’Ua hia’ai atu ra tō’u vārua ’ia pārahi ato’a i reira

Nā London Brimhall, mau ve’a a te ’Ēkālesia

’Ua tae mai te hō’ē ’ā’amu au-roa-hia e au o te pāpa’ira’a mo’a ’ei pāhonora’a i tō’u hina’aro ’ia ha’afātata atu i tō’u Metua i te ao ra ’e i tāna Tamaiti.

I te hō’ē mahana ’ua haere mai au i te hiero ma te hō’ē uira’a i roto i tō’u ’ā’au : « E tō’u Metua i te ao ra, e aha tō’u huru i roto i te ’evanelia ? »

Mai te mea ra, ’ua rahi roa atu tō’u mau hapehape i taua hepetoma ra. Mai ia Nephi, ’ua teimaha roa vau i te mau hara ’o tē ha’a’ati haere noa nei iā’u. ’Oia ato’a rā mai ia Nephi, ’ua ’ite au ’o vai tā’u i ti’aturi. (Hi’o 2 Nephi 4:18–19.) ’Ua ti’aturi au ē, te ravera’a i te taime ’e te Fatu i roto i tōna fare i taua po’ipo’i ra, e tauturu ïa iā’u ’ia fa’aiti mai i te āteara’a ’o tā’u e putapū nei.

’Ua fa’aro’o maite au i te tuha’a tā’āto’a o te ’ōro’a hiero ’e ’ua ’ite au i te māuruuru rahi nō te pūai ’e te ’ite tā te reira i hōro’a mai iā’u. I tō’u rā tomora’a atu i roto i te piha tiretiera, te teimaha noa atu ra tō’u ’ā’au. Nāhea vau ’ia ’ite i tō’u fāito i mua i te Fatu ?

’Ua pārahi au ’e ’ua feruri hōhonu ma’a minuti ri’i ’e i muri iho ma te mana’o tae, ’ua ha’amata vau e ti’a i ni’a. ’Ua huti rā te tahi mea iā’u i raro, ma te fa’ahōhonu atu ā iā’u i roto i te pārahira’a. Mana’o ihora vau, « ’aita vau e hina’aro e haere ».

’Ua hi’o vau ’ati a’e i te piha ’e ’ua ’ite atu i te hō’ē hōho’a pēni mātauhia nō Iesu Mesia tei hā’atihia e te mau melahi, ma tōna nā rima matara iā’u ra. Puta mai ra i roto i tō’u ferurira’a te mau parau o te hō’ē pāpa’ira’a mo’a au-roa-hia e au : « ’Ua hia’ai atu ra tō’u vārua ’ia pārahi ato’a i reira » (hi’o Alama 36:22).

Pinepine au i te feruri hōhonu i te aura’a o teie ’īrava i roto i te ’ā’amu o Alama. Nā mua a’e, nō tāna mau hara, te mana’ora’a e ti’a atu i mua i te Atua, ’ua fa’a’ī ia Alama i te hō’ē « ri’ari’a fāito ’ore » (Alama 36:14). I muri a’e rā i tōna fāriura’a atu i te Mesia, ’ua ’ite atu ’oia i te Atua tei hā’atihia e te mau melahi, ’e « ’ua hia’ai atu ra [tōna] vārua ’ia pārahi ato’a i reira ». ’Ua riro noa na teie ta’a-’ē-ra’a o te pāpa’ira’a mo’a ’ei mea nehenehe nō’u. ’Ua fa’atupu te tauto’ora’a ha’iha’i a Alama ’ia fāriu atu i ni’a te Fatu i te fa’aurura’a rahi i ni’a i tō’u ’ā’au.

’Ite a’era vau ē, ’aita vau i ineine i te haere i rāpae i te piha tiretiera nō te mea, mai ia Alama ato’a, ’ua hina’aro tō’u vārua ’ia pārahi i reira—i roto i te hiero i te reira mahana ’e i te pae hope’a i pīha’i iho i tō’u Metua i te ao ra ’e ia Iesu Mesia i roto i tō’u fare i te ra’i ra. ’Ua fa’a’ohipa te Vārua Maita’i i tā’u ’ā’amu o te pāpa’ira’a mo’a au roa a’e, nō te parau iā’u ē ’ua ’ite te Atua i tō’u ’ā’au. ’Ua fa’aha’amana’o te reira iā’u ē, noa atu tō’u mau hapehape, e fāri’i te Fatu i tā’u mau tauto’ora’a nō te ha’afātata iāna. ’Ua ’ite ’oia ē, tē hia’ai nei au ’ia pārahi i reira.