សពដ៏ល្អរបស់ខ្ញុំ និងភរិយារបស់គាត់បានធ្វើឲ្យជីវិតខ្ញុំកាន់តែមានអត្ថន័យក្នុងរបៀបជាច្រើន។ វាបានបង្រៀនខ្ញុំឲ្យមើលឃើញថាព្រះអម្ចាស់បានជ្រាបពីបុត្រាបុត្រីរបស់ទ្រង់ម្នាក់ៗ ។ ទ្រង់ស្រឡាញ់យើង ហើយខ្នះខ្នែងប្រមូលយើងទាំងអស់គ្នាឲ្យទៅក្រោមស្លាបរបស់ទ្រង់ ។ ឱ វាជាពរជ័យណាស់ដើម្បីយល់អំពីទិដ្ឋភាពដ៏ស្រស់ស្អាតដែលទ្រង់ប្រើនៅពេលទ្រង់ពិពណ៌នាអំពីការប្រមូលផ្តុំរបស់ទ្រង់ ។ ទ្រង់ប្រមូលផ្តុំយើងដូចជាមេមាន់ក្រុងកូន ហើយការពារកូនរបស់វាដោយទន់ភ្លន់ ។
អ្នកនិពន្ធរស់នៅរដ្ឋយូថាហ៍ ស.រ.អា. ។