« E fa’aineinera’a fa’ahiahia roa nō te orara’a », Liahona, Tiurai 2024.
E fa’aineinera’a fa’ahiahia roa nō te orara’a
Te mea tā te feiā ’āpī tamāroa ’e te feiā ’āpī tamāhine e ha’api’i mai i roto i te misiōni, e ha’amaita’i ïa i tō rātou orara’a e a muri noa atu.
I tō’u ’āpīra’a mai ā, ’ua fa’ahiahia noa vau ’ia hi’o i te ’ana’anataera’a o te mau misiōnare. I roto i te hō’ē purera’a ’ōro’a i roto i tā’u ’āma’a na’ina’i i Minas, Urutue, ’ua hōro’a mai te hō’ē misiōnare i tōna ’itera’a pāpū ’e ’ua fa’a’ite mai i tōna nino’a mana’o nō ni’a i tāna misiōni. ’Ua vai noa tāna mau parau i roto i tō’u ferurira’a ’e i tō’u ’ā’au.
« I te hō’ē mahana », ’ua parau vau iā’u iho, « e tāvini au i te hō’ē misiōni ».
Tau taime i muri mai, ’ei tahu’a, ’ua ti’a iā’u ’ia ’āpe’e atu i te mau misiōnare nō te mau ha’api’ira’a. ’Ua riro ’ei ’itera’a e ’ore roa e mo’ehia, te rirora’a ’ei misiōnare i te 16ra’a o matahiti !
I te ti’ara’ahia tō’u matahiti e 18, e rave rahi feiā ’āpī i roto i tā’u ’āma’a tei ho’i mai nā tā rātou misiōni, ’oia ato’a tō’u tuahine ’o Ana, tei ho’i mai na te misiōni i Rāparata. ’Ua ha’aputapū ato’a tō rātou mau ’itera’a ’e tō rātou ’itera’a pāpū i tō’u ’ā’au.
’A fātata mai ai te 19ra’a o tō’u mahana fānaura’a, ’ua hina’aro vau e hōro’a i tō’u i’oa nō te haere e poro i te ’evanelia a te Fa’aora ’e e tāvini i roto i tāna ’ō vine (hi’o Te Ha’api’ira’a Tumu ’e te mau Fafaura’a 75:2). ’Ua fa’aineine au ’e ’ua hāpono atu i tā’u mau pu’e parau misiōni. I te taera’a mai tā’u pi’ira’a, ’ua ’īriti au i te rata tei tārimahia e te peresideni Spencer W. Kimball e ’ua tai’o vau ē, e tāvini au i roto i te misiōni nō Urutue/Paratue. E tavini au i roto i tō’u iho fenua ! ’Ua ’oa’oa roa vau nō te fāna’ora’a e poro « i te parau ha’amāuruurura’a ’oa’oa rahi, ’oia ato’a te ’evanelia mure ’ore » (Te Ha’api’ira’a Tumu ’e te mau Fafaura’a 79:1).
’Ua tae atu vau i te piha tōro’a a te misiōni i muri a’e i tō’u rāterera’a e piti hora nā ni’a i te pere’o’o uta ta’ata i Montevideo, Urutue. ’Ua fa’ata’a te peresideni misiōni iā’u ’ei misiōnare nō Te ’Ēkālesia a Iesu Mesia i te Feiā Mo’a i te mau Mahana Hope’a nei ’e ’ua fa’anaho mai i te hō’ē hoa misiōnare nō’u. I taua avatea ra, ’ua ha’amata mātou i te pātoto i ni’a i te mau ’ūputa.
I te ha’amatara’a, tē vai ra te mau taime e ’ere te misiōni i te mea ’ana’anatae roa mai tā’u i mana’o. ’Aua’e rā, e hoa misiōnare ha’apa’o ’e te rave ’ohipa itoito tei tauturu iā’u, ’ia ’ite mai i te ’oa’oa ’ia ha’amo’e iā’u i roto i te tāvinira’a i te Fatu. ’Ua ha’amaita’i tōna hi’ora’a maita’i iā’u i te roara’a o tā’u misiōni.
Terā rā, ’ua ha’amata a’ena ïa tō’u fa’aineinera’a nō te riro ’ei ti’a nō te Fa’aora o Iesu Mesia.
