« Nāhea vau ’ia ti’aturi i te Metua i te ao ra ’ia ’ite ana’e au i te vai mo’emo’era’a ? », Liahona, Tiurai 2024.
Feiā ʼāpī paʼari
Nāhea vau ’ia ti’aturi i te Metua i te ao ra ’ia ’ite ana’e au i te vai mo’emo’era’a ?
’Ua tāmata vau ’ia roa’a te fa’aro’o, ’ua fa’aruru noa rā vau i te mau tāmatara’a e rave rahi. Nāhea vau i te tāmau noa i te ti’aturi i te Fatu ?
Fa’ahōho’ara’a nā Kathleen Peterson
’Ua fa’a’itehia mai iā’u te mau misiōnare e tō’u mau taea’e fēti’i i te ivara’a o tō’u matahiti. ’Ua ’āmui mai au i Te ’Ēkālesia a Iesu Mesia i te Feiā Mo’a i te mau Mahana Hope’a nei, ’o vau ana’e rā te hō’ē o te mau melo ’o tō’u iho ’utuāfare ’o tei nā reira ’oi’oi. Mai te reira taime, ’ua ha’api’i mai au ’ia here maite atu ā i te ’evanelia a Iesu Mesia. Teie rā, i roto i te hō’ē tau, te ti’aturira’a i tō tātou Metua i te ao ra ’e i tāna mau parau mau ’ua riro ’ei mea fifi roa nō’u, ’e mea ’atā ato’a nō’u i te haere-tāmau-noa-ra’a i mua ma te fa’aro’o.
Te orara’a ma te ta’a ’ē i roto i te ao nei ’ei pipi nā Iesu Mesia, e nehenehe e riro ’ei ’ohipa fifi nā te mau vāhi ato’a, te pa’arira’a rā i Hong Kong ’ei melo nō te ’Ēkālesia e mea fifi roa atu ïa i tā te tahi mau ta’ata e mana’o ra.
I te hō’ē pae, e rave rahi ta’ata i roto i teie tuha’a fenua ’aita e au nei i te ’Ēkālesia ’e ’o tē mana’o nei e tū’āti te reira i te mau mea ’ī’ino. Te tao Tinito tei fa’a’ohipahia nā mua a’e nei nō « Momoni », e parauhia nō te ’Ēkālesia, ’o te hō’ē ïa ta’i e tū’ati i te ta’o Tinito nō te « diabolo ». Nō vetahi, ’ua fa’atupu te reira i te hō’ē mana’o hape nō ni’a i te mau faufa’a tumu a te ’Ēkālesia.
’Oia ato’a, nō te mea e rave rahi atu ā mau ha’apa’ora’a fa’aro’o mātarohia tei fa’ati’a-a’ena-hia ’e nō te iti o te mau melo o te ’Ēkālesia i Hong Kong, e mea ’ōhie roa ’ia ’ite mai i te vai ’ōtahira’a ’aore rā te mo’emo’e. E rave rahi ta’ata e uiui nei nō ni’a i te ’Ēkālesia, ’aita e māramarama hope nei i tāna mau ha’api’ira’a ’e ’aita e hina’aro e fa’aro’o maita’i mai i te mea tā te mau melo e hina’aro e fa’a’ite atu.
’Ua putapū hau atu vau i te mau tupura’a o teie mau pāto’ira’a i tō’u ’āpīra’a, nā roto rā i teie mau ’ohipa i tupu, ’ua ha’api’i rahi mai au i te aura’a ’ia ti’aturi i te Metua i te ao ra ’e ia Iesu Mesia.
E faufa’ahia ānei ’ia ora i te ’evanelia ?
I te fare ha’api’ira’a tuarua, e hoa tō’u nā metua nō te hō’ē ’o tō’u mau ’orometua ha’api’i. E melo itoito keresetiano teie ’orometua ha’api’i nō te tahi atu ha’apa’ora’a fa’aro’o. I taua taime ra, ’o vau ana’e te melo o te ’Ēkālesia i roto i tā’u piha ha’api’ira’a, ’e e rave rahi hoa piha ha’api’ira’a ’e mau ’orometua ha’api’i tei paraparau hape a’ena nō ni’a i te ’Ēkālesia a Iesu Mesia ’e tōna mau melo.
