« ’Ua fa’a’ite mai te Atua iā’u e ’ōpuara’a tā’u », Liahona, Tiurai 2024.
Mau hōho’a nō te faʼaroʼo
’Ua fa’a’ite mai te Atua iā’u e ’ōpuara’a tā’u
’Ua topa mai au nā ni’a mai i te hō’ē tumu ha’ari, ’ua fa’aora rā te Fatu iā’u ’ia ti’a iā’u ’ia taui i tō’u orara’a ’e e tauturu i te feiā huma mai iā’u nei.
Mau hōho’a nā Christine Hair
Tē haere rā vau i te hō’ē ’āmuira’a fa’aro’o ’e tō’u tuahine, ’a ani mai ai ’oia iā’u e ta’uma i ni’a i te tumu ha’ari ’e ’ia tāpū mai i te hō’ē pe’etā ha’ari nō te ’āmuira’a. ’A pōfa’i noa ai au i te mau ha’ari i ni’a i te tumu ha’ari, ’ua matapōuri-tā’ue-hia vau ’e ’ua topa mai. ’Ua topa mai au i ni’a i tō’u tua ’e ’aita e nehenehe fa’ahou iā’u e ha’uti i tō’u nā ’āvae.
’Ua ’āfa’ihia vau i te fare ma’i, i reira ’ua fa’a’eta’eta te mau taote i te mau ivi o tō’u tua. E toru ’āva’e tō’u tāravara’a i ni’a i tō’u tua i te fare ma’i, e’ita roa e nehenehe e pārahi. ’Ua riro ’ei taime ’oto ’e te ’aravīra’a. E fa’aea tārava noa vau i reira ’e ma te uiui e aha te ’ohipa e tupu mai i ni’a iā’u, ’e e aha tā’u e rave i muri iho.
Parau a’o ’e te Fatu
I muri a’e i nā ’āva’e e toru, ’ua parauhia mai iā’u e haere i Niu Terani nō te tāpū i tō’u tua. E nehenehe te tāpūra’a e fa’apārahi iā’u ’eiaha rā vau ’ia tārava noa. ’A fa’aea ai au i te fare ma’i nō Niu Terani, ’ua fārerei au i te hō’ē tamāhine e ’ohipa rā i reira. ’Ua ui mai ’oia iā’u ē, « ’ua mātau ānei au ia ’oe ? E au ra ’ua ’ite nā vau ia ’oe ».
’Ua ha’amata māua i te paraparau. ’Ua fa’a’ite mai ’oia i te ’evanelia a Iesu Mesia ’e ’ua hōro’a mai i te hō’ē Buka a Moromona nā’u. I te taime mātāmua, ’aita vau i tai’o i te reira. ’Ua vaiiho maita’i au i te reira i pīha’i iho i tō’u ro’i. I te hō’ē rā mahana, ’o vau ana’e ’e ’aita hō’ē a’e ’ohipa ’ana’anatae e māta’ita’i i te ’āfata teata. I muri iho ’ua ’ite atu vau i te Buka a Moromona i ni’a i tā’u ’aira’a mā’a. ’Ua ’īriti mai au i te buka ’e ’ua ha’amata i te tai’o ’e i te tai’o.
’A tai’o ai au, ’ua tae mai te nino’a mana’o ē, tē vai rā hō’ē mea ta’a ’ē i roto i te Buka a Moromona ’e tē vai nei i roto te ’evanelia mau a Iesu Mesia. ’Ua tāpa’o haere te tamāhine o te fare ma’i e rave rahi ’īrava, teie te hō’ē Alama 37:37 : « ’A paraparau atu i te Fatu i te mau mea ato’a tā ’oe e rave ra, ’e nāna ho’i ’oe e arata’i i te maita’i ».
’Ua ’ōu’a mai taua mau parau ra i ni’a iā’u ’e ’ua ha’aferuri iā’u. Nō te ’ite mau o te ’Ēkālesia mau ānei Te ’Ēkālesia a Iesu Mesia i te Feiā Mo’a i te mau Mahana Hōpe’a nei, ’ua ’ite au ē e ti’a iā’u ’ia paraparau i te Fatu. ’Ua hina’aro roa vau e haere e hi’o i teie ’Ēkālesia nō’u iho.
’Ua mo’e ’ē tō’u tīa’i-’ore-ra’a
I tō’u ho’ira’a mai i te fare nā Niu Tirani mai, ’ua ani manihini au i te mau misiōnare ’ia ha’api’i iā’u. ’A ha’api’i mai ai au, ’ua noa’a tō’u ’itera’a pāpū ē, nā te Mesia teie ’Ēkālesia. Tē māuruuru nei au i te mau misiōnare tei ha’api’i iā’u. I tō’u bāpetizora’ahia, ’ua roa’a ia rātou te pūai nō te amo iā’u i roto i te pape—hō’ē tei tāpe’a iā’u i roto i tōna rima, ’a rave ai te tahi i tō’u bāpetizora’a.