’Ua ha’amata te reira nā roto i te hō’ē fa’ahōhoni tā’amu ārapo’a.
I te ’āva’e Tēnuare 1962, e ono ïa tō’u matahiti, ’ua tae mai te tahi mau misiōnare i te fare toa ho’ora’a piru a tō’u metua tāne nō te mono i te hō’ē fa’ahōhoni tā’amu ’arapo’a tei mo’e i te hō’ē o rāua. I reira, ’ua fa’aro’o rāua i te hō’ē ta’ata e ha’uti ra i te tītā. I tō rāua uiuira’a nō ni’a i teie ta’ata, ’ua ani atu tō’u metua tāne ia rāua ’ia haere mai e fārerei i tōna hoa.
I roto i tā rātou paraparaura’a, ’ua ani atu tō’u metua tāne ’e tōna hoa i te mau misiōnare e ha’uti ānei rāua i te tītā. ’Ua parau te hō’ē Elder ē, e ha’uti ri’i ’oia. ’Ua hōro’a atu te hoa o tō’u metua tāne i tāna tītā iāna ’e ’ua ani iāna ’ia ha’uti mai. ’Ua ha’amata ’oia i te ha’uti i te tahi mau hīmene ’a hīmene ai tōna hoa misiōnare.
Nā roto noa i te mā’imira’a a te mau misiōnare i te hō’ē fa’ahōhoni tā’amu ’arapo’a, ’ua fa’ati’a te reira i tō’u ’utuāfare ’ia ’ite mai i te ’evanelia a Iesu Mesia. ’Ua riro mai mātou ’ei mau hoa maita’i ’e te mau misiōnare ’e ’ua ha’amata mātou i te fa’aro’o i te mau ha’api’ira’a. ’Ua tanuhia te huero o te ’evanelia ’e ’ua ha’amata te reira i te tupu, nā mua roa i roto i tō’u metua vahine, ’o Elsa, ’e tō’u mau tuahine ’o Ana ’e ’o Stella, ’e i muri iho i roto iā’u.
Mai taua mahana ra, ’ua nanea roa te here nō te ’ohipa misiōnare i roto i tō’u ’utuāfare. ’Ua tāvini au i te hō’ē misiōni, ’ua tāvini tā’u mau tamaiti i te hō’ē misiōni ’e i teienei, tē ha’amata nei tā māua mau mo’otua i te fa’aineine ’e i te tāvini i te hō’ē misiōni, ’o te fa’atupu i te u’i toru o te mau misiōnare.
E ’ere noa i te mea ’ōhie te rirora’a ’ei misiōnare. E tītauhia te hō’ē fa’aineinera’a hou te hō’ē feiā ’āpī tamāroa ’e hō’ē feiā ’āpī tamāhine ’a haere ai i roto i te ’āua misiōni. I reira te mau metua, te ’utuāfare ’e te feiā fa’atere o te ’Ēkālesia e riro ai ’ei hi’ora’a maita’i ’e ’ohipa ai ’ei pupu nō te fa’aineine i te feiā ’āpī mai tō rātou ’āpīra’a.
Hō’ē rāve’a nō te tauturu ia rātou ’ia fa’aineine ’o te fa’a’itera’a ïa ia rātou tē mau ’aravihi e au. Te mau ’aravihi mai te fa’ahereherera’a i te moni, te pu’ara’a ’e te ’aurira’a i te ’ahu, te nirara’a i te ’ahu, te fa’a’ana’anara’a te tia’a, te tunura’a i te mā’a, te paraparaura’a ’e te tāvinira’a ia vetahi ’ē, e tauturu te reira ia rātou i roto i tā rātou misiōni. E tauturu ato’a te haerera’a i te séminaire ’e i te institut i te reira fa’aineinera’a ’e e fa’ananea atu i te mea tā rātou i ha’api’i mai i te fare ’e i roto i tā rātou mau pupu ’e mau piha ha’api’ira’a.
