« តើខ្ញុំអាចទុកចិត្តលើព្រះវរបិតាសួគ៌ដោយរបៀបណា នៅពេលខ្ញុំមានអារម្មណ៍ថាខ្ញុំកំពុងឈរតែម្នាក់ឯងនោះ ? » លីអាហូណា ខែ កក្កដា ឆ្នាំ ២០២៤ ។
យុវមជ្ឈិមវ័យ
តើខ្ញុំអាចទុកចិត្តលើព្រះវរបិតាសួគ៌ដោយរបៀបណា នៅពេលខ្ញុំមានអារម្មណ៍ថាខ្ញុំ កំពុងឈរតែម្នាក់ឯងនោះ ?
ខ្ញុំបានព្យាយាមមានសេចក្តីជំនឿ ប៉ុន្តែនៅតែបន្តជួបនឹងឧបសគ្គជាច្រើន ។ តើខ្ញុំអាចបន្តទុកចិត្តលើព្រះអម្ចាស់ដោយរបៀបណា ?
រចនារូបភាពដោយ ខេតលីន ភីធើរសុន
បងប្អូនជីដូនមួយរបស់ខ្ញុំបានណែនាំខ្ញុំឲ្យស្គាល់ពួកអ្នកផ្សព្វផ្សាយសាសនា នៅពេលខ្ញុំមានអាយុប្រាំបួនឆ្នាំ ។ ខ្ញុំបានចូលរួមក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ប៉ុន្តែជាសមាជិកតែម្នាក់ឯងគត់នៅក្នុងគ្រួសាររបស់ខ្ញុំដែលបានធ្វើដូច្នេះ ។ ចាប់តាំងពីពេលនោះមក ខ្ញុំបានរៀនស្រឡាញ់ដំណឹងល្អនៃព្រះយេស៊ូវគ្រីស្ទកាន់តែខ្លាំងឡើងៗ ។ ទោះជាយ៉ាងណាក៏ដោយ មានគ្រាមួយការទុកចិត្តទៅលើព្រះវរបិតាសួគ៌ និងសេចក្ដីពិតរបស់ទ្រង់ គឺពិបាកណាស់សម្រាប់ខ្ញុំ ហើយខ្ញុំពិតជាពិបាកណាស់ក្នុងការបន្តឆ្ពោះទៅមុខដោយសេចក្ដីជំនឿ ។
ការរស់នៅខុសពីលោកិយក្នុងនាមជាសិស្សនៃព្រះយេស៊ូវគ្រីស្ទ អាចពិបាកនៅគ្រប់ទីកន្លែង ប៉ុន្តែការធំឡើងនៅទីក្រុងហុងកុងក្នុងនាមជាសមាជិកសាសនាចក្រ គឺពិបាកជាងមនុស្សមួយចំនួនដែលអាចរំពឹងទុក ។
រឿងមួយគឺ សម្រាប់មនុស្សជាច្រើននៅក្នុងតំបន់នេះមិនចូលចិត្តសាសនាចក្រទេ ហើយគិតថាវាជាប់ទាក់ទងនឹងរឿងអាក្រក់ ។ ពាក្យដែលធ្លាប់បានប្រើពីមុន ក្នុងភាសាចិនសម្រាប់ ពាក្យ « មរមន » និយាយសំដៅទៅលើសាសនាចក្រ រួមមានសំឡេងមួយដែលទាក់ទងនឹងពាក្យចិនសម្រាប់ពាក្យ « អារក្ស » ។ សម្រាប់មនុស្សមួយចំនួន ការណ៍នេះបានបង្កើតនូវការយល់ខុសដ៏អកុសលមួយអំពីតម្លៃរបស់សាសនាចក្រ ។
ដោយឡែកដោយសារតែមានសាសនាបុរាណជាច្រើនផ្សេងទៀតដែលបានបង្កើតឡើងរួចហើយ ហើយសមាជិកនៃសាសនាចក្រមានចំនួនតិចតួចនៅក្នុងទីក្រុងហុងកុង វាអាចងាយនឹងមានអារម្មណ៍ឯកោ ឬនៅដាច់ដោយឡែកពីគេផងដែរ ។ មនុស្សជាច្រើនសង្ស័យសាសនាចក្រ មិនយល់ពេញលេញអំពីការបង្រៀនរបស់សាសនាចក្រ និងមិនមានឆន្ទៈចង់ស្តាប់ដើម្បីឮនូវអ្វីដែលសមាជិកចង់ចែកចាយនោះទេ ។
ខ្ញុំមានអារម្មណ៍ពីឥទ្ធិពលនៃឧបសគ្គទាំងនេះបំផុតកាលខ្ញុំមានវ័យជំទង់ ប៉ុន្តែតាមរយៈបទពិសោធន៍ទាំងនោះខ្ញុំបានរៀនច្រើនអំពីអត្ថន័យនៃការទុកចិត្តលើព្រះវរបិតាសួគ៌ និងព្រះយេស៊ូវគ្រីស្ទ ។
តើការរស់នៅតាមដំណឹងល្អមានតម្លៃឬទេ ?
