« Nā parau mau e piti tei tauturu iā’u ’ia hāro’aro’a i te ha’eha’a », Liahona, Tiurai 2024.
Feiā ʼāpī paʼari
Nā parau mau e piti tei tauturu iā’u ’ia hāro’aro’a i te ha’eha’a
E nehenehe te ha’eha’a e tauturu i te te’ote’o ’e te mau nino’a mana’o tano ’ore.
Hōho’a o te mau melo i Paratue nā Leslie Nilsson
Parau pāpū : E tamariʼi au nā te Atua ’E e parau mau fa’ahiahia te reira ’e te hanaha.
E parau pāpū faufa’a ato’a ra : Nō te mea ho’i ē e tamari’i ato’a nā te Atua te tahi ato’a mau ta’ata i ni’a i te fenua nei, e mau ta’ata fa’ahiahia ato’a rātou ’e te hanahana.
E mea pāpū maita’i teie nā parau mau to’opiti, e ravera’a ’atā rā nō’u i te ha’amau maita’i te reira i roto iā’u ’e ’ia hāro’aro’a i te aura’a o te reira i roto i tō’u orara’a. I te tahi mau taime, ’ua hape au i te ravera’a i te hō’ē tupura’a ’ohipa ma te te’ote’o, ma te mana’o ē e mea maita’i a’e tō’u haere’a ’aore rā e mea ’aravihi a’e au i te tahi atu mau ta’ata. I te tahi atu mau taime e fa’ahape au i te ravera’a, te ’itera’a ē e mea ti’amā ri’i au ’aore rā e mea faufa’a ’ore ri’i au i te tahi atu mau ta’ata ’ati a’e iā’u.
Te pāhonora’a i nā ’arora’a to’opiti hō’ē ā ïa :
Ha’eha’a
’Ua nava’i maita’i ānei nō’u nei ?
Hō’ē ’ohipa tei tupu ’o tei fa’aha’eha’a mau iā’u, ’ua tupu i roto i tā’u misiōni. Tē mana’o nei au ē, tei roto te rahira’a o te mau misiōnare i te hō’ē nino’a mana’o o te ’aravihi ’ore, ’ia tāmata ana’e rātou i te ’āfa’i mai i te ta’ata ia Iesu Mesia ra. I roto i tā’u misiōni, e rave au e rave rahi hora i te mahana i te tāmatara’a i te ’ite mai i te hō’ē ta’ata nō te ha’api’i ’e ’ua pāto’ihia vau i te mau taime ato’a. ’Ua tupu te mana’o manuia ’ore i roto iā’u. ’Aita vau i mana’o ’ua nāva’i tā’u mau tauto’ora’a. I te pae hope’a, ’ua ha’amata vau i te ’ite ē ’aita vau i nāva’i.
Noa atu ē ’aita roa a’e au i mana’o ’o te ha’eha’a paha te tītauhia iā’u, i tō’u rā fa’ata’ara’a i tō’u mau nini’a mana’o i tō’u peresideni misiōni, ’ua tauturu mai ’oia iā’u ’ia hāro’aro’a ē hō’ē tuha’a o tō’u fifi tei roto ïa i te mana’ora’a ē, e’ita vau e fa’aruru i te mau fifi ’o tā te mau misiōnare nā te ao ato’a nei e fa’aruru nei. E ’ere rā vau te misiōnare mātāmua tei ’ite i te pāto’ira’a, ’e e mea pāpū e ’ere vau te ta’ata hope’a.
Noa atu rā te reira, ’ua ha’apāpū vau iā’u iho ē ’o vau iho te tumu nō tō’u mau fifi, noa atu tē vai ra te mau misiōnare maita’i roa a’e i roto i te ’ā’amu—mai te Tino ’Ahuru ma Piti ’āpōsetolo i tahito ra, te mau tamaiti a Mosia, ’e ’o Alama tamaiti—tei fa’aruru i te pāto’ira’a ’e te hāmani-’ino-ra’a rahi roa a’e i tō’u.
’Āhani i te hiā’otora’a iā’u iho, ’ua ha’amata vau i te ’ite ē tei pīha’i iho vau ia Iesu Mesia i roto i tō’u mau ’arora’a. ’E ’ia ha’amā ana’e au i tā’u mau tauto’ora’a tano ’ore, e ha’amana’o vau i te mea tā te peresideni Jeffrey R. Holland, peresideni mono nō te pupu nō te Tino ’Ahuru ma Piti ’āpōsetolo, i ha’api’i : « E amo ’ē te Tāra’ehara [a te Mesia] i te mau misiōnare hau atu paha i tāna e amo nei i te mau hoa o te ’Ēkālesia. ’Ia ’aro ana’e ’outou, ’ia pāto’i-ana’e-hia ’outou, … tē ora nei ’outou i te orara’a maita’i roa a’e ’o tā te ao nei i ’ore roa i ’itea-a’e-nei, te orara’a vi’ivi’i ’ore ana’e ’e te maita’i roa a’e tei ’ore ā i orahia a’enei ».