Ma tō’u bāpetizora’a, ’ua mo’e ’ē te mau nino’a mana’o pe’ape’a ato’a ’e te ti’aturi ’ore tā’u i fa’aruru. ’Ua ’ite au e ’ōpuara’a tā’u i roto i te orara’a ’e ’ua here te Atua iā’u.
Hou vau ’a bāpetizohia ai, e ha’amā vau iho nō tō’u pereo’o tūra’ira’i. Teienei rā, i muri a’e tō’u bāpetizora’a, ’ua ha’amata vau i te haere mai i te pāroita i te mau sābati ato’a ’e i te ’āmuira’a i roto i te mau ’ātīvite a te feiā ’āpī pa’ari ’ōtahi. ’Ua haere ato’a vau i te mau ’ori’orira’a a te titi, ma te ’ori i roto i tō’u pereo’o tūra’ira’i i te mau hīmene ato’a. ’Ua ’āmui ato’a vau i te hō’ē natira’a nō Samoa ’e te feiā pēpē te ivi tua.
’Ua ’ite a’era vau ē, ’ua fa’aorahia vau i te nino’a mana’o ē e huna iā’u. Nā roto i te ’Ēkālesia, ’ua noa’a iā’u te ti’aturira’a e hina’arohia nō te haere fa’ahou i rotopū i te mau ta’ata.
’Ua tauturu ato’a mai te Fatu iā’u ’ia nā ni’a a’e iā’u iho ’e ’ia tupu i te rahi ’a fa’aitoitohia au ’ia haere i roto i te hō’ē fa’anahora’a e toru matahiti i te fare ha’api’ira’a nō Taputiha nō te Prosthetics ’e te Orthotics (CSPO) [mono mero ’e fa’a’eta’eta te mau ivi]. ’Aita vau i pāpū roa e nehenehe ānei au e ’āmui atu i roto i teie fa’anahora’a, nō te mea ’aita roa atu hō’ē ta’ata i roto i te pārahira’a tūra’ira’i i ani i taua ’ohipa ra. Terā rā, i te pae hope’a ’ua ti’a roa iā’u ’ia ’āmui atu i roto i te CSPO i Taputiha. ’Ua noa’a tā’u parau tū’ite i reira ’ei pīahi huma mātāmua i roto i te ’ā’amu ’o te fa’anahora’a.
Hou ’oia ’a bāpetizohia ai, ’ua ha’amā ri’i Posenai ’ia vai i roto i te pārahira’a tūra’ira’i. I muri a’e rā i tōna bāpetizora’a, ’ua parau ’oia ē, « ’ua roa’a iā’u te ti’aturira’a e hina’arohia nō te haere fa’ahou i rotopū i te mau ta’ata ».
I muri a’e tō’u ho’ira’a mai i Hāmoa, ’ua paraparau vau i roto i te hō’ē purera’a JAS nō ni’a i te ea. I muri a’e te ’āmuira’a, ’ua tāpiri mai te hō’ē tamāhine i pīha’i iho iā’u nō te aroha rima mai iā’u, ’e ma te parau ē ’ua au roa ’oia i tā’u a’ora’a. Nō ho’i noa mai nei Lagimanofia nā tāna misiōni. I te taime iho ā ’a fārerei ai au iāna, i ’ite ai au ē ’ua tū’ati ’oia iā’u. ’Ua pure au nō te ’ite mai i te hō’ē ta’ata ’o te nehenehe e riro mai ’ei hoa fa’aipoipo ’e te here iā’u ’e te fāri’i mai iā’u.
I tō māua Lagimanofia ha’amatara’a i te arapae, ’ua aupuru ’oia iā’u ’e ’ua fāri’i mai iā’u, ’e ’ua pāturuhia vau e tōna ’utuāfare. ’Ua fa’aipoipohia māua, ’e ’ua taui roa tō māua orara’a a muri noa atu i tō māua fa’a’amura’a ia Posenai tamaiti. ’Ua fa’aineine te Atua ia māua nō te fa’a’amu iāna. Te vaira’a ’oia i roto i tō māua orara’a ’ua fa’a’oa’oa roa ia māua.
E nehenehe ānei iā’u e tāvini ?