នៅក្នុងវិទ្យាល័យ ឪពុកម្ដាយរបស់ខ្ញុំជាមិត្តភក្តិជាមួយនឹងគ្រូបង្រៀនម្នាក់របស់ខ្ញុំ ។ គ្រូបង្រៀនរូបនេះគឺជាគ្រីស្ទានដែលជឿនៅក្នុងសាសនាមួយផ្សេងទៀត ។ នៅពេលនោះខ្ញុំជាសមាជិកតែម្នាក់គត់នៃសាសនាចក្រនៅក្នុងថ្នាក់របស់ខ្ញុំ ហើយមិត្តរួមថ្នាក់ជាច្រើន និងគ្រូបង្រៀនបានមានការប៉ាន់ស្មានមួយចំនួនរួចហើយអំពីសាសនាចក្រនៃព្រះយេស៊ូវគ្រីស្ទនិងអំពីសមាជិក ។
ជាពិសេស គ្រូបង្រៀនរូបនេះមានមតិអវិជ្ជមានខ្លាំងណាស់អំពីសេចក្តីជំនឿរបស់ខ្ញុំ ដែលធ្វើឲ្យមានរឿងស្មុគស្មាញដោយសារគាត់ជាមិត្តភក្តិរបស់គ្រួសារ ។
មួយវិញទៀត ខ្ញុំតែងតែគេងលក់នៅក្នុងថ្នាក់របស់គាត់ ដោយសារខ្ញុំបានក្រោកពីព្រលឹមដើម្បីទៅរៀនថ្នាក់សិក្ខាសាលានៅព្រឹកព្រលឹម ដែលធ្វើឲ្យគាត់ព្រួយបារម្ភថាខ្ញុំនឹងតាមមិនទាន់ក្នុងការធ្វើកិច្ចការសាលារបស់ខ្ញុំ ។ គាត់ក៏បានសួរដេញជើងខ្ញុំ ហើយបានសាកល្បងខ្ញុំជាមួយនឹងសំណួរគោលលិទ្ធដ៏ស្មុគស្មាញជាច្រើនដែលខ្ញុំមិនចេះឆ្លើយទេ ។ គាត់ថែមទាំងបានឲ្យខ្ញុំនូវកិច្ចការសាលាដើម្បីអានសៀវភៅប្រឆាំងសាសនាចក្រ ! គាត់បានព្យាយាមយ៉ាងខ្លាំងបំផុត ដើម្បីបញ្ចុះបញ្ចូលខ្ញុំឲ្យចាកចេញពីសេចក្ដីជំនឿរបស់ខ្ញុំ ។
នេះគឺជាគ្រាដ៏លំបាកមួយសម្រាប់សេចក្ដីជំនឿរបស់ខ្ញុំ ។ ហេតុអី្វពេលខ្ញុំព្យាយាមនៅជិតព្រះវរបិតាសួគ៌ និងព្រះយេស៊ូវគ្រីស្ទ ដោយនៅស្មោះត្រង់ធ្វើឲ្យមានឧបសគ្គ និងការលំបាកនៅក្នុងជីវិតរបស់ខ្ញុំ ? តើខ្ញុំមិនទទួលបានពរចំពោះការគោរពតាមបទបញ្ញត្តិ និងការលះបង់ការដេកដើម្បីទៅចូលរៀនថ្នាក់សិក្ខាសាលាទេឬអី ?
