« ’Eiaha e ma’iri i te hō’ē misiōni feiā pa’ari », Liahona, Tiurai 2024.
Rū’aura’a i roto i te ha’apa’o maita’i
’Eiaha e ma’iri i te hō’ē misiōni feiā pa’ari
Tē tītau nei tā tātou mau fafaura’a ia tātou ’ia tāvini i te tahi ’e te tahi, ’ia ti’a ’ei ’ite nō te Atua, ’e ’ia tāmāhanahana i te feiā e hina’aro i te tāmāhanahanara’a. Te tāvinira’a ’ei misiōnare feiā pa’ari ’o te hō’ē ïa rāve’a nō te fa’atupu i teie mau anira’a, te ha’amaita’ira’a i tō tātou iho orara’a ’e te feiā tā tātou e tāvini nei.
I teie taime, e 34 000 misiōnare feiā pa’ari i roto te misiōni rave-tāmau ’aore rā te misiōni tāvinira’a mai tō rātou mau hoa feiā ’āpī, ’o tē ’ite nei i te ’oa’oa rahi i roto i tō rātou tere. E nehenehe te mau ta’ata ’ōtahi ’e te mau ta’ata fa’aipoipohia e tāvini ’ei mau misiōnare feiā pa’ari i roto i te mau tonora’a rau.
’E e mea rahi roa te mau tītaura’a. I te ’āmuira’a rahi nō ’Ātopa 2023, ’ua fa’aitoito Elder Ronald A. Rasband nō te Pupu nō te Tino ’Ahuru ma Piti ’Āpōsetolo i te mau melo pa’ari ’ia feruri i te hō’ē misiōni feiā pa’ari. ’Ua ui ’oia : « ‘E aha tā ’outou e rave nei i teie fāito o tō ’outou orara’a ?’ Tē vai nei e rave rau rāve’a e nehenehe te mau misiōnare feiā pa’ari e rave, ’o tā te tahi mau ta’ata e ’ore e nehenehe e rave. E pūai fa’ahiahia tō ’outou nō te maita’i, tei ’aravihi i roto i te ’Ēkālesia ’e tei ineine nō te fa’aitoito ’e nō te fa’aora i te mau tamari’i a te Atua ».
Te fa’ata’ara’a mea nāhea te mau misiōnare feiā pa’ari ’ia pi’ihia, ’ua parau te peresideni Russell M. Nelson : « ’Ua rau ’e te ’ā’ano te mau rāve’a nō te mau misiōnare feiā pa’ari. ’Ua rave-ti’a-hia tō rātou mau pi’ira’a nō te tāvini i muri a’e i te hi’opo’ara’a nā roto i te pure, i tō rātou ti’ara’a i te pae ’ohipa, tō ’aravihi i te pae o te reo ’e tō rātou iho mau ’ite. I roto i te mau ’aravihira’a ato’a e tītauhia nō te tāvini, te hia’ai nō te tāvini ’o te mea faufa’a roa a’e ». ’Ua fa’ata’a ato’a ’oia te mau tauturura’a a te mau misiōnare feiā pa’ari ’ei mea « mono-’ore-hia ».
« Tē rave nei te tahi mau misiōnare feiā pa’ari i te ’ohipa i roto i te piha tōro’a o te misiōni ’aore rā i roto i te ha’api’ira’a tuatoru BYU–Pathway ’aore rā i roto i te fa’anahora’a tauturura’a i te ao nei tei ha’amau-maita’i-hia », tē parau ra te hō’ē misiōnare feiā pa’ari. « ’Ua tāvini nā māua iho i roto e rave rahi ’o teie mau huru misiōni. Nō reira, ’ua huru pāpū ’ore ri’i māua ’a pi’ihia ai māua i roto i te misiōni MLS (pāturura’a i te melo ’e te feiā fa’atere). I te taime māua ’a ha’amata ai, ’ua au roa māua i te fa’a’ōhiera’a ’e te tupura’a ’o tā teie huru misiōni i hōro’a mai ia māua, nō te fārerei atu i te mau melo ’e nō te ha’apūai i te mau ’āma’a i reira. »
’Ua parau te hō’ē tuahine feiā pa’ari e tāvini ra i roto i te hō’ē pū fa’ari’ira’a rātere ē, « i te pohera’a tā’u tāne fa’aipoipo, ’aita vau i ’ite pāpū roa e aha te mea e rave i tō’u mau taime. I teienei, e mau ’ohipa tā’u e rave, e mau vāhi nō te haere atu, e mau ta’ata nō te haere e hi’o. E mau ta’ata tā’u e turu’i nei i ni’a iā’u ».
