E aha te mea tā tātou e nehenehe e pure ?

I roto te Alama 33 ’e 34, ’ua ha’api’ihia tātou ē, e nehenehe tātou e pure i te mau vāhi ato’a, i te mau taime ato’a, nō te mau mea ato’a. Teie te tahi mau hi’ora’a nō te mau ta’ata tei pure i roto i te mau tupura’a ta’a ’ē.

’A tai’o ai ’outou i teie mau ’itera’a, ’a feruri i te tahi o te mau rāve’a ’a pure ai ’outou « nō ni’a i tā ’outou mau nana » ’e « i roto i tō ’outou mau piha, ’e i roto i tō ’outou mau vāhi mo’emo’e, ’e i roto i tō ’outou mēdēbara » (Alama 34:25, 26).

Tei roto Alma Richards, e feiā mo’a i te mau mahana hope’a nei, i te pupu Tū’aro Nui nō te matahiti 1912.

Purera’a i te Tū’aro Nui

’Ei ta’ata ’ōu’a teitei, tei roto Alma Richards i te pupu Tū’aro Nui hanamā’ona nō te matahiti 1912 ’o tei tata’u i Stockholm, Tuete. I roto i te tata’ura’a, ’ua pau vetahi hō’ē ’e i muri i te tahi e tae roa ’ua toe noa mai ’o Alma ’e te tahi atu mā’ona.

« ’A fa’aineine ai Alma nō te ’ōu’a, ’ua tāfifi tōna ferurira’a. Tei reira ’oia, e ti’a ra nō tōna fenua i te tata’ura’a tū’aro hanamā’ona rahi roa a’e o te ao nei. Nō reira, ’ua ’ite ’oia i te paruparu, mai te huru ē tē teimaha nei te ao ato’a nei i ni’a i tōna tapono ’Ua mana’o ’oia ia Utaha, i tōna ’utuāfare ’e i tōna ’oire āi’a. ’Ua mana’o oia ia BYU ’e i te feiā mo’a. Ma te pi’o i tōna upo’o i raro, ’ua ani māmū noa ’oia i te Atua ’ia hōro’a mai i te pūai iāna. ‘Mai te mea ’ua ti’a iā’u ’ia upo’oti’a’, ’ua pure ’oia, ‘e rave au mai tā’u e nehenehe nō te fa’a’ite i te hi’ora’a maita’i i te mau mahana ato’a o tō’u orara’a’ ».

Ma te turu’i i ni’a i te pūai o te Fatu, ’ua ’ōu’a Alma ’e ’ua nā ni’a a’e i te ’auri teitei. I te ’orera’a tōna hoa tata’u hope’a i manuia, ’ua upo’oti’a Alma i te feti’a ’auro.

ta’ata e ’ōu’a ra nā ni’a a’e i te ’auri i te hō’ē tāta’uta’a tū’aro

I muri a’e, ’ua « ha’uti te hō’ē hoa iāna nō ni’a i te pure hou tāna ’ōu’a o te upo’oti’ara’a. ‘Tē hina’aro nei au ’eiaha ’oe e ’ata’, ’ua pāhono marū atu Alma. ‘’Ua pure au i te Fatu ’ia hōro’a mai iā’u i te pūai nō te nā ni’a a’e i terā ’auri, ’e ’ua nā reira vau’ ».

Te purera’a i te poro o te hō’ē aroā

I te matahiti 1898, ’ua riro ’o Inez Knight ’e ’o Jennie Brimhall ’ei nā vahine ’ōtahi mātamua tei pi’ihia ’ei tuahine misiōnare nō Te ’Ēkālesia a Iesu Mesia i te Feiā Mo’a i te mau Mahana Hope’a nei. I muri noa iho i te tāpaera’a i roto i tā rāua misiōni i Peretāne, ’ua haere atu nā vahine to’opiti e poro i Oldham, te hō’ē ’oire tapiha’ara’a fātata ia Liverpool.

e piti tuahine misiōnare — ’Ua pure Inez Knight ’e ’o Jennie Brimhall nō te tauturu i roto i tā rāua tāvinira’a misiōnare i Peretāne.