E mau mana’o ’ino rahi tō teie iho ā rā ’orometua ha’api’i nō ni’a i tā’u ha’apa’ora’a fa’aro’o, ’o tei ha’afifi i te mau mea e hoa ho’i ’oia nō te ’utuāfare.
I te hō’ē taime, pinepine au i te ta’oto i roto i tāna piha ha’api’ira’a nō te mea e ti’a ’oi’oi au i te po’ipo’i roa nō te haere i te séminaire, ’o tāna ïa e ha’ape’ape’a nei ’o tē taerehia vau i roto i tā’u mau ’ohipa ha’api’ira’a. ’Ua fa’aahoaho ato’a ’oia iā’u ’e ’ua tāmata i te ui mai iā’u e rave rahi mau uira’a teimaha nō ni’a i te mau ha’api’ira’a tumu ’o tā’u i ’ore i ’ite e nāhea e pāhono. ’Ua hōro’a ato’a mai ’oia iā’u i te mau ’ohipa ha’api’ira’a nō te tai’o i te mau buka e pāto’i i te ’Ēkālesia ! ’Ua tāmata itoito ’oia i te ’ume iā’u ’ia fa’aru’e i tā’u ha’apa’ora’a fa’aro’o.
’Ua riro te reira ’ei taime fifi mau nō tō’u fa’aro’o. Nō te aha, ’a tāmata ai au i te fa’aea piri noa i te Metua i te ao ra ’e ia Iesu Mesia, te vai ha’apa’o-maita’i-ra’a e fa’atupu te reira i te mau tāmatara’a ’e te mau fifi i roto i tō’u orara’a ? Tē ti’ara’a mau, e ha’amaita’ihia vau nō te ha’apa’ora’a i te mau fa’auera’a ’e te fa’atusiara’a i te ta’oto nō te haere i te séminaire ?
’Aita rā, ’ua topa tā’u mau tai’o, ’ua iti mai tō’u fa’aro’o, ’e ’ua fifi tō’u mau aura’a e tō’u mau ’orometua ha’api’i, tō’u ’utuāfare, ’e te Metua i te ao ra.
I te hō’ē taime, ’ua ha’amata vau i te uiui iā’u iho e ho’ona ānei te orara’a i te ’evanelia. ’Ua ha’amata vau i te ha’apae i te séminaire ’e ’ua ’ite vitiviti atu vau i tō’u fa’aro’o i te paruparura’a. E au ē mea ’ōhie a’e nō’u ’ia hema i te mea tā te ao ’ati a’e iā’u e tūra’i ra iā’u ’ia rave.
Mā’itira’a ’ia ti’aturi
’Ua tāmau noa vau i te pure i te Metua i te ao ra nō te arata’i iā’u ’e ’ia hāro’aro’a iā’u. Noa atu te ’āhuehue rahi ’e te ’ino’ino ’o tā’u e putapū nei i mua i tō’u ti’ara’a, ’ua tāmau noa te hō’ē mea i roto i tō’u ’ā’au i te tāpe’a noa i te fa’aro’o. ’Ua paraparau vau i te mau hoa ha’apa’o maita’i ’e ’ua parau atu vau i tō’u mau hoa i te fare purera’a nō ni’a i te mea tā’u e ora nei, ’e ’ua fa’aitoitohia vau ’ia paraparau i tō’u ’orometua nō te séminaire i tō’u mau ’arora’a.
’Ua pāhono mai ’oia ma te aroha ’e ’ua fa’aitoito iā’u ’ia tāmau noa i te haere i te séminaire ma te ’ā’au tei ’ī i te tīa’ira’a. ’Ua fafau mai ’oia iā’u ē, e ’ite mai au i te mau ha’amaita’ira’a ’ia tupu mai, mai te mea e tāmau noa vau i te tāpe’a i te fa’aro’o ’e ’ia ti’aturi ē e mea rahi ā tā te Fatu i fa’aherehere nō’u ’e e ha’amo’a ’oia i tō’u mau tāmatara’a (hi’o 2 Nephi 2:1–2).