« ’Eiaha e taiā noa atu ’aita ’outou i tāvini i tō ’outou ’āpīra’a », tē parau ra te hō’ē tuahine i tōna ho’ira’a mai nā tāna misiōni feiā pa’ari. « E ti’ara’a ’āpī teie nō te mau ta’ata ato’a. ’Ua ha’api’i ’āmui mai tātou pā’āto’a ’ia turu’i i ni’a i te Fatu ’oia ato’a i ni’a i te tahi ’e te tahi, ’e ’ua ’ite mai ē ‘nā roto i te mau mea iti ’e te pāpū e fa’atupuhia ai te mau mea rarahi’ [Alama 37:6] ».
Mau ha’amaita’ira’a nō te mau misiōnare
Rave rau te mau misiōni a te feiā pa’ari hau atu i te mau misiōnare feiā pa’ari. Tē vai nei e rave rau huru ato’a—tāta’itahi e tōna iho mau tāmatara’a, mau ’oa’oara’a ’e tōna iho mau fana’ora’a. Tē vai ra rā te tahi mau tuha’a e tū’ati i te huru misiōni feiā pa’ari ato’a : te ’imi-’ū’ana-maita’i-ra’a i te mau pāpa’ira’a mo’a, te mau pure ateate ’e te tu’utu’u ’ore, te tāvinira’a itoito, te arata’ira’a tāmau a te Vārua Maita’i, ’e te hō’ē rāve’a hō’ē roa ’ia rave i te hō’ē ta’a-’ē-ra’a.
« ’Aita roa a’enei au i ’ite iā’u i te ha’afātatara’a i te Fatu, i te taime noa ’a tāvini ai māua ’ei misiōnare feiā pa’ari », tē parau ra te hō’ē misiōnare feiā pa’ari. « ’Ua ’ite au tē vai ra te tahi mau mea ’aita i roa’a iā’u ’ia fa’atere, i te fare iho ā rā ’e tā’u mau tamari’i ’e mau mo’otua. Nō reira ’ua tu’u atu vau i te mau mea i roto i te rima o te Fatu. ’E ’ua ha’amaita’i ’oia i tō māua ’utuāfare. ’Aita roa a’enei māua i ha’afātata atu i tā māua mau mo’otua, i te taime noa ’a fārerei ai māua ia rātou i te mau hepetoma ato’a nā ni’a i te zoom (’āfata natirara). ’Ua paraparau atu māua nō ni’a i te mau mea ’aita roa atu rātou i ’ana’anatae nā mua a’e. Noa atu ’aita te reira e tupu nō te mau ta’ata ato’a, nō māua nei, ’ua ho’i mai te hō’ē tamaiti i te purera’a ’a tāvini ai māua, ’e ’ua fa’aipoipohia te tahi atu tamaiti ’e ’ua tā’atihia i muri iho i roto i te hiero ».
’Ua parau te tahi atu misiōnare feiā pa’ari ē, « ’ua riro tā māua ’imira’a maita’i i te pāpa’ira’a mo’a i te mau mahana ato’a, te ta’ata iho ’e ’ei hoa misiōnare, ’ei ’ohipa faufa’a rahi nō te mea tē ’imi nei māua i te mau rāve’a nō te fa’a’ohipa i te mau pāpa’ira’a mo’a, ’eiaha noa i te tai’ora’a i te reira. ’Aita vau i tūtonu noa i te ‘āteara’a’, mai tā’u i rave i te tahi taime mai mūta’a ra. I roto i tā māua tāvinira’a, e au ra iā’u ē, tē fa’ahiti tāmau nei au i te hō’ē pāpa’ira’a mo’a ’o tā māua e tai’o nei i taua mahana ra ’aore rā i taua hepetoma ra, nō reira ’ua ha’amata vau i te ti’aturi e fa’a’ohipa vau i te mau pāpa’ira’a mo’a ’āpī ’o tā’u i tai’o i te mau mahana ato’a. ’Aita vau i fa’aea noa i roto i tā’u ’imira’a maita’i o te pāpa’ira’a mo’a, ma te feruri e fa’ahiti i te hō’ē mea tā’u i tai’o i terā mahana ».
« ’Ua hōro’a mai te tāvinira’a i te hō’ē misiōni i te hō’ē hi’ora’a ’āpī o te orara’a », ’ua parau te hō’ē tuahine feiā pa’ari. « ’Ua hōro’a mai te reira iā’u i te hō’ē fā maita’i roa, hō’ē tumu ’āpī nō te ora, ’e te tahi mea e rave hau atu i te huira’a pōpō ’aore rā i te ha’apa’ora’a i tā’u mau mo’otua ».