Tē ha’amana’o fa’ahou ra vau i teie ’itera’a ’a tītauhia ai iā’u ’ia ha’amana’o ’ia vai ha’eha’a ’e ’ia ti’aturi i te Fatu.
Hō’ē ha’api’ira’a nō te ha’eha’a
’Ua ha’api’i rahi mai au nō ni’a i tō’u ihota’ata ’ei tamari’i nā te Atua i roto i tā’u misiōni. I muri mai rā i tō’u ho’ira’a i te fare, ’ua ’ite a’era vau e rave rahi atu ā mea e ti’a iā’u ’ia ha’api’i mai nō ni’a i te faufa’a rahi nō te ha’amana’ora’a ē, e mau tamari’i ato’a nā te Atua te tahi atu mau ta’ata.
Tau taime ri’i i muri mai i tō’u ho’ira’a i te fare, ’ua fa’aruru vau i te hō’ē pi’ira’a fifi ’e ’ua tītauhia vau e fa’anaho i te hō’ē ’ohipa faufa’a roa. ’Ua pe’ape’a roa vau ’e ’aita i ti’a iā’u ’ia fārerei i te mau ta’ata tei tītauhia e tauturu mai iā’u. ’Ua hāpono vau i te hō’ē rata uira, e nehenehe e parau, tei pāpa’ihia ma te huru teiaha.
’Ua tano vau i te paraura’a e pi’ira’a faufa’a mau ’e ’ua hina’aro vau i te pāturu rahi atu ā, ’ua ’ite ’oi’oi rā vau ē e ’ere paha te reira i te rāve’a maita’i a’e nō te fa’aitoito i te ta’ata. Tītauhia iā’u te ha’eha’a ; e ti’a iā’u ’ia ha’amana’o ē tē vai ra paha tō vetahi tō rātou iho mau fifi o te fa’ahoruhoru nei ia rātou.
Mai tā Elder Steven E. Snow i ha’api’i ’a riro ai ’oia ’ei melo nō te Hitu ’Ahuru, « mai te peu e fa’aha’eha’a tātou ia tātou, e pāhonohia tā tātou mau pure ; e ’oa’oa tātou i te mana’o hau ; e tāvini maita’i a’e ā tātou i roto i tō tātou mau pi’ira’a ; ’e mai te peu e tāmau noa tātou i te vai ha’apa’o noa, i te hope’a e ho’i atu tātou i mua i te aro o tō tātou Metua i te ao ra ».
’Oia mau, ’ua putapū rahi au i te ’oa’oa i roto i tō’u pi’ira’a ’e i roto i tō’u orara’a ’a ha’api’i noa mai ai au ’ia vai ha’eha’a atu ā.
Fa’a’aifāito nā parau mau e piti
Nō’u nei, te ha’api’ira’a mai i te ha’eha’a mau ’o te fa’a’aifāitora’a ïa i nā parau mau e piti :
E tamari’i au nā te Atua. ’E ’ua hā’atihia vau e te tahi atu mau tamari’i a te Atua.
’A ha’api’i rahi noa mai ai au nō ni’a i te ha’eha’a, ’ua ’ite a’era vau e parau mau te mea tā Elder Quentin L. Cook nō te pupu nō te Tino ’Ahuru ma Piti ’āpōsetolo i ha’api’i : « E ’ere te ha’eha’a i te hō’ē manuiara’a rahi e ’itehia ’aore rā i te upo’oti’ara’a i te hō’ē tāmatara’a rahi. … ʼO te roa’ara’a i te ti’aturiraʼa hau i terā mahana ’e terā hora e nehenehe tātou e tiʼaturi i te Fatu, e tavini iāna ʼe e faʼatupu i tāna mau ʼōpuaraʼa ». ’Ua ha’api’i mai au e nehenehe mau vau e fa’atupu i te mau ’ōpuara’a a te Fatu—mai te mea noa e e hōro’a vau iāna i tō’u hina’aro ’e ’ua ti’aturi vau ē ’ua ’ite ’oia i te mea maita’i a’e.
’Ua ’ite au mai te mea e tūtava tātou ’ia riro ’ei mea ha’eha’a a’e ’e ’ia riro mai te Mesia ra te huru, e ha’amaita’i mai tō tātou Metua i te ao ra ia tātou i roto i tā tātou mau tauto’ora’a.
Tē ora nei te ta’ata pāpa’i i Francfort, Heremani.