Nō reira, noa atu te mau tāmatara’a tā’u e fa’aruru nei, ’ua mā’iti au e ti’aturi.
I muri a’e i te hō’ē taime, ’ua ’ite au i tō’u huru i te tauira’a. ’Āhani i te rōtahira’a i ni’a i te mau fifi tā’u e fa’aruru nei, ’ua rōtahi au i ni’a i te ha’amāuruurura’a ’o tā’u e putapū nei nō te ’evanelia. ’Ua ha’amata vau i te rōtahi i ni’a i te ha’amaita’ira’a o tō’u ’utuāfare, i ni’a i tō’u ihota’ata hanahana, ’e i ni’a i te mau parau mau mure ’ore o te ’evanelia. ’E i te hope’a, ’ua hāro’aro’a vau ē ’ua ’ite maita’i te Metua i te ao ra ’e ’o Iesu Mesia i tō’u vaira’a ’e tei pīha’i iho noa rāua iā’u i te mau taime ’a ’ite ai au i te vai mo’emo’era’a.
’Ua taui te reira i te mau mea ato’a.
’A tāmau noa ai au i te ti’aturi ia rāua, i te ha’apa’o i te mau fa’auera’a, te tātarahapara’a i te mau mahana ato’a, ’e ’ia rave i te mau ’ohipa na’ina’i nō te tū’ati atu ia rāua, ’ua ’ite au i tō’u niu o te fa’aro’o i te hōhonura’a ’e i te pūaira’a.
’Ua parau iho nei peresideni Russell M. Nelson : « ’Ia ha’apa’o i tō ’outou iho ’itera’a pāpū nō Iesu Mesia ’e tāna ’evanelia. ’A ha’a nō te reira. ’A aupuru i te reira ’ia tupu i te rahi. ’A fa’a’amu i te reira i te parau mau. ’Eiaha e ha’avi’ivi’i i te reira i te mau ha’api’ira’a hape a te mau tāne ’e te mau vahine ti’aturi ’ore. Mai te mea e fa’ariro ’outou i te ha’apa’ari-tāmau-noa-ra’a i tō ’outou ’itera’a pāpū ’ei ’ohipa e rave mātāmua roa, ’a hi’o maīte i te mau temeio e tupu mai i roto i tō ’outou orara’a ».
’E ’a nā reira ai au, ’ua tupu te hō’ē temeio.
E aha te aura’a ’ia ti’aturi i te Fatu
I muri a’e i te ’apera’a i te tahi taime i te mau ’āparaura’a ato’a nō ni’a i te fa’aro’o ’e tō’u ’orometua ha’api’i, i te hō’ē mahana ’a ui mai ai ’oia iā’u i te mau uira’a, ’ua ’ite au ē ’ua ineine au nō te pāhono atu nā roto i tō’u fa’aro’o ’āpī. ’Ua ani marū atu vau iāna ’ua ’āmui a’ena ānei ’oia i roto i te hō’ē ’o tā mātou mau purera’a a te ’Ēkālesia ’aore rā ’ua tai’o ānei ’oia i te hō’ē tuha’a o te Buka a Moromona. I tōna paraura’a mai ē ’aita, ’ua fa’auruhia vau ’ia fa’a’ite i tō’u ’itera’a pāpū nō te mau parau mau ’ōhie.
’Ua parau atu vau iāna ē, e’ita roa atu ’oe e nehenehe e ’ite e parau mau ānei te hō’ē mea ma te ’ore e tāmata ’aore rā e ’imi ’oe iho i te mau pāhonora’a. ’Ua fa’ata’a atu vau ē, ’ua ’ite au e parau mau te ’evanelia nō te mea ’ua ’ohipa vau nō te fāri’i i teie mau pāhonora’a ’e ’ua ’ite au i roto i tō’u ’ā’au e parau mau te reira. ’Ua ani atu vau iāna ’ia nā reira ato’a ’e mai te reira taime, ’ua hau atu roa tō māua aura’a.