’Ia tāmau noa tā tātou pāturura’a ’a vai ai rātou i roto i tā rātou misiōni. E mea nehenehe mau ’ia fa’aro’o i te mau ’itera’a fa’ahiahia tā tō tātou mau misiōnare e ora nei i te mau mahana tāta’itahi. E nehenehe ato’a tātou e ’āmui atu i teie mau ’itera’a nā roto i te fārereira’a atu i te feiā tā rātou e ha’api’i ra. ’Ei hi’ora’a, te metua vahine o te hō’ē o te mau misiōnare tei ha’api’i i tō mātou ’utuāfare ’ua fārerei i tō’u metua vahine ’e ’ua pāpa’i iāna e rave rahi matahiti, ma te tauturura’a i tō’u metua vahine ’ia fa’aea noa i ni’a i te ’ē’a nō te fafaura’a.
’A tauturu ai tātou i te mau misiōnare nō ’ananahi ’ia fa’aineine, e ti’a ia tātou ’ia ha’amana’o ē ’ua hau atu ā te ’ohipa misiōnare i te peu tumu i roto i te ’Ēkālesia—e ’anira’a ’e e fa’auera’a te reira nō ’ō mai i te Fatu ra (hi’o Mataio 28:19). I te ha’amatara’a, ’ua ha’api’ihia Adamu ’e ’o Eva i te ’evanelia. I muri iho, ’ua ha’api’i rāua i te ’evanelia i tā rāua mau tamari’i (hi’o Mose 5:6–12). « ’E ’o te ha’amatara’a ïa o te porora’a o te ’Evanelia mai te mātāmua mai, ’o tei fa’a’itehia e te mau melahi mo’a i tonohia mai nō ’ō mai i te aro o te Atua » (Mose 5:58).
Tē tāmau noa nei ā teie porora’a i teienei ma te hō’ē nu’u hau atu i te 71 000 misiōnare. Terā rā, tē hina’aro nei tātou e rave rahi atu, e rave rahi atu ā, i ni’a i te rēni mātāmua—hō’ē nu’u misiōnare ’e te mau melo.
Te mea tā tātou e ’apo mai i roto i tā tātou misiōni
I roto i tā’u misiōni, ’ua mātau vau i te ’ohipa misiōnare ’e ’ua ha’amata vau i te feruri hōhonu i ni’a i tā mātou parau poro’i. ’Ua mana’o noa na vau ē e parau mau te ’evanelia, terā rā e hina’aro pūai tō’u ’ia ’ite ē e parau mau te reira. ’Ua pure au, ’ua ha’apae i te mā’a, ’ua ’imi maita’i, ’ua rave i te ’ohipa ’e ’ua tīa’i au i te pāhonora’a.
I te hō’ē mahana i roto i te ha’api’ira’a, ’ua fa’a’ite atu vau i te ’ā’amu nō te ’Ōrama Mātāmua o Iosepha Semita :
« ’Ua ’ite atu ra vau i te hō’ē pou māramarama i ni’a noa a’e i tō’u upoʼo, tei hau atu tōna teatea i tō te mahana, ’e ’ua pou marū noa mai ra te reira i ni’a iho iā’u.
« I te ma’irira’a mai taua māramarama ra i ni’a iho iā’u, ’ua ’ite atu ra vau e piti ta’ata, tō rāua teatea ’e te hanahana ’a ti’a noa ai rāua i ni’a a’e iā’u i roto i te reva ra, e ’ore roa ïa e ti’a ’ia fa’aauhia i te hō’ē noa atu mea. ’Ua parau mai ra te hō’ē o rāua iā’u, ma te fa’ahiti mai i tō’u i’oa, ’e ma te fa’atoro atu i tōna rima i ni’a i te tahi, i te nā-’ō-ra’a mai ē—O tā’u Tamaiti here teie. ’A fa’aro’o iāna ! » (Iosepha Semita—’Ā’amu 1:16–17).
I taua taime ra, ’ua nehenehe iā’u ’ia putapū i te Vārua Maita’i i te ha’apāpūra’a mai iā’u ē, e parau mau te mea tā’u e ha’api’i ra. ’Ua ’ite mau iho ā te peropheta Iosepha Semita i te Metua ’e te Tamaiti, ’e te Buka a Moromona ’o te parau ïa a te Atua ’e, mai te Bibilia, e fa’a’ite pāpū nei i tō tātou Fa’aora. ’Auē ïa hau tā te reira i hōpoi mai i tō’u vaerua. Noa atu e rave rahi ’ahurura’a matahiti i muri mai, e tāmahanahana noa te reira i tō’u ’ā’au.