« Te tāvinira’a e piti ïa tōna terera’a » ’ua parau te tahi atu misiōnare feiā pa’ari. « ’Ia feruri ana’e māua—ma te ha’apeu ri’i—nō te rahira’a ’ohipa tā māua e rave nei nō vetahi ’ē, ’aita māua i manuia rahi roa. I tō māua rā ’itera’a e rave rahi tā māua i ’apo mai ’e ’ua tupu māua iho i te rahi, ’aita māua i taui noa e au rā ē tē ’ana’anatae ato’a nei te tahi atu mau ta’ata i te mea tā māua e parau nei ’e e rave nei. ’Ua hau atu te mau ha’amaita’ira’a tā māua i fāri’i i tei ’ore roa atu i tīa’ihia e māua ».
Mau aura’a pūai a’e
’Ia tāvini ana’e te mau ta’ata ’ei misiōnare feiā pa’ari, e fa’ananea rātou i te mau aura’a hōhonu ’o te vai i te tā’āto’ara’a o te orara’a. E rave rahi ’o tē ha’afātata nei i te mau ta’ata tā rātou e tāvini nei. E ’atu’atu ato’a rātou i te mau tā’amura’a pūai ’e te tahi atu mau misiōnare ’e te feiā fa’atere o te fenua iho. « ’Ua tā’amu māua i te auhoara’a ’e te mau misiōnare feiā ’āpī, te tahi mau ta’ata fa’aipoipo ’e te mau ta’ata ’o tā māua e ’ore roa e fārerei, ’āhiri māua i fa’aea noa i te fare », ’ua parau te hō’ē misiōnare feiā pa’ari. « Tē fārerei tāmau nei māua i te tahi ’e te tahi. I te hō’ē taime ’ua mana’o vau ē e hō’ē ā huru i te mau mahana ato’a, ’ua hōro’a mai te haerera’a i te misiōni ia māua i te hō’ē ha’amatara’a ’āpī ’e te mau hoa ’āpī nō te rāterera’a ’e ’o māua ».
E nehenehe ato’a te mau misiōni feiā pa’ari e tauturu i te mau ta’ata fa’aipoipo ’ia ha’apūai i tō rātou fa’aipoipora’a. ’A rave noa ai te mau ta’ata i tā rātou fa’atuha’ara’a ’aore rā e fa’aiti mai i tā rātou hora ’ohipa, e nehenehe te mau ta’ata fa’aipoipo e ’ite ē e ti’a ia rātou ’ia feruri-’āmui-fa’ahou i te hō’ē ’ōpuara’a ’āmui, nō te mea ’aita paha rātou e aupuru fa’ahou nei i te mau tamari’i i tō rātou fare. E nehenehe ato’a rātou e ha’amatau ’ia vai noa i roto i tō rātou iho ’aravihi ’e i tā rātou iho tārena. E nehenehe te matahiti pa’ari ’aore rā te fa’atuha’ara’a e taui i te reira. ’A ha’amata i te hō’ē ’ohipa ’āpī, te fa’a’ite-’āmui-ra’a i te hō’ē ’itera’a, ma te tāvinira’a ānei i te fare ’aore rā te rave-tāmau-ra’a i te hō’ē misiōni feiā pa’ari, e nehenehe e tauturu i te fa’atupu i te hō’ē ’ōpuara’a ’āpī nō te hō’ē nā ta’ata fa’aipoipo ’e nō te ha’apūai i tō rāua ti’aturira’a i te tahi ’e te tahi.
« Tē nā ’ō nei te hō’ē parau pa’ari ē, i te fa’atuha’ara’a ’o te ’āfara’a noa o te moni te roa’a mai, ’e te tāta’i-piti rā ’o te tāne fa’aipoipo ïa i nā mua a’e nei », ’ua parau ma te ’ata’ata hō’ē tuahine. « Te tāvinira’a i te hō’ē misiōni i te hō’ē vāhi ātea i tō māua ’utuāfare, ’ua fa’ati’a ia māua ’ia paraparau i teie mau tauira’a ma te hō’ē rāve’a o tē ’ore roa māua e nā reira hou tā māua misiōni. I muri a’e i te fa’atuha’ara’ahia tā’u tāne fa’aipoipo, e tāu’aparau ri’i noa māua ’ia tupu ana’e mai te mau umeumera’a. I teienei, ’aita māua e haere nei i tō māua iho ’ē’ā ’e i te tāu’a ’ore i te tahi ’e te tahi, ’aita māua e hina’aro e fa’atupu i te hō’ē fifi i ni’a i te ’ohipa a te Fatu, nō reira e paraparau māua nō te mea e ha’ape’ape’a nei ia māua ».