’Ua ta’iruru nā tuahine e piti, tō rāua peresideni misiōni, ’e te tahi atu mau misiōnare i te hō’ē pō. « ’Ua ha’amenemene ia rātou i te poro o te hō’ē purūmu ta’ata roa, ’ua pūpū i te hō’ē pure ’e ’ua hīmene i te mau hīmene purera’a e tae roa, ’ua ruru mai te hō’ē naho’a ta’ata rahi nā pīha’i ia rātou ». Nō tō manuia rahi o tā rātou mau tauto’ora’a « ’ua fa’aara te peresideni misiōni e fa’atupuhia te hō’ē purera’a ta’a ’ē i te mahana i muri iho, ’e ’ua ani manihini i te mau ta’ata ato’a ’ia haere mai ’e fa’aro’o i te porora’a a ‘te mau vahine mōmoni mau’ »

Pure nō te faura’o

’Ua tere atu Sahr nō Bo mai, i Sierra Leone, nā ni’a i te moto-taxi i te hō’ē mata’eina’a nō te ’āfa’i i te rā’au e hina’aro-mau-hia e tōna nā metua ruhiruhiā. ’Ua fa’aea maoro ’oia ma te ’ōpua-’ore-hia nō te tauturu i tōna nā metua i te tātā’ira’a i tō rāua tāpo’i fare, tei ’ino i roto i te hō’ē mata’i rorofa’i. I te taime ’a tātā’ihia ai te reira, ’ua topa te mahana.

Nō te hora maoro, e ’ere i te mea pāpū ē e tere mai te hō’ē taxi. ’Ua ha’ape’ape’a Sahr ’Aita ana’e e tāxi, e tītauhia iāna ’ia ho’i nā ’āvae e mea ātea roa ho’i ’e e mea ataata ato’a rā. E fa’aea i te fare o tōna nā metua e’ita te reira i te hō’ē rāve’a, nō te mea e rave ’oia i te ’ohipa i te po’ipo’i roa i te mahana nō muri iho. Hau atu, ’aita ’oia e hina’aro e vaiiho noa i tōna ’utuāfare ’āpī ana’e i te pō.

E mea huru ’ē ri’i ’ia pure nō te hō’ē moto-tāxi, ’ua ani rā Sahr i te Atua e tauturu iāna ’ia ho’i i tōna fare. Tau minuti i muri mai, ’ua tae mai te hō’ē tāxi, nō te fa’ahoro mai i te hō’ē ta’ata i taua vāhi hau ra. ’Ua ta’uma atu Sahr i roto ma te māuruuru rahi, i te mana’ora’a ’ua ha’amaita’ihia ’oia ’ia ho’i i te fare i te taime ti’a nō te fa’atura i tāna mau fafaura’a i te ’ohipa ’e nō te pāruru i tōna ’utuāfare.

Pure nō te tauira’a i te tārena

E hina’aro rahi tō te taea’e Miguel Troncoso nō Santa Cruz, Rāparata e fa’aro’o ia Elder Carlos H. Amado nō te Hitu ’Ahuru ’ia paraparau i tāna titi. ’Ua tārenahia rā e paraparau Elder Amado i te hō’ē pō mahana piti, ’e ’ua tītauhia i te taea’e Troncoso, e ’orometua ha’api’i nō te fare ha’api’ira’a tuarua, ’ia ha’api’i i te hō’ē piha ha’api’ira’a i te reira pō. Nō tōna hina’aro rahi e haere i te purera’a, ’ua pure ’oia ’e tōna ’utuāfare nō te ani i te tauturu.

’Ua parau te taea’e Troncoso nō teie mea nō te ’ohipa i tupu :

« I te mahana nā mua a’e i te ’āmuira’a, ’ua fa’auruhia vau e paraparau i te ti’a fa’atere rahi nō te rāve’a e haere nā mua a’e e 20 minuti i te hora fa’aotira’a. … Hou vau ’a nehenehe ai e parau i te hō’ē parau, ’ua ani mai ’oia iā’u ē e fifi ānei nō’u mai te mea e tauihia te hora ha’amatara’a nō tā’u piha ha’api’ira’a, i te mahana piti e piti hora nā mua a’e i tei mātarohia. …

« ’Auē ïa ha’amaita’ira’a nō mātou. ’Ua tae atu mātou i te purera’a i te hora ti’a ’e ’ua putapū mātou i te Vārua i mua i te hō’ē o te mau pipi a te Fatu. … Hau atu, ’ua noa’a tō mātou ’itera’a pāpū ’ei ’utuāfare ē ’ua ’ite tō tātou Metua i te ao ra i tō mātou mau hina’aro ’e tē fa’aro’o nei ’oia i tā mātou mau pure ».