E au tā’u misiōni mai te fāri’ira’a i te parau tū’ite tuatoru master pae vārua. Te mea tā te feiā ’āpī tamāroa ’e te feiā ’āpī tamāhine e ha’api’i mai i roto i te misiōni, e ha’amaita’i ïa te reira i tō rātou orara’a e a muri noa atu. I rotopū i te mau mea e rave rahi, tē ha’api’i nei rātou :
-
Nāhea i te ’imi maita’i, te pure, te ha’api’i ’e i te fa’a’ohipa i te mau parau tumu o te ’evanelia i te mau mahana ato’a.
-
Nāhea ’ia ora ’e te hō’ē hoa e 24 hora i te mahana.
-
Nāhea ’ia ha’apa’o maita’i i tō rātou ea.
-
Nāhea ʼia fa’anaho
-
Nāhea i te ha’amaita’i i te ’aravihi nō te fa’aterera’a.
-
Nāhea i te tū’ati maita’i atu i te tahi atu mau ta’ata.
-
Nāhea ’ia ’imi, ’ia fa’aro’o, ’e ’ia arata’ihia e te Vārua Maita’i.
E ha’apūaihia ’e e fa’aineinehia te feiā ’āpī tamāroa ’e te feiā ’āpī tamāhine e tāvini nei i te misiōni ’ia fa’aruru i te mau tāmātara’a o te orara’a, ’a tāmau noa ai rātou i te fa’a’ohipa i te mea tā rātou i ’apo mai i roto i tā rātou misiōni.
Teie te mahana
’Ua ha’api’i tō tātou peropheta here, Russell M. Nelson ē :
« ’Aita i ’ite-noa-hia a’e hō’ē taime i roto i te ’ā’amu o teie nei ao ’a riro ai te ’itera’a i tō tātou Fa’aora ’ei ’ohipa faufa’a ’e te tītauhia nō te vāerua ta’ata tāta’itahi. ’A feruri nā i te vitiviti rahi o te fa’atītī’aifarora’a i te mau mārōra’a ’ī’ino nā te ao nei—’e tō roto ato’a i tō tātou orara’a tāta’itahi—’āhiri te mau ta’ata ato’a e mā’iti ’ia pe’e ia Iesu Mesia ’e ’ia ha’apa’o i tāna mau ha’api’ira’a ».
Teie te mahana nō tātou nō tē fa’a’ite i te huru maita’i ’e te itoito ’e nō te fa’a’ite i te ’evanelia a Iesu Mesia. Teie te mahana nō tā tātou feiā ’āpī ’ia fa’aineine nō te tāvini i roto i te nu’u a te Fatu, nō te hō’ē misiōni ha’api’ira’a ’aore rā tāvinira’a. Tē hina’aro nei teie nei ao ia ’outou ! Tē vai rā te mau turi ’āvae nō te fa’a’eta’eta, te mau rima nō te fa’ateitei, ’e te parau mau nō te poro (hi’o Te Ha’api’ira’a Tumu ’e te mau Fafaura’a 81:5).
’Ia tūra’i teie ’anira’a manihini a te Fatu ia tātou ’ia rave i te ’ohipa ’e ’ia fa’ati’a i te reva o te parau mau ma te mana :
« Inaha, tē parau atu nei au ia ’outou na, ’o tō’u ïa hina’aro ’ia haere atu ’outou i mua …
« Ma te fa’ateitei i tō ’outou reo mai te ’otora’a o te pū ra, i te porora’a atu i te parau mau mai te au i te mau heheura’a ’e te mau fa’auera’a tā’u i hōro’a atu ia ’outou na.
« ’E nō reira, mai te mea e ha’apa’o maita’i noa ’outou, e riro ïa ’outou … i te fa’akoronahia ho’i i te tura, ’e te hanahana, ’e te tāhuti ’ore, ’e te ora mure ’ore ho’i » (Te Ha’api’ira’a Tumu ’e te mau Fafaura’a 75:3–5).