ផ្ទុយទៅវិញ ពិន្ទុរបស់ខ្ញុំបានធ្លាក់ចុះ សេចក្តីជំនឿរបស់ខ្ញុំបានថយចុះ ហើយទំនាក់ទំនងរបស់ខ្ញុំជាមួយនឹងគ្រូបង្រៀនរបស់ខ្ញុំ គ្រួសាររបស់ខ្ញុំ និងព្រះវរបិតាសួគ៌កំពុងជួបការលំបាក ។
អស់ពេលមួយរយៈ ខ្ញុំបានចាប់ផ្ដើមឆ្ងល់ថាតើការរស់នៅតាមដំណឹងល្អមានតម្លៃឬទេ ។ ខ្ញុំបានចាប់ផ្ដើមឈប់ទៅថ្នាក់សិក្ខាសាលា ហើយមិនយូរប៉ុន្មានខ្ញុំមានអារម្មណ៍ថាសេចក្ដីជំនឿរបស់ខ្ញុំកំពុងថយចុះ ។ វាហាក់ដូចជាងាយស្រួលជាងក្នុងការចុះចាញ់ទៅនឹងអ្វីដែលពិភពលោកនៅជុំវិញខ្លួនរបស់ខ្ញុំកំពុងជំរុញខ្ញុំឲ្យធ្វើ ។
ការជ្រើសរើសដើម្បីទុកចិត្ត
ខ្ញុំបានបន្តអធិស្ឋានទៅព្រះវរបិតាសួគ៌ដើម្បីទទួលបានការណែនាំ និងការយល់ដឹង ។ ទោះបីជាមានការច្របូកច្របល់ និងភាពតានតឹងដ៏ជ្រាលជ្រៅដែលខ្ញុំមានអារម្មណ៍អំពីស្ថានភាពរបស់ខ្ញុំក៏ដោយ មានអ្វីមួយនៅក្នុងចិត្តរបស់ខ្ញុំបានបន្តកាន់ខ្ជាប់ទៅនឹងសេចក្ដីជំនឿ ។ ខ្ញុំបាននិយាយជាមួយមិត្តភក្តិដ៏ស្មោះត្រង់ ហើយបានប្រាប់ការសម្ងាត់ទៅមិត្តភក្តិមកពីព្រះវិហារអំពីអ្វីដែលខ្ញុំកំពុងជួបប្រទះ ហើយខ្ញុំត្រូវបានលើកទឹកចិត្តឲ្យនិយាយជាមួយគ្រូបង្រៀនថ្នាក់សិក្ខាសាលារបស់ខ្ញុំអំពីការលំបាកទាំងឡាយរបស់ខ្ញុំ ។
គាត់បានឆ្លើយតបដោយក្ដីអាណិតអាសូរ និងបានលើកទឹកចិត្តខ្ញុំឲ្យបន្តចូលរួមថ្នាក់សិក្ខាសាលាដោយមានចិត្តសង្ឃឹម ។ គាត់បានសន្យានឹងខ្ញុំថា ខ្ញុំនឹងឃើញពរជ័យនានាលាតត្រដាង ប្រសិនបើខ្ញុំបន្តកាន់ខ្ជាប់ទៅនឹងសេចក្ដីជំនឿ និងការទុកចិត្តថា ព្រះអម្ចាស់មានពរជាច្រើនសម្រាប់ខ្ញុំ ហើយនឹងប្រទានពរដល់ឧបសគ្គរបស់ខ្ញុំ ( សូមមើល នីហ្វៃទី២ ២:១–២ ) ។
ដូច្នេះ ទោះបីជាមានឧបសគ្គដែលខ្ញុំកំពុងប្រឈមមុខក៏ដោយ ក៏ខ្ញុំបានជ្រើសរើសដើម្បីទុកចិត្តដែរ ។