I te fare purera’a, ’ua pi’ihia vau ’ei pāpa’i parau pāroita, ’e i muri iho ’ei tauturu i roto i te ’episekōpora’a. ’Aita e nehenehe iā’u e ti’aturi ē, e nehenehe te hō’ē ta’ata i roto i te pārahira’a tūra’ira’i e tāvini. ’Ua fa’atupu tō’u ’ati i te mana’o faufa’a ’ore i roto iā’u, te ’ohipara’a rā i roto i te ’Ēkālesia, ’ua tauturu iā’u ’ia ’ite ē, e nehenehe tā’u e tauturu atu. Mea au nā’u te rāve’a ’ia ha’afātata atu iā’u ia Iesu Mesia ’a tāvini ai au.
’Ei tauturu i roto i te ’episekōpora’a, ’ua hina’aro vau ’ia arata’ihia vau nō te pāhono maita’i atu vau i roto i tō’u pi’ira’a. ’Ua hōro’a mai te reira iā’u i te hina’aro e fa’aineine rahi atu ā iā’u nō te sābati tāta’itahi. ’Ua mātau vau i te tai’o i tā’u mau pāpa’ira’a mo’a, ’e ’ua roa’a iā’u te rāve’a nō te fa’a’ite i tō’u ’itera’a pāpū. Te rirora’a ’ei ta’ata fa’atere i te fare purera’a, ’ua tauturu ato’a te reira iā’u ’ia riro ’ei ta’ata fa’atere i te ’ohipa. ’Ua roa’a iā’u te nino’a mana’o ē, e nehenehe au e fa’atere ’e e paraparau, nā te reira e fa’ati’a iā’u ’ia fa’atere i te tahi atu mau vāhi.
I teienei, tē rave nei au i te ’ohipa ’ei ti’a fa’atere nō te mau mātēria monora’a melo ’e te fa’a’eta’eta te mau ivi i te fare ma’i nō Tupua Tamasese Meaole, te fare ma’i tumu nō Hamoa. I roto i tā’u vāhi ’ohipara’a e fa’ari’ihia fātata e 500 ta’ata i te matahiti ’e te mau tauturu o te mau mātēria haerera’a ’e te mau pārahira’a tūra’ira’i. Te ’Ēkālesia, nā roto i te fa’aterera’a hau Hāmoa o te ea, ’ua tauturu ma te hōro’ara’a mai i te mau pārahira’a tūra’ira’i ’e te mau mātēria nō te hāmani i te mau mono melo (hi’o philanthropies.ChurchofJesusChrist.org/humanitarian-services). E tauturu teie mau mauiha’a i te mau ta’ata ’ia ho’i fa’ahou i te ’ohipa ’e ’ia fa’arava’i iāna iho. E hōro’a ato’a te reira i te mau ta’ata i te tīa’ira’a ’e te rāve’a nō te ’ite fa’ahou mai i te hō’ē orara’a ’o tā rātou i mana’o ’ua mo’e.
« Te ’ohipara’a i roto i te ’Ēkālesia ’ua fa’ati’a iā’u ’ia ’ite mea faufa’a vau ’e e nehenehe tā’u e tauturu », tē nā reira ra Posenai. « Mea au roa nā’u te rāve’a nō te ha’afātata atu ā ia Iesu Mesia ’a tāvini ai au ».
Tūru’i i ni’a i te Fatu
Mai te peu e nehenehe iā’u e horo’a i te parau a’o i te tahi atu mau ta’ata huma, e parau vau « ’eiaha e vaiiho i tō ’outou ma’i huma ’ia tāpe’a ia ’outou i te mea tā ’outou e ti’aturi ra. ’A hōro’a i tō ’outou ’ā’au ato’a i roto i te mea tā ’outou e hina’aro ra e fa’aoti ’e ’a ’ohipa itoito nō te reira. ’A ’imi ai ’outou i te tauturu a te Fatu, e ha’amaita’i mai ’oia ia ’outou [hi’o 2 Nephi 32:9] ».
Ma teie ti’aturira’a, tē tāmau noa nei au ’e nā te reira e fa’ariro iā’u i te mea ’a riro mai ai au i teie mahana Tē ti’aturi nei au ē ’ua tu’uhia mai au i’ō nei ’e ’ua fa’aorahia vau nō te hō’ē ’ōpuara’a ti’a mau. ’Ua topa mai au nā ni’a mai i teie tumu ha’ari, ’ua fa’aora rā te Fatu iā’u ’ia ti’a iā’u ’ia taui i tō’u orara’a ’e ’ia rave i teie ’ohipa o te tauturu i teie mau ta’ata ato’a. ’Ua ha’api’i mai te Fatu iā’u ē, e nehenehe au e tauturu e rave rahi mau ta’ata—’eiaha noa nō tō’u huma, maoti ra ’oia.