« ’Ua ha’amata vau ’e tā’u vahine e paraparau i te mau pō ato’a nō te aroha rahi o tā māua i fāri’i i te mahana tāta’itahi i te roara’a o tā māua misiōni », ’ua parau te hō’ē misiōnare feiā pa’ari. « ’Aita te reira i tauturu noa ia māua ’ia rōtahi rahi atu ā i ni’a i te mea tei tupu ’e iti mai a’e i ni’a ia māua iho, ’ua hōro’a ato’a mai rā te reira ia māua i te rāve’a ’ia hi’o i te maita’i ’ati a’e ia māua, noa atu i te tahi taime o te reira mahana ’aita i tupu maita’i ».
« ’E nō te mea o te reira te ’ohipa hope’a tā māua e rave i te mau pō ato’a », ’ua parau fa’ahou tāna vahine, « ’ua ta’oto atu māua ma te mana’o pe’ape’a iti ’e hau atu i te ’oa’oa rahi i nā rahira’a matahiti. ’Ua tauturu ato’a te reira iā’u ’ia ta’oto maita’i a’e ! »
Mau ha’amaita’ira’a nō te feiā tā rātou e tāvini nei
Tē vai nei i roto te orara’a te mau taime maita’i ’e te mau taime fifi—tōna mau mahana maitai ’e tōna mau mahana ’ino. Mai te reira ato’a te mau misiōni. Terā rā te tāvinira’a i te Fatu ’ua rau ïa te mau ha’amaita’ira’a e roa’a mai, ’eiaha noa ’ia oti ana’e te misiōni, i roto ato’a rā i te misiōni. Mai tā te taea’e fēti’i o Moredekai i parau ia Esetera, « ’o vai tē ’ite e ’ore ’oe e tae i te bāsileia nō te hō’ē tau mai teienei ? » (Esetera 4:14 ; reta tei fa’ahuru-’ē-hia). Ma te hi’o i muri i tā rātou tāvinira’a, e rave rahi misiōnare feiā pa’ari tei mana’o ē ’ua tonohia rātou nō te hō’ē ’ohipa ’aore rā i te hō’ē vāhi i reira rātou i te ’aravihira’a nō te pāhono i te hō’ē hina’aro ta’a ’ē.
’Ua rave ti’a vau i te hō’ē ’itera’a nō te maita’i pūai tā te hō’ē nā ta’ata fa’aipoipo misiōnare feiā pa’ari e nehenehe e rave ’a ora ai au i Louisiana, Marite. Tau taime ri’i i muri a’e i tō’u pi’ira’ahia e tāvini i roto i te ’āpo’ora’a teitei nō te titi nō New Orleans i Louisiana, ’ua fa’ata’ahia vau nō te pāturu i te ’āma’a nō Port Sulphur. E mea iti roa te mau taea’e itoito o te autahu’ara’a i roto i te ’āma’a. Te rahira’a o te mau ti’ara’a ’orometua ha’api’i ’e te fa’aterera’a, ’ua mauhia ïa e te mau vahine e ’ere tā rātou tāne i te melo. I te tahi taime, e fa’ata’ahia te mau misiōnare feiā pa’ari ’aore rā te feiā fa’atere titi i roto i te ’āma’a, e mea iti rā tō rātou manuiara’a nō te fārerei atu i teie mau ’utuāfare melo.
I muri iho ’ua fa’ata’ahia te hō’ē nā ta’ata fa’aipoipo feiā pa’ari nō Wyoming, Marite, nō te pāturu i te ’āma’a. E feiā fa’a’apu rāua e rave rahi matahiti ’e ’ua rave rāua i te ’ohipa i roto i te hō’ē fare hāmanira’a pata pa’ari i pīha’i iho i tō rāua fare. Nō tō rāua huru orara’a ’e te mau ’ohipa i tupu i roto i tō rāua orara’a, e mea ’ōhie nō rāua ’ia fa’ahoa e rave rahi ta’ata nō Port Sulphur e rave i te ’ohipa i roto i te tapiha’ara’a mōrī ’arahu. ’Ua rave nā ta’ata fa’aipoipo i te taime rahi roa nō te patura’a i te mau aura’a ’e te aupurura’a i te mau ’utuāfare ’āfa-melo i roto i te ’āma’a. Maoti tā rāua tāvinira’a ’e tō rāua here, i te roara’a o tō rāua fa’aeara’a i Port Sulphur, ’ua ha’apūaihia ’e ’ua ha’amaita’ihia te ’āma’a nā roto i tā rāua tāvinira’a ha’apa’o maita’i. E rave rahi tāne nō teie mau ’utuāfare ’āfa-melo tei tomo mai i roto i te ’Ēkālesia, tei ha’apūai mai i te pupu peresibutero ’e te ’āma’a.
E ha’amaita’i te mau misiōnare feiā pa’ari i te mau orara’a—tō rātou iho ’e tō vetahi ’ē ato’a’. ’Eiaha e ma’iri i te mau rāve’a fa’ahiahia nō te tāvini ’e nō te tupu i te rahi !