Mai, pe’e mai

Alama 22

E aha tā ’outou e ha’apae nō te ’ite maita’i i te Atua ?

taure’are’a e haere ra nā te pae tahatai

Pinepine te orara’a i te ’evanelia e tītau i te fa’atusiara’a. Tē ani mai nei tō tātou Metua i te ao ra ia tātou e ha’apae i tō tātou huru nātura nō te fāri’i i te hō’ē mea rahi a’e : hō’ē ’itera’a i te Atua ’e te mau ha’amaita’ira’a fāito ’ore tāna e pūpū nei.

’Ua fa’ata’a mai te metua tāne o te ari’i Lamoni i teie hina’aro o te fa’atusiara’a ’a pure ai ’oia, « mai te mea ē tē vai ra te Atua, ’e ’o ’oe taua Atua ra, ’a fa’a’ite mai na ’oe ia ’oe iho iā’u nei, ’e e ha’apae atu vau i tā’u ato’a ra mau hara ’ia ’ite au ia ’oe na, ’e ’ia fa’ati’ahia vau mai te pohe mai, ’e ’ia fa’aorahia i te mahana hope’a ra » (Alama 22:18 ; reta tei fa’ahuru-’ē-hia).

’Ua ha’api’i te peresideni Russell M. Nelson ē te upo’oti’ara’a i ni’a i te ao ’e te tupura’a i te rahi i pīha’i iho i tō tātou Metua i te ao ra ’e ia Iesu Mesia, tei roto ïa « te mā’itira’a ’ia ha’apae i te mau mea ato’a ’o tē fa’aātea ’ē atu i te Vārua » ’e « te hina’arora’a ’ia ‘ha’apae’ i tā tātou mau hara au roa »

Te mau uira’a e feruri°:

E nehenehe te mau hara au-roa-hia e riro ’ei mea fifi ’ia ’ite mai nō te mea, pinepine tātou i te fa’ati’a i te reira ’aore rā e fa’ati’a i te reira ’ia riro mai ’ei peu matarohia. ’A feruri i te rave i te tahi taime nō te feruri i te mau hara « auhia » ’o tē tāpe’a nei ia ’outou ’ia ha’afātata atu i te Metua i te ao ra ’e ia Iesu Mesia.

• E aha te tahi ’o tā’u mau hara au roa a’e ?

• E aha te mau ta’ahira’a tā’u e nehenehe e rave nō te upo’oti’a i ni’a i teie mau hara ?

• E aha te mau fifi tā’u e fa’aruru atu i roto i tā’u tauto’ora’a ?

• Nāhea te fa’atusiara’a i teie mau hara i te tauturu iā’u i roto i te mau vāhi ’o tā’u e ’aro nei ?

Mau ha’amaita’ira’a

Ta’a ē noa atu te mau ha’amaita’ira’a tā te metua tāne o te ari’i Lamoni i ’imi, ’oia ho’i te ti’afa’ahoura’a ’e te fa’aorara’a, ’ua tāpura te peresideni Nelson i te tahi atu ā mau ha’amaita’ira’a e tae mai nā roto i tā tātou mau tauto’ora’a ’ia riro hau atu ā mai ia Iesu Mesia ’e ’ia fa’aea noa i ni’a i te ’ē’a nō te fafaura’a. Teie i roto :

• Tauira’a o te ’ā’au ’e te nātura

• Aroha

• Ha’eha’a

• ’Ā’au hōro’a

• Hāmani maita’i

• Ha’avīra’a iāna iho

• Hau

• Ti’aturira’a

• ’Oa’oa

• Fa’afa’aeara’a

• Pūai pae vārua

• Heheura’a o te ta’ata iho

• Fa’arahi te fa’aro’o

• Utuutura’a a te mau melahi

• Temeio

Mai te mea tē fifi nei ’outou i te fa’atusia i te tahi mau hara, ’eiaha e fa’aeā i te tāmau noa. Tē fa’aha’amana’o mai nei peresideni Nelson ia tātou ē « te upo’oti’ara’a i ni’a i te ao nei e ’ere roa atu te aura’a ’ia riro ’ei mea maita’i roa i roto i teie orara’a, e ’ere ato’a e mo’e roa tō ’outou mau fifi ma te manamana—nō te mea e’ita te reira e tupu. ’E e ’aita roa atu ’outou e rave fa’ahou i te mau hape. Te aura’a o te upo’oti’ara’a i ni’a i te ao nei ’oia ho’i e mara’a rahi atu ā tō ’outou pāto’ira’a i te hara ».

Ma te ravera’a i te tauto’ora’a ’ia ha’apae i tā tātou mau hara mai te metua tāne o te ari’i Lamoni, e ’ite mai tātou ē, te ’ite-maita’i-ra’a i te Atua e tītau noa i te fa’atusiara’a. ’Ia nā reira tātou, e riro mai tō tātou orara’a tāta’itahi ’ei mea rahi a’e i tei ti’a ia tātou iho e rave.

Fa’ata’ara’a

1. Russell M. Nelson, « Upo’oti’a i ni’a i te ao nei ’e ’ia noa’a te ora », Liahona, Novema 2022, 96.

2. Hi’o Russell M. Nelson, « Upo’oti’a i ni’a i te ao nei ’e ’ia noa’a te ora », 97.

3. Russell M. Nelson, « Upo’oti’a i ni’a i te ao nei ’e ’ia noa’a te ora », 96.