មួយរយៈក្រោយមក ខ្ញុំមានអារម្មណ៍ថាអាកប្បកិរិយារបស់ខ្ញុំផ្លាស់ប្ដូរ ។ ជំនួសឲ្យការផ្តោតទៅលើការលំបាកដែលខ្ញុំកំពុងប្រឈមមុខ នោះខ្ញុំបានផ្តោតលើការដឹងគុណដែលខ្ញុំមានចំពោះដំណឹងល្អវិញ ។ ខ្ញុំចាប់ផ្ដើមផ្ដោតទៅលើពរជ័យរបស់គ្រួសារខ្ញុំ អត្តសញ្ញាណដ៏ទេវភាពរបស់ខ្ញុំ និងសេចក្ដីពិតដ៏អស់កល្បជានិច្ចនៃដំណឹងល្អ ។ ហើយនៅទីបំផុត ខ្ញុំបានដឹងថាព្រះវរបិតាសួគ៌ និងព្រះយេស៊ូវគ្រីស្ទ ទ្រង់បានជ្រាបដឹងពីកាលៈទេសៈរបស់ខ្ញុំ ហើយតែងតែឈរជាមួយនឹងខ្ញុំនៅគ្រានោះ នៅពេលខ្ញុំមានអារម្មណ៍ថាខ្ញុំកំពុងឈរតែម្នាក់ឯង ។
ការណ៍នេះបានផ្លាស់ប្តូរអ្វីៗគ្រប់យ៉ាង ។
ពេលខ្ញុំបន្តទុកចិត្តលើទ្រង់ទាំងទ្វេ ការគោរពតាមបទបញ្ញត្តិ ការប្រែចិត្តជារៀងរាល់ថ្ងៃ ហើយធ្វើកិច្ចការតូចតាចជារៀងរាល់ថ្ងៃដើម្បីតភ្ជាប់ជាមួយនឹងទ្រង់ទាំងទ្វេ នោះខ្ញុំមានអារម្មណ៍ថាគ្រឹះនៃសេចក្ដីជំនឿរបស់ខ្ញុំកាន់តែស៊ីជម្រៅ និងកាន់តែរឹងមាំឡើង ។
ប្រធាន រ័សុល អិម ណិលសុន កាលពីថ្មីៗនេះបានមានប្រសាសន៍ថា ៖ « សូមទទួលខុសត្រូវលើទីបន្ទាល់ផ្ទាល់ខ្លួនរបស់បងប្អូនអំពីព្រះយេស៊ូវគ្រីស្ទ និងដំណឹងល្អរបស់ទ្រង់ ។ សូមខិតខំដើម្បីមានទីបន្ទាល់នោះ ។ សូមចិញ្ចឹមបីបាច់វាដើម្បីឲ្យវាលូតលាស់ ។ សូមពង្រឹងវាដោយសេចក្ដីពិត ។ សូមកុំបំពុលទីបន្ទាល់ដោយទស្សនវិជ្ជាខុសឆ្គងរបស់បុរស និងស្រ្តីដែលមិនជឿឡើយ ។ ពេលបងប្អូនបន្តពង្រឹងទីបន្ទាល់អំពីព្រះយេស៊ូវគ្រីស្ទជាអាទិភាពដ៏ខ្ពស់បំផុតរបស់បងប្អូន នោះសូមចាំមើលអព្ភូតហេតុដែលនឹងកើតមាននៅក្នុងជីវិតរបស់បងប្អូន ។
ហើយនៅពេលខ្ញុំបានធ្វើ មានអព្ភូតហេតុមួយ បាន កើតឡើង ។
ជាអ្វីដែលវាមានន័យចំពោះខ្ញុំគឺ ការទុកចិត្តលើព្រះអម្ចាស់
