« Tō ’oe tino : Te ’Atu’atura’a i taua hōro’a hanahana ra », Liahona, Tiurai 2024.
Tō ’oe tino : Te ’atu’atura’a i taua hōro’a hanahana ra
E mau hōro’a tō tātou tino nō ō mai i te Atua ra ’e e mau hiero nō tō tātou vaerua, e tītauhia rā te ha’avīra’a ia tātou iho ’e te ha’avīra’a nō te fa’a’amu ’e nō te aupuru maita’i i te reira.
E mea ’ōhie ’ia ha’apa’o maita’i i tō tātou ea nō tātou iho—’oia ïa, ē tae roa atu i nā 10 vaiharo i te mahana, te orara’a noho noa ’e te maha-’ore-ra’a te taoto i te tupu mai i ni’a ia tātou. ’Aore rā penei a’e noa atu te mā’itira’a maita’i ’o tā tātou i rave, ’ua hōro’a mai te tenoma i te hō’ē ’ohipa mana’o-’ore-hia ’e ’ua tau mai te mau fifi i te pae nō te ea.
’Ua fāri’i tātou pā’āto’a te mau fāito ta’a ’ē o te ea pae tino ’o tā tātou e ’ore roa e ti’a e fa’atere. Mea pāpū rā te hō’ē ’ohipa : Tē ani mai nei te fa’anahora’a a te Atua ia tātou ’ia ha’amaita’i atu ā i te mea tei hōro’ahia mai ia tātou. E tītau te reira i te hō’ē ā ha’avīra’a ’e te hō’ē ā ha’amo’ara’a o tā tātou e hina’aro nō te fa’a’amu i tō tātou ea pae vārua. Tōna aura’a, e ha’api’i mai i tō tātou huru ta’ata nei e pārahi noa ’āhani i te horora’a, e ’amu noa i te mau mā’a monamona ’āhani i te mau pota, ’e e ara noa i te maorora’a pō ’āhani i te ta’otora’a.
’A ’imi ai tātou i te fa’aurura’a nō te ha’amaita’i i tō tātou ea i te pae tino ’e i te fa’ananeara’a i te ha’avīra’a ia tātou e ti’a ai nō te tāpe’a i te reira, e ’ite mai tātou i te ’aravihi rahi a’e nō te tāvini i te Atua ’e nō te ’ite mai i te ’oa’oa.
E hiero tō ’oe tino
E ruperupe te mau vaerua ’ia ’atu’atu-maita’i-ana’e-hia te vārua ’e te tino. « ’E te vārua ’e te tino ra ’o te vaerua tā’āto’a ïa o te ta’ata nei » (Te Ha’api’ira’a Tumu ’e te mau Fafaura’a 88:15). Te ’āparaura’a i ni’a i teie ’īrava, ’ua ha’api’i te peresideni Russell M. Nelson ē te tino ’e te vārua, « e mea faufa’a rahi roa ïa. ’Ua riro tō ’outou tino tāhuti ’ei hāmanira’a hāviti na te Atua. ’O tōna ïa hiero ’e tō ’outou ato’a ’e e ti’a ’ia ravehia ma te fa’atura ».
I te 99ra’a o tōna matahiti, tē tāmau noa nei te peresideni Nelson i te rave i tāna mau hōpoi’a ’ei peresideni nō te ’Ēkālesia, ma te fa’a’itera’a ē, i te tahi taime e fa’a’ohipa ’oia i te hō’ē ’āturu huma [deambulateur] nō te fa’a’aifāito iāna ’e i teienei mea au a’e nāna ’ia hōro’a i tāna mau a’ora’a i te ’āmuira’a rahi ma te pārahira’a. « I te tahi taime e fifi au i te fa’a’aifāro iā’u », ’ua pāpa’i ’oia i ni’a i tāna ’api ha’apararera’a tōtiare i te ’āva’e Mē 2023 ra. « Tē mana’o nei au ē, ’eiaha vau e māere i te taime e hiti mai ai te tahi mau fifi na’ina’i, ’a fātata ai au i te piri atu i te tenetere. Ma te māuruuru rahi, e mea maita’i tō’u māfatu, mea pūai tō’u vārua mai tō’u nā ’āvae ato’a, ’e tē tāmau noa nei tō’u roro i te ’ohipara’a ».
’Ua ’itehia te peresideni Nelson nō tōna ’ohipara’a i te ea maita’i ’e tōna huru orara’a itoito. E ta’ata pārarai noa ā ’oia, ’ua ’ohipa itoito ’oia nō te fa’aea noa mai te reira. E fa’a’eta’eta pinepine noa ’oia iāna, mea au a’e nāna i rāpae’au. Tae roa i te 90ra’a o tōna matahiti, ’ua ope ’oia i te hiona i ni’a i tōna iho pareara ’e tō te mau ta’ata nā pīha’i iho, ’ua fa’aho’i i te fa’ari’i pehu i roto i te fare vaira’a pereo’o, ’e ’ua rave i te ’ohipa i roto i tōna ’āua. Tae roa mai i te rirora’a ’oia ’ei Peresideni nō te ’Ēkālesia, e fa’ahe’e pinepine ’oia nā ni’a te hiona, mai te mea e fa’ati’a tāna tārena ’ohipa iāna.
