Te itoito nō te fa’a’ite i te mea tā’u e fa’ahiahia hau roa a’e

Nā Tannie M. Flammer

Ma te pe’era’a i te hi’ora’a o tō’u ’episekōpo ’e tāna vahine fa’aipoipo, ’ua ha’amau vau ’ei fā e hōro’a i te hō’ē Buka a Moromona i tō’u mau terera’a ato’a ’ei pupu fa’a’ana’anataera’a.

I tō’u pa’arira’a mai, e mea au roa nā’u e māta’ita’i mea nāhea te mau moa ufa a māmā ’ū i te ha’aputuputu i tā rātou mau fanau’a moa i raro a’e i tō rātou pererau, i te mau tau vero nō te pāruru ia rātou. ’Ua riro mai teie hōho’a ’ei mea faufa’a roa nō’u i muri a’e i te tai’ora’a i te tahi mea nō teie tumu parau i roto i te Buka a Moromona (hi’o 3 Nephi 10:4–6). ’Ei feiā ’āpī pa’ari, ’ua parau mai tō’u ’episekōpo ’e tāna vahine e rātere pinepine nei nō tā rāua ’ohipa ’imira’a faufa’a iā’u ē, tē hōro’a nei rāua i te hō’ē Buka a Moromona i te hō’ē ta’ata i te mau terera’a ato’a ’o tā rāua e haere nei.

’Ua fa’auru te reira iā’u. ’Ua fa’ahiahia roa vau ia rāua, ’e ’ua ha’aputapū roa tā rāua mau hi’ora’a i tō’u ’ā’au. ’Ua fa’aoti a’era vau ē, mai te mea e fāna’o ato’a vau i te rātere i rāpae’au ia Utaha, Marite, e pe’e au i tō rāua hi’ora’a ’e e hōro’a vau i te hō’ē Buka a Moromona i te mau taime ato’a.

’Ei tamāhine fa’a’ana’anatae nō te fare ha’api’ira’a teitei Brigham Young, e rātere pinepine au ’e te pupu fa’a’ana’anatae. Hou tō’u tere mātāmua, ’ua ho’o mai au i te hō’ē Buka a Moromona ’e ’ua pāpa’i au i tō’u ’itera’a pāpū i roto. ’Ua hina’aro vau e fa’ananea i te itoito nō te fa’a’ite ia vetahi ’ē i te mea tā’u e ha’afaufa’a rahi roa nei : tō’u ’itera’a pāpū ’e te Buka a Moromona. ’Ua hina’aro vau ’ia riro mai tō’u ’episekōpo ’e tāna vahine. ’Ua hina’aro vau ’ia riro mai ia Iesu Mesia te huru. ’Ua hina’aro vau e tauturu i te ha’aputuputura’a ia vetahi ’ē ’e e tauturu ia rātou ’ia haere mai iāna ra.

’Ua ha’api’i ’oi’oi mai au ē, mai te peu e pure au hou te mau terera’a tāta’itahi ’ia arata’ihia vau i te ta’ata ’o te hina’aro mau i te reira, e tae mai te ta’ata i te taime tano ’e i te vāhi tano ’ia tupu ’ōhie noa ’e te au maita’i te hōro’ara’a o te Buka a Moromona. ’A rahi noa ai au i te fa’a’ohipara’a, ’ōhie noa ato’a tō’u hōro’ara’a atu. ’Ua riro tō’u mau terera’a ’ei mea faufa’a roa nō’u. E ’oa’oa noa vau ’ia ’ite mai i te ta’ata e ha’amaita’ihia e te Metua i te ao ra o teie parau faufa’a mo’a a te Mesia.

’Ia rātere ana’e au, e uiui au iā’u iho, « i hea vau e haere ai nō te ’ite mai i te ta’ata tā te Metua i te ao ra e tono mai iā’u ra i teie taime ? E aha tā’u e nehenehe e parau atu iāna nō te fa’a’ite ē, e mea faufa’a rahi mau te Buka a Moromona nō’u ? » E rōtahi tō’u mau mana’o ’e tā’u mau ’ohipa i rāpae’au i tō’u iho mau hina’aro ’e mau fa’a’oa’oara’a, ’e e putapū vau i te here rahi nō te feiā ato’a ’o tā’u e fārerei atu. ’Ua tāmata vau i te hi’o ia rātou nā roto i te mata o te Fa’aora. ’Ua pure au ’ia fāri’i rātou i te hōro’a hanahana ’o tā te Metua i te ao ra i tono mai iā’u ra, nō te pūpū atu ia rātou.

’Ua ’oto roa vau i te hopera’a o tā’u matahiti hōpe’a. Te rirora’a ’ei tamāhine fa’a’ana’anatae nō BYU, ’ua riro ’ei moemoeara’a nō te hō’ē orara’a tā’āto’a nō’u. ’Ua au roa vau i teie ’itera’a fa’ahiahia mau o te fa’aitoitora’a noa atu te mau mea e tupu mai, te rāve’a rā nō te hōro’ara’a i te Buka a Moromona i te mau tere ato’a o te pupu fa’a’ana’anataera’a, ’ua ha’afaufa’a ïa i tō’u orara’a ma te rāve’a au maita’i ’e te mana’o-’ore-hia.

’Ua riro te hōro’ara’a i te Buka a Moromona ’ei rāve’a faufa’a mau ’e te ’ōhie nō te ’āmui mai i te hō’ē fāitotia hau atu i tō’u ’itera’a i te fare ha’api’ira’a teitei. ’Ua ’ite au ē, te mau ta’ata ’o tā’u i hōro’a atu i te Buka a Moromona, ’ua arata’i-ta’a-’ē-hia rātou nō te fāri’i i te reira. ’Ua ’ite ato’a vau ē, i roto i te vauvau fa’ahiahia o tō’u orara’a, ’ua nira te Metua i te ao ra i te aroha marū o te here ’e te au maita’i : ’ua fa’ati’a ’oia iā’u ’ia putapū i tōna here nō tāna mau tamari’i ma te rāve’a ta’a ’ē i te mau tere tāta’itahi tā’u i rave.

I muri a’e i te roa’ara’a tā’u parau tū’ite, ’ua fa’aoti au e tāmau noa i te ’imi i te hō’ē ta’ata ’o tā’u e fa’a’ite atu i tō’u ’itera’a pāpū. I te roara’a o te tau, ’ua fa’ananea rahi au i te ’aravihi ’e i te ’ōhie nō te fa’a’ite i tō’u ’itera’a pāpū. ’Ua ha’api’i mai au ’eiaha e mata’u fa’ahou i te fa’a’ite i te reira. Tē ti’aturi nei au ē, e nehenehe te ta’ata tāta’itahi e fa’a’ite ’ōhie noa i tōna ’itera’a pāpū ma te fa’a’ohipa-tāmau-ra’a ’e te anira’a i te tauturu a te Atua.

Te mā’itira’a ’ia pe’e i te hi’ora’a o tō’u ’episekōpo maita’i ’e tāna vahine, ’ua hōro’a mai i te i te fa’arirora’a i tō’u orara’a ’ei orara’a tei ’ī i te aura’a nā roto e rave rahi rāve’a. ’Ua ha’api’i te reira iā’u ’ia hi’o ē, ’ua ’ite maita’i te Fatu i tāna mau tamari’i tāta’itahi. ’Ua here ’oia ia tātou ’e tē hina’aro nei e ha’aputuputu ia tātou pā’āto’a i raro a’e i tōna pererau. ’Auē ïa ha’amaita’ira’a ’ia māramarama i te mau hōho’a nehenehe ’o tāna e fa’a’ohipa nei, ’ia fa’ata’a ana’e ’oia i tāna ha’aputuputura’a. E ha’aputuputu ’oia ia tātou mai te hō’ē moa ufa e ha’aputuputu ’e e pāruru marū noa i tāna mau fanau’a moa.

Tē ora nei te ta’ata pāpa’i i Utaha, Marite.