’Ua fa’aineine mau teie tāmatara’a o te fa’aro’o ’o tā’u i fa’aruru i tō’u taure’are’ara’a, i tō’u ananahi ’ei pipi nā te Mesia. ’Ua ’ite au e rave rahi ha’amaita’ira’a ’e mau parau fafau tei tupu ’a tāmau noa ai au i te ti’aturi i te Fatu ’eiaha ra i te mau mana’o o vetahi ’ē. Mai tā Nephi i parau : « E te Fatu, ’ua ti’aturi au ia ’oe, ’e e ti’aturi au ia ’oe ē a muri noa atu. E ’ore au e tu’u i tō’u ti’aturira’a i roto i te rima tāhuti nei » (2 Nephi 4:34).
’Ia ’ore ana’e te mau mea e tupu mai tei ’ōpuahia ’aore rā tē fa’aruru nei tātou i te mau fifi mana’o-’ore-hia, e mea ’ōhie roa ’ia mana’o ē ’ua arata’i-hape-hia tātou e te Metua i te ao ra, ’ua fa’aru’ehia tātou ’aore rā ’aita i tau’ahia mai.
E ’ere te reira i te parau mau.
’Oia mau, tei roto iho ā i te reira mau taime o te mau tāmatara’a hepohepo ’e te ’oto, e ha’amana’o ai au i te aura’a ’ia tu’u hope roa i tō’u ti’aturira’a i te Fatu. E ti’a iā’u ’ia vaiiho i tō’u ti’ara’a pipi ’e tō’u fa’aro’o ’ia riro mai ’ei aura’a ’e ’ia taui i tō’u orara’a, ’eiaha rā ’ia riro ’ei mea ’ōhie ’e te mātauhia. ’Ua ha’api’i ato’a peresideni Nelson, « E tauturu tō ’outou fa’aro’o ruperupe ia ’outou ’ia huri i te mau tāmatara’a ’ei mau tupura’a i te rahi ’e e mau rāve’a ’ite-’ore-hia a’e nei ».
E nehenehe au e ’ite nāhea te mā’itira’a i te fa’aro’o ia Iesu Mesia i te ha’amaita’i-rahi-ra’a iā’u ’o tā’u i ’ore roa i mana’o e tupu. ’Aita te reira e parau nei e ’ape noa vau i te māuiui, i te mau fifi ’aore rā i te ta’a ’ore, te aura’a rā o te reira, ’ua ’ite au i hea e fāriu ai nō te ’ite mai i te hau ’e te vai-pāpū-ra’a.
Ma te here, tē fa’aha’amana’o mai nei te peresideni Nelson ia tātou, « ’ia ’ite mai ’outou ē : mai te mea e manuia ’ore te mau mea ’e te feiā ato’a tā ’outou e ti’aturi nei i te ao nei, e ’ore roa Iesu Mesia ’e tāna ’Ēkālesia e fa’aru’e ia ’outou ».
Noa atu te mea tā ’outou e fa’aruru nei i roto i tō ’outou orara’a, e mau tītaura’a māuruuru ’ore ānei, te mau fa’ahepora’a a tō te ao nei, te mau fifi ’utuāfare, te mau fifi o te ea i te pae ferurira’a, te pāpū ’ore i te pae faufa’a, te ’oto, te parauti’a ’ore, ’aore rā te tahi atu mau tāmatara’a, tē ani nei au ia ’outou ’ia tāmau noa i te tu’u i tō ’outou ti’aturira’a i te Fatu. ’Ua ’ite pāpū maita’i ’oia i tō ’outou vaira’a. ’Ua ’ite mau ’oia ia ’outou. ’Ua fa’aherehere ’oia i te mau ha’amaita’ira’a fa’ahiahia nō ’outou. ’Oia ato’a i roto i te mau taime ’aita ’outou e hina’aro e ti’aturi iāna, ’a mā’iti noa i te ti’aturi iāna. E mea pāpū tāna mau parau fafau. E arata’i ’oia ia ’outou i te ’oa’oa, i te tīa’ira’a, ’e i te mau temeio i te taime ti’a.
Tē nā reira nei ’oia nō’u ’a tāmau noa ai au i te ti’aturi iāna.