« E ’ā’amu nō te manuiara’a misiōnare : 60 matahiti i te ’ohipara’a », Liahona, Tiurai 2024.
E ’ā’amu nō te manuiara’a misiōnare : 60 matahiti i te ’ohipara’a
’Auē ïa ’itera’a ’oa’oa nō’u i te fa’aro’ora’a ē, ’ua tanuhia te hō’ē huero o te ’evanelia e rave rahi matahiti i ma’iri a’e nei, ’ua hōro’a mai i te mā’a hotu.
Fa’ahōho’ara’a nā Carolyn Vibbert
E ’īrava here-roa-hia nā’u Te Ha’api’ira’a Tumu ’e te mau Fafaura’a 18:10 : « E faufa’a rahi tō te mau vārua ta’ata i mua i te aro o te Atua ». ’E i te tahi taime, e tītauhia e rave rahi o tātou ’ia ’ohipa ’āmui nō te fa’a’ite i te ’itera’a pāpū, nō te ’āfa’i mai i te mau vārua i te Fa’aora ra (hi’o 2 Korinetia 13:1).
’Ua fa’aha’amana’ohia vau i teie fa’anahora’a nehenehe maita’i o te ’ohipa misiōnare ’āmui, ’a fāri’i ai au i te hō’ē rata uira i te hō’ē mahana. Tē parau ra te hō’ē taea’e ē, e tamaiti ’oia nā te peresideni misiōni i Wichita, Kansas, ’e ’ua ui mai ’o vau ānei te vahine a Robert Monson. ’Ua nā ’ō fa’ahou mai te taea’e ma te parau mai ē, tē ’imi ra ’oia ia Elder Monson tei tāvini i roto i te misiōni nō Marite rōpū apato’erau i te matahiti 1959. ’O tā’u ïa tāne.
’Ua fa’ati’a mai ’oia iā’u, nō nā misiōnare ’āpī e piti tei fa’auruhia ’aita i maoro a’enei ’ia tomo atu i roto i te hō’ē fare tahua. ’Ua pātōtō rāua i te ’ōpani mātāmua ’e ’ua ’ite atu i te hō’ē vahine ruhiruhiā, tei ani manihini ia rāua ’ia ho’i mai i te mahana nō muri iho. ’Ua fa’anaho rātou i te hō’ē hora pāpū maita’i.
I tō rāua ho’ira’a atu nō te fārerei atu iāna ’ua ha’api’i mai rāua ē, tē vai nei tā teie vahine ruhiruhiā te hō’ē buka pāpa’ira’a mo’a torutahi ’oia ho’i (te Buka a Moromona, Te Ha’api’ira’a Tumu ’e te mau Fafaura’a, ’e te Poe Tao’a Rahi) ’o tā te mau misiōnare i hōro’a nāna i te matahiti 1959. ’Ua tai’o ’oia e rave rahi taime ’e ’ua ’ite ’oia ē, e parau mau te mau ha’api’ira’a i roto. ’Aita rā ’oia i riro mai ’ei melo nō te ’Ēkālesia nō te mea ’aita tāna tāne fa’aipoipo i hina’aro ’ia haere ’oia i te purera’a ’aore rā, ’ia bāpetizohia ’oia. ’Aita i maoro a’enei ’ua pohe tāna tāne, ’e ’ua pure ’oia ’ia ti’a iāna ’ia fārerei fa’ahou i te mau misiōnare. I roto i tāna buka pāpa’ira’a mo’a torutahi tē vai rā nā i’oa o nā misiōnare e piti nō te matahiti 1959 : Robert Monson ’e ’o Granade Curran, tā’u ïa tāne fa’aipoipo ’e tōna hoa misiōnare.
I roto i te mau hepetoma i muri mai, ’ua ha’api’i mai teie vahine nō ni’a i te fa’anahora’a nō te fa’aorara’a ’e te mau ha’amaita’ira’a o te hiero. ’Ua pohe tāna tamaiti i te 22ra’a o tōna matahiti, ’e ’ua ’oa’oa roa ’oia i te ti’ara’a e fārerei fa’ahou atu iāna. I te anira’a te mau misiōnare iāna ’ia bāpetizohia ’oia, ’ua fāri’i ’oia ma te pōpou i tā rātou anira’a.
’Ua pohe tā’u tāne ’e tōna hoa misiōnare, ’o Elder Curran, terā rā e nehenehe au e feruri ia rāua i te haerera’a atu i teie bāpetizora’a nehenehe nā terā pae mai o te pāruru.
’A fa’ati’a noa mai ai te tamaiti a te peresideni misiōni iā’u i teie ’ā’amu, ’ua ha’amana’o vau ē e’ita roa te Fa’aora e ha’amo’e i te hō’ē o tātou. Tei pīha’i iho noa ’oia ia tātou mai te mea e fa’ati’a tātou iāna ’ia tomo mai i roto i tō tātou orara’a. Tē fa’ati’a nei te Faufa’a ’Āpī i te ’ā’amu nō Zakaio, tei pai’uma i ni’a i te tumu rā’au sūkāmino nō te hi’o i te Fa’aora (hi’o Luka 19:1–10). I ni’a roa ato’a i te tumu rā’au, ’ua ’itehia mai Zakaio e te Fa’aora ’o tei ani iāna ’ia haere mai e tāmā’a i tōna fare. Mai te reira ato’a, ’ua pure ’e ’ua tīa’i te hō’ē tuahine pa’ari i te mau misiōnare ’ia pātōtō mai i tōna ’ūputa, ’e ’ua nā reira rātou. ’Ua ’ite roa te Fa’aora ia tātou pā’āto’a. « I haere mai nei ho’i te Tamaiti a te ta’ata nei e ’imi i tei mo’e ra e fa’aora » (Luka 19:10).
E piti pupu misiōnare—hō’ē ’ua hau atu i te 60 matahiti i teienei ’e hō’ē ’aita i maoro a’enei—tei ’āfa’i mai i teie tuahine ia Iesu Mesia ra ’e i muri iho, ’ua ha’apūai i tō rātou iho ’itera’a pāpū ’e ’ua ’oa’oa ho’i i roto i te Fatu. Tē fa’ahiahia nei au i te rirora’a ’ei tā’ata māta’ita’i nō teie ’ā’amu, tē putapū nei au i te ’oa’oa nō te mau ta’ata ato’a tei tauturu i te ’āfa’ira’a mai i teie tuahine i te Fa’aora ra (hi’o Te Ha’api’ira’a Tumu ’e te mau Fafaura’a 18:15).
Tē ora nei te ta’ata pāpa’i i Utaha, Marite.