Fa’ananeara’a i te ha’avīra’a iāna iho
’Ua ’ite tātou i te mau ta’ahira’a nō te hō’ē ea maita’i o te pae tino :
-
Te fa’a’eta’etara’a tāmau i te tino.
-
’Ia rāva’i maita’i te ta’oto.
-
’Amura’a i te mā’a tano maita’i.
-
Tāpe’ara’a i te hō’ē fāito teiaha tano noa.
-
Fa’aterera’a i te urupu’upu’u [stress]
Te piri ’oia ho’i te ’āfa’ira’a mai i tō tātou tino ’ia rave i te mea tā tō tātou vaerua i ’ite e ti’a ’ia ravehia. ’Ia au i te peresideni Nelson, hō’ē o te mau tāmatara’a o te tāhuti nei ’o te ha’avīra’a ïa i te mau hia’ai o tō tātou tino nā roto i te vārua e pārahira’a i roto :
« ’Ua ’ite Sātane i te mana o tō tātou mau hia’ai. Nō reira, e fa’ahema ’oia ia tātou ’ia ’amu i te mau mea e’ita e ti’a ia tātou ’ia ’amu, ’ia inu i te mau mea e’ita e ti’a ia tātou ’ia inu. …
« ’Ia ’ite mau ana’e tātou i tō tātou nātura atuara’a, e hina’aro tātou e ha’avī i te reira mau hia’ai. … I roto i te pure i te mau mahana ato’a, e ’ite tātou ma te māuruuru i [te Atua] tei Hāmani ia tātou ’e te ha’amāuruurura’a iāna nō te hanahana o tō tātou iho hiero pae tino. E ’atu’atu maita’i tātou i te reira ’e e poihere i te reira mai tā tātou iho hōro’a nō ’ō mai i te Atua ra. »
Te fa’a’amura’a i te ’ā’au māuruuru ’e te ’itera’a mai i te ’oa’oa i roto i te tino ’o tā te Atua i hōro’a mai nō tātou
I te 27ra’a o tō’u matahiti ’e ’ei metua vahine nō e toru tāmari’i, ’ua ’itehia i roto iā’u te ma’i rūmati pū’oira’a ivi, e ma’i fifi ’o te ha’amou i te mau pū’oira’a ivi i roto i te tau. ’Ua riro mai tō’u orara’a ’ei ha’avī-’ore-ra’a i te pae tino ’e i te pae nō te ferurira’a. ’Ua fāriu atu vau i ni’a i te Atua ’ia tauturu mai ’oia iā’u ’ia ’ite fa’ahou mai te ’āfarora’a i te pae ferurira’a ’e te ea maita’i ’o tō’u i mana’o na e vai noa mai.
’Ua tītau vau i te tauturu a te hō’ē tahu’a manava nō tō’u mana’o hepohepo. ’Ua ’ohipa vau ’e te hō’ē taote rūmati nō ni’a i te mau rā’au e rave ’e ’ua fa’a’ohipa ato’a vau i te mau rāve’a au. ’Aita roa vau i fa’aea i te tūtava. I muri a’e e rave rahi matahiti ’e te ahoaho rahi, ’ua maita’i mai tō’u ea i te pae tino ’e i te pae ferurira’a.
Tē ha’amana’o ra vau i te hō’ē ’avatea i te hāhaerera’a nā mua i hō’ē ’ē’a tei ’ī i te tiare ’ōviri e tae roa i te hō’ē roto pape mou’a. Ma te roimata e tahe ra i ni’a i tō’u hōho’a mata, ’ua ha’amāuruuru vau i te Atua nō te ha’amaita’ira’a i tō’u nei tino tāhuti ’e tō’u ’aravihi ’ia rave i te hō’ē ’ohipa ’o tā’u i mana’o ’ua mo’e nō’u nei. ’Aita e rā’au nō tō’u ma’i, ’e e ’ite-mata-hia te mau fifi i ni’a i tō’u tino. ’Ua riro rā te hāhaerera’a nā ni’a i te mou’a ’e te fa’a’eta’etara’a pae tino ’ei ’ohipa au-roa-hia e au, ’e ’aita roa atu vau e rave nei i tō’u ea mai te hō’ē ’ohipa vai tāmau.
Noa atu tō’u mau tā’ōti’ara’a pae tino, ’aita i maoro a’enei, ’ua tāvini au i te hō’ē misiōni feiā pa’ari ’e tā’u tāne fa’aipoipo i Washington, Marite (e ’ohipa nā ni’a i te mou’a mecca !). Tē māuruuru nei au i te tāvinira’a i tō’u orara’a tā’āto’a, fa’atata i roto i te mau pi’ira’a ato’a o te ’Ēkālesia e vai ra.
Mai tā te peresideni Nelson i parau : « ’Ia māuruuru tāmau noa tātou nō te ha’amaita’ira’a fa’ahiahia o te hō’ē tino tāhuti nehenehe, te hāmanira’a hope roa a tō tātou Metua here i te ao ra. Noa atu te rahi o tō tātou tino, e ’ere ïa i te hope’ara’a i roto iāna iho. E tuha’a faufa’a rahi roa te reira nō te fa’anahora’a rahi ’oa’oa a te Atua nō tō tātou haere’a mure ’ore i mua ».