តើបងប្អូននឹងបោះបង់ចោលអ្វីខ្លះដើម្បីស្គាល់ព្រះ ?

ខែ កក្កដា ឆ្នាំ ២០២៤

« តើបងប្អូននឹងបោះបង់ចោលអ្វីខ្លះដើម្បីស្គាល់ព្រះ ? » លីអាហូណា ខែ កក្កដា ឆ្នាំ ២០២៤ ។

ចូរមកតាមខ្ញុំ

តើបងប្អូននឹង បោះបង់ចោលអ្វីខ្លះដើម្បីស្គាល់ព្រះ ?

រូបភាព

បុរសម្នាក់កំពុងដើរនៅលើឆ្នេរសមុទ្រ

ការរស់នៅតាមដំណឹងល្អតែងតែតម្រូវឲ្យមានការលះបង់ ។ ព្រះវរបិតាសួគ៌បង្គាប់ឲ្យយើងបោះបង់ចោលទំនោរធម្មជាតិរបស់យើង ដើម្បីទទួលបានអ្វីមួយឲ្យបានច្រើនជាងនេះ ៖ ចំណេះដឹងអំពីព្រះ និងពរជ័យដែលមិនអាចប្រៀបផ្ទឹមបានដែលទ្រង់ប្រទានឲ្យ ។

បិតារបស់ស្ដេចឡាម៉ូណៃ បានបង្ហាញពីឆន្ទៈនៃការលះបង់នេះពេលដែលទ្រង់បានអធិស្ឋានថា « បើសិនជាមានព្រះមួយអង្គមែន ហើយបើសិនជាទ្រង់ជាព្រះ សូមទ្រង់ធ្វើឲ្យទូលបង្គំស្គាល់ផង ហើយ ទូលបង្គំនឹងបោះបង់ចោលអស់ទាំងអំពើបាបរបស់ទូលបង្គំដើម្បីឲ្យបានស្គាល់ទ្រង់ ហើយដើម្បីទូលបង្គំអាចបានប្រោសឡើងពីស្លាប់ ហើយបានសង្គ្រោះនៅថ្ងៃចុងក្រោយបង្អស់ » ( អាលម៉ា ២២:១៨; បានបន្ថែមការគូសបញ្ជាក់ ) ។

ប្រធាន រ័សុល អិម ណិលសុន បានបង្រៀនថា ការយកឈ្នះលើពិភពលោក និងការរីកចម្រើនកាន់តែជិតទៅនឹងព្រះវរបិតាសួគ៌ និងព្រះយេស៊ូវគ្រីស្ទរួមមាន « ការជ្រើសរើសមិនធ្វើអ្វីដែលបណ្ដេញព្រះវិញ្ញាណបរិសុទ្ធ » និង ‹ ស្ម័គ្រចិត្តដើម្បី បោះបង់ចោល › អំពើបាបដែលយើងចូលចិត្ត » ។

សំណួរត្រិះរិះ

អំពើបាបដែលយើងចូលចិត្តអាចពិបាកស្គាល់ ពីព្រោះយើងតែងតែផ្តល់ហេតុផលឲ្យវា ឬអនុញ្ញាតឲ្យវាក្លាយទៅជាទម្លាប់ ។ សូមពិចារណាយកពេលវេលាខ្លះដើម្បីជញ្ជឹងគិតពីអំពើបាបដែល « ចូលចិត្ត » ដែលកំពុងរារាំងបងប្អូនពីការខិតទៅជិតព្រះវរបិតាសួគ៌ និងព្រះយេស៊ូវគ្រីស្ទ ។

តើអ្វីខ្លះទៅជាបាបដែលខ្ញុំចូលចិត្ត ?
តើខ្ញុំអាចចាត់វិធានការអ្វីខ្លះដើម្បីយកឈ្នះអំពើបាបទាំងនេះបាន ?
តើខ្ញុំប្រឈមមុខនឹងឧបសគ្គអ្វីខ្លះនៅក្នុងការខិតខំរបស់ខ្ញុំ ?
តើការលះបង់អំពើបាបទាំងនេះអាចជួយខ្ញុំនៅក្នុងចំណុចណាខ្លះដែលខ្ញុំកំពុងពុះពារដោយរបៀបណា ?

ការប្រសិទ្ធពរ

បន្ថែមពីលើពរជ័យដែលបិតារបស់ស្តេចឡាម៉ូណៃបានស្វះស្វែងរកដែលមានជាអាទិ័ ការរស់ឡើងវិញ និងសេចក្ដីសង្គ្រោះនោះ ប្រធាន ណិលសុន បានរាយបញ្ជីពរជ័យបន្ថែមទៀតដែលបានមកពីការខិតខំរបស់យើង ដើម្បីក្លាយកាន់តែដូចជាព្រះយេស៊ូវគ្រីស្ទ ហើយបន្តនៅលើផ្លូវនៃសេចក្ដីសញ្ញា ។ ទាំងនេះរួមមាន ៖

ការផ្លាស់ប្តូរដួងចិត្ត និងនិស្ស័យធម្មជាតិ
សេចក្ដីសប្បុរស
សេចក្តីបន្ទាបខ្លួន
សប្បុរសធម៌
សេចក្តីសប្បុរស
ការលត់ដំខ្លួនឯង
ភាពសុខសាន្ដ
ទំនុកចិត្ត
សេចក្តីអំណរ
សេចក្តីសម្រាក
កម្លាំងខាងវិញ្ញាណ
វិវរណៈផ្ទាល់ខ្លួន
ការបង្កើនសេចក្តីជំនឿ
ការបម្រើនៃពួកទេវតា
អព្ភូតហេតុ

ប្រសិនបើបងប្អូនមានការលំបាកក្នុងការលះបង់អំពើបាបណាមួយ សូមកុំបោះបង់ឡើយ ។ ប្រធាន ណិលសុន រំឭកយើងថា « ការឈ្នះលោកិយវាពុំមែនមានន័យថា ការប្រែជាល្អឥតខ្ចោះនៅក្នុងជីវិតនេះ ឬថា បញ្ហារបស់បងប្អូនត្រូវរលាយបាត់អស់នោះទេ—ព្រោះវានឹងមិនរលាយបាត់ទៅទេ ។ ហើយវាក៏ ពុំមែន មានន័យថាបងប្អូនលែងធ្វើខុសទៀតនោះដែរ ។ ប៉ុន្តែការឈ្នះលោកិយមានន័យថា ការទប់ទល់នឹងអំពើបាបរបស់បងប្អូននឹងមានខ្លាំងឡើង » ។

នៅពេលយើងខិតខំលះបង់អំពើបាបរបស់យើងដូចជាបិតារបស់ស្ដេចឡាម៉ូណៃ នោះយើងនឹងរកឃើញថាការស្គាល់ព្រះគឺពិតជាស័ក្តិសមនឹងការលះបង់ជានិច្ច ។ ការធ្វើបែបនេះ នោះជីវិតរបស់យើងម្នាក់ៗនឹងក្លាយជាអ្វីដែលអស្ចារ្យជាងអ្វីដែលយើងអាចធ្វើសម្រាប់ខ្លួនរបស់យើងទៅទៀត ។