ក្រោយពីចៀសវាងនូវការសន្ទនាណាមួយអំពីសេចក្តីជំនឿជាមួយនឹងគ្រូបង្រៀនរបស់ខ្ញុំអស់មួយរយៈពេលមក មានថ្ងៃមួយនៅពេលគាត់បានមកជួបខ្ញុំជាមួយនឹងសំណួរ ខ្ញុំមានអារម្មណ៍ថាបានត្រៀមខ្លួនជាស្រេចដើម្បីឆ្លើយសំណួរទាំងនោះដោយសេចក្ដីជំនឿថ្មីរបស់ខ្ញុំ ។ ខ្ញុំបានសួរគាត់ដោយរាបសាថា តើគាត់ធ្លាប់ទៅការប្រជុំមួយក្នុងចំណោមការប្រជុំសាសនាចក្ររបស់យើង ឬអានព្រះគម្ពីរមរមនណាមួយទេ ។ នៅពេលគាត់និយាយថាទេ ខ្ញុំមានអារម្មណ៍ថាបានបំផុសគំនិតឲ្យថ្លែងទីបន្ទាល់របស់ខ្ញុំអំពីសេចក្ដីពិតដ៏សាមញ្ញ ។
ខ្ញុំបានប្រាប់គាត់ថាអ្នកគ្រូមិនអាចដឹងថាអ្វីមួយពិតបានទេ បើមិនដកពិសោធន៍ ឬស្វែងរកចម្លើយដោយខ្លួនឯងនោះ ។ ខ្ញុំបានពន្យល់ថាខ្ញុំបានដឹងថាដំណឹងល្អគឺពិត ពីព្រោះខ្ញុំបានខិតខំស្វែងរកចម្លើយទាំងនោះ ហើយមានអារម្មណ៍ថាវាគឺពិត ។ ខ្ញុំបានអញ្ជើញគាត់ឲ្យធ្វើដូចគ្នា ហើយចាប់តាំងពីពេលនោះមក ទំនាក់ទំនងរបស់យើងមានភាពសុខសាន្តកាន់តែខ្លាំងឡើង ។
ការលំបាកនៃសេចក្តីជំនឿដែលខ្ញុំមានកាលពីនៅវ័យជំទង់នេះ ពិតជាបានរៀបចំខ្ញុំសម្រាប់អនាគតរបស់ខ្ញុំក្នុងនាមជាសិស្សនៃព្រះគ្រីស្ទ ។ ខ្ញុំបានឃើញពរជ័យ និងការសន្យាជាច្រើនបានកើតមាននៅពេលខ្ញុំបានបន្តទុកចិត្តលើព្រះអម្ចាស់លើសពីមតិយោបល់របស់មនុស្សណាៗទាំងអស់ ។ ដូចនីហ្វៃបានមានប្រសាសន៍ថា « ឱ ព្រះអម្ចាស់អើយ ទូលបង្គំបានទុកចិត្តទៅលើព្រះអង្គ ហើយទូលបង្គំនឹងទុកចិត្តទៅលើព្រះអង្គជារៀងដរាប ។ ទូលបង្គំនឹងមិនដាក់ទីទុកចិត្តរបស់ទូលបង្គំទៅលើដៃនៃមនុស្សឡើយ » ( នីហ្វៃទី២ ៤:៣៤ ) ។
នៅពេលអ្វីៗមិនដំណើរការដូចដែលបានគ្រោងទុក ឬយើងកំពុងប្រឈមមុខនឹងការលំបាកដែលយើងមិនដែលរំពឹងទុក នោះវាអាចងាយស្រួលក្នុងការមានអារម្មណ៍ថាព្រះវរបិតាសួគ៌បានដឹកនាំយើងខុស បោះបង់យើងចោល ឬមិនខ្វល់ខ្វាយ ។
ប៉ុន្ដែនោះពុំមែនជារឿងពិតទេ ។
តាមពិត វាតែងតែស្ថិតនៅក្នុងគ្រានៃការច្របូកច្របល់ និងឧបសគ្គដ៏ឈឺចាប់ទាំងនោះដែលខ្ញុំត្រូវបានរំឭកអំពីអត្ថន័យនៃការទុកចិត្តរបស់ខ្ញុំយ៉ាងពេញលេញទៅលើព្រះអម្ចាស់ ។ ខ្ញុំត្រូវតែអនុញ្ញាតឲ្យភាពជាសិស្សរបស់ខ្ញុំ និងសេចក្តីជំនឿរបស់ខ្ញុំក្លាយជាការផ្លាស់ប្ដូរជីវិតដ៏មានអត្ថន័យជំនួសឲ្យការធ្វើអ្វីដោយមិនគិត និងតាមទម្លាប់ ។ ប្រធាន ណិលសុន ក៏បានបង្រៀនផងដែរថា « សេចក្ដីជំនឿដ៏ លូតលាស់ របស់បងប្អូននឹងជួយបងប្អូនឲ្យបង្វែរឧបសគ្គទៅជាការរីកចម្រើន និងឱកាសដ៏មិនអាចប្រៀបផ្ទឹមបានវិញ » ។
ខ្ញុំអាចឃើញពីរបៀបនៃការជ្រើសរើសសេចក្តីជំនឿនៅលើព្រះយេស៊ូវគ្រីស្ទបានប្រទានពរដល់ខ្ញុំ តាមរបៀបច្រើនជាងអ្វីដែលខ្ញុំធ្លាប់គិតទៅទៀត ។ នេះមិនមែនមានន័យថា ខ្ញុំតែងតែគេចវេះពីទុក្ខសោក ការលំបាក ឬការច្របូកច្របល់នោះទេ ប៉ុន្តែវាមានន័យថា ខ្ញុំដឹងពីកន្លែងដែលត្រូវងាកទៅរកសម្រាប់ភាពសុខសាន្ត និងស្ថិរភាព ។
ប្រធាន ណិលសុន បានរំឭកយើងដោយក្ដីស្រឡាញ់ថា « សូមចាំការណ៍នេះ ៖ បើអ្វីគ្រប់យ៉ាង ហើយមនុស្សគ្រប់គ្នាក្នុងពិភពលោកនេះដែលបងប្អូនទុកចិត្ត ធ្វើឲ្យបងប្អូនខកចិត្ត នោះព្រះយេស៊ូវគ្រីស្ទ និងសាសនាចក្ររបស់ទ្រង់នឹង មិនដែល ធ្វើឲ្យបងប្អូនខកចិត្តឡើយ » ។
មិនថាបងប្អូនកំពុងប្រឈមមុខទៅនឹងអ្វីនៅក្នុងជីវិតរបស់បងប្អូននោះទេ មិនថាវាជាការរំពឹងទុកដែលមិនបានបំពេញ សម្ពាធមកពីសំឡេងនៃលោកិយ បញ្ហាគ្រួសារ ការតស៊ូនឹងសុខភាពផ្លូវចិត្ត ការមិនមានស្ថេរភាពខាងហិរញ្ញវត្ថុ ការខូចចិត្ត ភាពអយុត្តិធម៌ ឬឧបសគ្គផ្សេងៗទៀតនោះទេ ខ្ញុំសូមអញ្ជើញបងប្អូនឲ្យបន្តដាក់ការទុកចិត្តរបស់បងប្អូនទៅលើព្រះអម្ចាស់ ។ ទ្រង់ដឹងយ៉ាងច្បាស់ពីកាលៈទេសៈរបស់បងប្អូន ។ ទ្រង់ស្គាល់បងប្អូន ។ ទ្រង់មានពរជ័យដ៏អស្ចារ្យរក្សាទុកសម្រាប់បងប្អូន ។ សូម្បីតែនៅក្នុងគ្រាទាំងនោះ នៅពេលដែលបងប្អូនមិនចង់ទុកចិត្តលើទ្រង់ក៏ដោយ សូមនៅតែជ្រើសរើសធ្វើការទុកចិត្តលើទ្រង់ ។ ការសន្យាទាំងឡាយរបស់ទ្រង់គឺពិត ។ ទ្រង់នឹងនាំបងប្អូនឲ្យមានអំណរ ក្តីសង្ឃឹម និងអព្ភូតហេតុនៅពេលកំណត់ ។
ទ្រង់ធ្វើសម្រាប់ខ្ញុំនៅពេលខ្ញុំបន្តទុកចិត្តលើទ្រង់ ។